استفسار للخبراء (عند النقل على وضعية D )
 

السلام عليكم يا شباب

أرجو ان تكونوا جميعا بخير و بصحة جيدة

عندى استفسار بس بعد اذنكم

انا عربيتى كابريس 2004 LTZ و هى دفع خلفى

لما آجى انقل الفتيس من N إلى D بحس ان العربية نزلت لتحت (يعنى وطيت )

و لما أنقل من N إلى R العربية بتترفع شوية (بتعلا)

و لما ارجع النقل ترجع لطبيعتها تانى

و عرفت ان ده عادى و ان كل الكابريس و اللومينا كدة

و ده ماكنش بيحصل فى المرسيدس اللى كانت معايا قبل كدة و كانت جر خلفى برده

بس انا بصراحة مش فاهم ده بيحصل ليه ... هل دى ديناميكية معينة فى عمل الجير بوكس

ولا ليها علاقة بنظام التعليق و لا ايه بالظبط

و انا دورت شوية على النت بس ماوصلتش لسبب منطقى

فا يا ريت لو اى حد من الاخوة الافاضل عنده فكرة عن الحكاية دى يقولنا ايه السبب

وشكرا مقدما لحضراتكم .

رد: استفسار للخبراء (عند النقل على وضعية D )
 

الكلام ده بيحصل مع بدايه الحركه و لا العربيه لسه ثابته في مكانها

لو مع بدايه الحركه فده طبيعى نتيجه انتقال او اعاده توزيع الوزن
يعني مع بدايه حركه العربيه لقدام ... الوزن بيزيد على العجلات الخلفيه و يقل على العجلات الاماميه فتوطى شويه من ورا و تعلا شويه من قدام
والعكس مع المارشيدير
فاللي بيحصل نتيجه الانتقال المفاجئ لمركز الثقل ان العربيه تعلامن ناحيه و توطى من التانيه و بعدين تاخد وضعها الطبيعي مع المشي الا اذا كان في استمرار في التسارع القوي
و ده سبب ان عربيات الدفع الامامي لما تطلع بسرعه ( تفويت او تفحيط ) بيبقى تماسكها ضعيف جدا بالطريق و بتفتقد للتحكم نتيجه انتقال الوزن للعجلات الخلفيه
علشان كده العربيات الرياضيه بمواتير قويه او العربيات التقيله الضخمه بيكون دفعها خلفي

ومعتقدش ان ده له علاقه بنوع الفتيس ... على اد ما له علاقه بعزم الحركه او سرعه الانطلاق

عموما الامريكاني تعليقه ناعم .. وياخد و يدي ... علشان كده تلاقي العربيه في المطبات تفضل تعلا و توطى علشان تحقق الراحه ...
بعكس الالماني بيبقى تعليقه ناشف شويه ... و فيه تحس بالمطبات عن الامريكاني
وغالبا ده سبب انك محسيتش بيه في المرسيدس و حسيت بيه في الكابريس


اتمنى اكون افدتك ...
لأن لو الموضوع ده و العربيه ثابته يبقى كل اللي قلته ملوش لازمه
بس هو عموما كلام مفيد يعني ptmnlo123per1127

رد: استفسار للخبراء (عند النقل على وضعية D )
 

ألف شكر يا سعادة الباشا على مشاركتك اولا

وعلى الكلام المفيد فعلا ثانيا :)

بس للأسف اللى بيحصل بيكون و العربية ثابتة ... قبل ما اتحرك بيها خالص فاهو مرتبط بنقلة الجير مش حركة العربية

فا مش عارف بصراحة تفسيره ايه

رد: استفسار للخبراء (عند النقل على وضعية D )
 

حد يناديلنا المهندس يونس يا رجالة

رد: استفسار للخبراء (عند النقل على وضعية D )
 

ياباشا الكلام ده طبيعىجدا جدا ماتقلقش