رجاء المشاركة من اصحاب السيارة اسبيرانزا تيجو
 

بداية السلام عليكم ورحمة الله وبركاته

انا عايز اشترى العربية اسبيرانزا تيجو 1600 نظرا لظروف سرقة عربيتى القديمة وخلال رحلة السؤال عن العربية فى كل المنتديات وسؤال المعارف والاصدقاء لاحظت :
1- الناس اللى اشترو العربية ومعاهم بقالها فترة بيشكرو فيها جدا بس بيأكدو على ضرورة المحافظة على مواعيد الصيانة وعدم التكبير عن اى مشكلة وحلها فورا
2- الناس اللى بينصحو بالابتعاد عنها اسف فى الكلمة كأن قرصتهم عقربة لما بيسمعو كلمة صينى وده ممكن يكون بدون سابق تجربة او حتى سمعو شكوى من حد
3- العيوب الشائعة والمكررة فى العربية فى المنتدى والمنتديات التانية كلها غير مقلقة زى رزع الابواب او العفشة اللى بتحتاج تربيط كل فترة
4- من واقع سؤال ناس كتير معاهم الاسبيرانزا (موديلات مختلفة ) التوكيل اتحسن كتير اوى عن الاول وبقو بيعرفو يصلحو اى حاجة فى العربية غير الاول خالص ودى حاجة مطمئنة
5- العربية ارخص فى اوتو سمير ريان عن التوكيل فى حدود الف او الف ونص انت وشطارتك
6- ان الصينى لسة محتاج شوية وقت عشان يثبت رجليه فى السوق واللى بيحصل معاه دلوقتى زى اللى حصل مع الكورى اول لما نزل السوق المصرى

رجاء كل اصحاب العربية التيجو يشاركو فى الموضوع ولو فى اضافة ياريت عشان عايز اكون فكرة كاملة عن العربية قبل ما اتوكل على الله واشتريها

رد: رجاء المشاركة من اصحاب السيارة اسبيرانزا تيجو
 

أنا معايا العربيه تيجو 1600 من سنه و زى الفل ومفيش اى مشاكل....ولكن ضرورى الالتزام بالصيانه 5000 كيلو او 3 اشهر ايهما اقرب عشان تفضل ف الضمان....و اول صيانه 1000 كيلو.......
عموماً العربيه زى الفل...و العيوب القديمه اتلافت
نصيحه متاخدش معلومه الا من اصحاب التيجو وخصوصاً 2011 لأن العيوب فيها تم تلافيها...
ولازم تسأل حد عنده 2011 وعمل بيها 90000 كيلو مثلاً....

رد: رجاء المشاركة من اصحاب السيارة اسبيرانزا تيجو
 

حضرتك عندك حق فى إن ناس كتير بتقول رأيها بالرغم من عدم التجربة
أنا معايا تيجو 1600 موديل 2011 من حوالى سنة عاملة 19000ك وزى الفل
العيوب اللى حضرتك ذكرتها موجودة فعلا وده شئ عادى واحب اضيف للعيوب الاستهلاك العالى نسبيا للبنزين بالإضافة إلى التسارع البطئ خصوصا على الغيار الأول والثانى نظرا لثقل السيارة وكبر حجمها بالنسبة لحجم الموتور.
وإذا كنت من الناس اللى سواقتهم هادية مثلى فيبقى العيب الأخير مايهمكش
وعايز اضيف كمان إن موضوع تربيط العفشة ده شئ عادى جدا فى كل السيارات العالية عن الأرض ومش بدعة يعنى فى التيجو
ومن أهم ميزات التيجو إنها مسمعة كويس جدا فى السوق وسعرها كويس عند إعادة البيع مع إن فى سيارات تانية يابانى زى النيسان سعرها سئ جدا عند إعادة البيع
أخيرا أحب أقولك إن دى أول مشاركة ليا فى المنتدى رغم متابعتى له من أكثر من سنة واللى خلانى أرد هو شعورى بحيرتك التى كنت أعانى منها من حوالى سنة قبل أن يوفقنى الله لشراء تيجو1600 بالإضافة للإفتاءات الكتير اللى موجودة بدون تجربة لمجرد إن السيارة صينى

رد: رجاء المشاركة من اصحاب السيارة اسبيرانزا تيجو
 

لما حضرتك واخد قرار وهتجيبها وبتقول اننا بنفتي بدون تجربه وكا أن قرصتنا عقربه اننا سمعنا سيره الصيني طب بتسأل ليه ما تشتري علاطول وسوف تدور الايام ويديك طوله العمر وتعرف بعد 5 سنين كده يعني ايه عربيه صيني تحياتي

رد: رجاء المشاركة من اصحاب السيارة اسبيرانزا تيجو
 

استاذ تامر انا مش قصدى حد بعينه والله انا بتكلم بشكل عام وبعشم حبتين لما لاقيت الناس هنا متعاونة ومحترمة انا كنت بس بحاول استشير اكبر عدد من الناس لانى لسة حيران جدا عشان هجيب العربية بقرض من بنك CIB والقسط اللى اقدر ادفعه ميجيبش عربية باكتر من 86000 وده مخلى مساحة الاختيار محدودة جدا عموما شكرا جدا لمشاركتك واسف لو الكلمة ضايقتك مش قصدى بجد