مصر موتورز مجتمع السيارات - هيونداى افانتى .... ايه معلومات عنها ؟

طبعا الرد متأخر جدا بس والله اول مره الاحظ الموضوع ..

بالنسبة للأفانتى اولا ما هى الا هيونتداى النترا استيراد من كوريا علشان كده بتيجى باسم افانتى .. وده اسم جميع موديلات النترا فى كوريا ..

العربية معايا من فتره كبيره (5 سنوات) وما شاء الله عربية جميله جدا جدا .. هى منتشره فى بورسعيد بس ونادره بره بورسعيد (انا اقصد الشكل من موديل 96 - 97 والفيس ليفت 98 - 2000) .. اما الافانتى او الالنترا 2001 -2004 دى منتشره عادى ..

قطع غيارها متوفره جدا ورخيصة فى بورسعيد ولكن اعتقد بره بورسعيد مش متوفره اوى .. ولكن الموضوع مش ازمة لان العربية معظم قع غيارها زى الفيرنا .. يعنى تيل الفرامل والعفشة معظمها نفس القيرنا واجزاء كتير فى الموتور .. اللى حابب يجيبها ووجد حالة نضيفة انا شايف انها فرصة لانها عربية جميلة وفخمة وسعرها مناسب جدا .. وقطع الغيار اللى ممكن تبقى صعبه او قليلة مرميه بالهبل فى بورسعيد وباقل الاسعار .. الحمد لله قطع غيار العربية هى اخر همى ...

بالنسبة لمميزات العربية واسعه ومريحه جدا من جوه .. الصالون شيك والكراسى تصميمها جميل
العربية ثابته جدا على الطريق .. يعنى انا بسافر بيها مش اقل من 140 وثباتها رائع مع العلم ان العفشة استاندرد ومفيش اى تعديل عليها وجنوط 14 فبريكه .. وانا شايف ثباتها اعلى من اللوجان على السرعات ..
تكييفها تلاجه بمعنى الكلمه اعلى من تكييف الهوندا سيفيك عن تجربة وبشهاده ناس كتير .. واعلى بكتير من تكييف اللوجان .. (الكورى عموما معروف ان التكييف فيه قوى) ..

اللى معايا 1500 cc والعربية ليها مكنه 1600 و 1800 و 2000 ومتوفرين بكثره فى بورسعيد وخصوصا الـ 1500 و ال 2000 ..

وانا بالفعل ناوى اسقط فيها مكنه 2000 cc وابقى اشيلها وقت الفحص .. موجوده وكنت هاخدها بحوالى 1500 جنية من ناس معرفه .. بس مستنى افوق من السمكره والدوكو ..

باذن الله هحاول اعمل موضوع مصور عنها قريبا علشان تبقى مرجع للناس اللى بتحب العربية دى ..