كل الى بنشوفه و نسمعه عبارة عن ماضى !!
 

فعلا كل الى بنشوفه و نسمعه ده حصل فى الماضى مش دلوقتى حالا !

يعنى احنا علشان نشوف اى حاجة الضوء المنعكس منها لازم يوصلنا و الضوء ده ليه سرعة محدودة هى صحيح كبيرة جدا جدا بس فى الاخر محدودة و تقدر بالتقريب ب 300 الف كيلومتر / الثانية ( بمفهوم العربيات تبقى مليار كم / س ) يعنى علشان نتخيل سرعته لو عايز تسافر مسافة 300 كم ( تقريبا زى من القاهرة لمارينا مثلا ) لو مشيت بسرعة الضوء حتوصل فى جزء من الالف من الثانية او بمعنى اخر لو مشيت بالسرعة دى لمدة ثانية واحدة فقط ممكن تعمل المشوار ده 1000 مرة !
طيب بالتالى كل ما اى شىء كان بعيد عننا اكتر كل ما الضوء احتاج وقت اكتر علشان يوصلنا
امثلة :

1. القمر : الضوء محتاج 1.3 ثانية علشان يقطع المسافة من القمر للارض يعنى القمر الى احنا بنشوفه دلوقتى ده القمر من ثانية و تلاته من عشرة ثانية فاتوا مش القمر دلوقتى حالا
2. الشمس : الشمس الى بنشوفها ده مشهد من الماضى تقريبا من 8 دقايق فاتوا يعنى مثلا لو الشمس حصلها حاجة دلوقتى ( فرقعت مثلا ) مش حنشوف الحدث ده الا بعد ما يمر عليه 8 دقايق معقبال الضوء بتاع الحدث ده يوصلنا
3. بالتالى الخلفية الكونية الى بنشوفها بالليل سواء بالعين المجردة او بالتلسكوبات بتبقى خليط من ازمنة مختلفة بتتراوح ما بين 4 سنين فى الماضى ( أقرب نجم لينا بعد الشمس ) الى عشرات السنين فى الماضى الى مئات بل الاف بل ملايين حتى نصل الى حافة الكون المدرك 13 بليون سنة فى الماضى

يعنى من الاخر ممكن نجوم كتير من الى احنا شايفنها تكون انفجرت و اختفت من ملايين السنين بس احنا حنفضل شايفنها الى ان يصلنا مشهد انفجارها
و العكس فى ملايين النجوم ولدت و احنا لسة مش شايفنها و حنشوفها لما مشهد اشتعالها بالحياة يصلنا

قال تعالى : (فَلا أُقْسِمُ بِمَوَاقِعِ النُّجُومِ وَإِنَّهُ لَقَسَمٌ لَوْ تَعْلَمُونَ عَظِيمٌ) (الواقعة:76، 75 )

بالتالى علميا لو اتنين واقفين قدام بعض بيتكلموا فكل واحد شايف التانى فى الماضى بس بأجزاء صغيرة جدا من الثانية لا يدركها المخ

اما الصوت فده ابطىء بكتييييييييييييييير من الضوء يعنى سرعة الصوت تقريبا 340 متر / ث ( بمفهوم العربيات 1230 كم / س ) و ممكن نسبقه بطيارة مثلا
فعشان تقارن بين سرعة الضوء و سرعة الصوت كأنك بتقارن ما بين سرعة صاروخ و سرعة قوقع بيزحف لان سرعة الضوء حتبقى 300 مليون متر على الثانية مقارنة ب 340 متر على الثانية
يعنى سرعة الضوء اد سرعة الصوت 880 الف مرة تقريبا
و ده يفسر انك تشوف حاجة بعيدة بتخبط جامد و بعدين تسمع صوتها
و زى البرق مثلا المشهد بيوصل الاول بعدين صوت الرعد بيجى بعده بفترة على حسب مسافة الصاعقة

شكرا على حسن صبركم و ارجوا ان محدش يقول عليا مجنون
انا قصدى ان الموضوع ده يبقى زى مقدمة لمواضيع رحلة لاعماق الكون

و الله اعلى و اعلم

رد: كل الى بنشوفه و نسمعه عبارة عن ماضى !!
 

رد: كل الى بنشوفه و نسمعه عبارة عن ماضى !!
 

موضوع شيق - انا كنت عارفه لكن لما قرأته باسلوبك كان ليه طعم متميز و مشوق

شكرا

رد: كل الى بنشوفه و نسمعه عبارة عن ماضى !!
 

الله يباركلك ايها ( الفرعون الشاب ) و الله شجعتنى ان اعمل مواضيع متعمقة اكتر كنت داخل و خايف الائى حد بيقولى ايه الى انت كاتبه ده

دى شهادة اعتز بيها يا باشا و الحمد لله ان مش لوحدى
كده حلاقى حد يشجعنى على الى جى

رد: كل الى بنشوفه و نسمعه عبارة عن ماضى !!