اشتريت لانوس مستعمله وعاوز نصائح من اهل الخبره
 

السلام عليكم

بدايه انا متابع للمنتدى من زمان و استفدت كتير من مشاركات الاعضاء

الحمد لله انا اشتريت عربيه دايو لانوس 2006 و عامله 51000 كيلو
المشكله اني اشتريتها من معرض و معرفش اي تفاصيل عن المالك الاصلي وكنت عاوز اعرف ايه المفروض اغيره او اكشف عليه قبل ما ابتدي اتحرك كتير بالعربيه

واروح فين وهل فيه اماكن محترمه لصيانه اللانوس

ياريت اي حد يفيدني و شكرا

رد: اشتريت لانوس مستعمله وعاوز نصائح من اهل الخبره
 

الف مبروك ربنا يهبك خيرها ويكفيك شرها

بص انت تاخدها بنزينه تغسلها غسلة بضمير وتلف على العربيه بعينك من جوة وبره فوق وتحت تشوف لو حاجة مفكوكة مخبوطة ... بعدين تغير الزيوت والفلاتر وطقم بوجيهات وتبص على البطارية وتزودها لو سائلة وتغير طقم تيل الفرامل وتبص على الطنابير وتظبط الرجلاش وتسحب هواء ويراجع على تربيط العفشة وكل ده تعملة عند ميكانكى كانها صيانة 50 الف

رد: اشتريت لانوس مستعمله وعاوز نصائح من اهل الخبره
 

ألف مبروك تتمتع بيها فى العافية

أهم حاجة طبعا سير الكاتينة والبليتن بتوع السير

ولو معاك فلوس غير زيت الماتور كمان.. الحاجتين دول اهم حاجة دلوقتى...

أما لو عاوز سرفس كامل يبقى تغير سير الديناموا والتكيف والبور،، وكمان زيوت الفتيس والبوجيهات وتشيك على نسبة زيت البور والفرامل .... وتحرق على العفشة وتشوفها لو فى حاجة.

رد: اشتريت لانوس مستعمله وعاوز نصائح من اهل الخبره
 

تمام يعنى كده شغل %100
ومبروك هى عربية حلوة ان شاء الله تريحك

رد: اشتريت لانوس مستعمله وعاوز نصائح من اهل الخبره
 

اجري بيها علي اقرب عفشجي و خليه يشوفلك العفشة و الشاسية من تحت .. انا عربيتي كشفت عليها ميت مرة قبل مااشتريها سمكري و بوهيجي وميكانيكي وبعد ماخلصت فيها الاقي الشاسية ملحوم !! رغم انها مش عاملة حادثة خالص و السمكري و البوهيجي اكدولي بس اللحام كان باين علي انه شحم و شكل الحيوان اللي كان معاه العربية كان اكيد واخد مطب او غطا بلاعة من تحت .. والله يسامحة بقي و العربية علي كل حال تمام وعموما اهم حاجة تشوف الشاسية من تحت