مصر موتورز مجتمع السيارات - مقارنة بين تويوتا2007 والانسر البومة 2008

اهلا و سهلا بيك في منتدانا و نتمني تكون عضو دائم:)
اسف لتاخر الرد بس يمكن ميكونش حد شاف الموضوع او معندوش فكره.
بص يا سيدي انا ركبت الكورولا 2007 لمسافات طويله و اللانسر 2008 البوما برضه

الكورولا ال2007:
عربيه ياباني و تقفيلها محترم جدا و خامتها الداخليه معقوله نسبيا و موتور 1300 او 1600 ولا اروع من كده
تكييف رائع و قطع غيار متوافره و ماسكه سعر في السوق و مش بتقع لانها اخر موديل ياباني و الناس حبتها
لو ركبت الكورولا ال 2007 نضيفه حتعرف يعني ايه عربيه ناعمه و تويوتا مركزه اوي علي حكايه النعومه دي في كل حاجه
لدرجه ان مسوجر الباب الداخل حتلاقيه ناعم جدا رغم وجود سنتر!!!!!تخيل بقي النعومه عامله ازاي في العربيه دي.
اللي مش بيعجبني فيها ثباتها علي السرعات العاليه بعد ال120 بيبقي ثباتها ضعيف و بتسمع صوت الهوا جامد جدا من بعد ال 100 يمكن دي اكتر نقطه مش عاجباني في الكورولا .

اللانسر 2008:
عربيه كشكل متفوقه من الامام لكن من الخلف الكورولا اشيك
عربيه اعتماديتها عاليه و ناعمه بس مش نفس نعومه الكورولا قعدتها مريحه عن الكورولا بكتير
و تابلوها اشيك من الكورولا و قطع غيارها متوفره ايضا و اسعارها معقوله و اهم ما فيها ثباتها علي الطريق
اثبت من الكورولا بكتير .
نقط الضعف في نظري ان سحبها سئ لو 1300 يعني الكورولا تطلع منها لو الاتنين 1300 بسهوله.
و ال1600 سحبته مش حلوه اوي و التكييف بتاعها مش بقوه تكييف الكورولا اقل منه حاجات بسيطه.
و العربيه اللي جربتها كانت 2008 و 30 الف كيلو يعني تعتبر جديده.
..............
رأيي الشخصي
لو اغلب مشاويرك في المدينه هات الكورولا
لو غاوي سفر و دايما بتجري بالعربيه هات اللانسر