حان الوقت للاستفادة من آراء خبراء الصيانة فى المنتدى ....
 

السلام عليكم ورحمة الله ...


انا معايا هيونداى افانت 1997 زى ما كتير عارفين ..

والافانت دى هى الالنترا 1997 بس كورى (استيراد) ..

والعربية 16 صباب 1500 cc و اتوماتيك .....


العربية حالتها تعبانة شويتين ومحتاجة حاجات كتير وبصراحة اكتر انا بقالى فترة مهمل فيها جدا ودلوقتى حابب اصلح غلطتى ههههههههه .. وطبعا لا خاب من استشار ...

فعاوز اخد ارائكم فى الحاجات اللى فيها والتكاليف وكله علشان هبدأ اشدها اول ما اخلص امتحانات باذن الله ...


هبدأ بالمشاكل اللى فيها من الاهم فالمهم :

اولا الفتيس الاتوماتيك :

الفتيس عندى فيه مشكلة .. هو نقلاته كويسة .. ولكن مشكلته فى حاجتين :

لما باجى انقل من N الى D بيتأخر حوالى ثانيتين علشان يعشق وتبدأ العربية تمشى .. وده طبعا بيعمل مشكلة لما بكون فى حته زحمة او اشارة او بركن او او ... دى حاجة ..

المشكلة التانية ودى الاهم .. لما العربة بتكون سخنة (فى درجة التشغيل العادية) لما بكون ماشى وببدأ اهدى وبعدين ازود تانى العربية بيكون سحبها ضعيف جدا لمده من ثانية لثانيتين (واحيانا بتتاخر اكتر) وبعدين تنتش نتشة وسحبها يتظبط عادى ..
و الموضوع ده بيظهر اوى كل ما العربية تبقى سخنة اكتر (يعنى كل ما الجو يكون حر اكتر) ...

موضوع الفتيس ده حارق دمى جدا لدرجة بتخلينى كاره اسوق العربية ..

الموضوع ده بقاله اكتر من سنة موجود ...

زيت الفتيس كنت مغيره لما كنت بعمل طقم شنبر من حوالى سنة ونصف وبقاله دلوقتى حوالى 10000 كيلو .. بس ساعتها الميكانيكى معرفش يوصل لفلتر الفتيس وانا كنت خلصان ماديا وجسديا من موضوع العمره دى فكبرت دماغى على امل تغييره بعدين ...

انا عندى احساس جامد ان المشكلتين بتوع الفتيس دول سببهم واحد .. فيا ترى العيب ده منين ؟؟؟




طبعا انا عارف ان وارد تكون مشكلة تستدعى تغيير الفتيس كله .. بس انا نفسى لو الفتيس هيتغير اعدله لفتيس مانيوال ..

انا عارف ان الموضوع مش سهل .. لكن انا فعلا بدأت اكره الاتوماتيك بسبب الفتيس بتاعى ده .. وكمان انا بفضل المانيوال جدا على الاتوماتيك ..

فلو استدعى الامر تغيير الفتيس باذن الله هحاول تغييره لمانيوال ..

ايه رأيكوا فى التعديل ده .. يعنى هيحتاج تغيير ايه وممكن يتكلف كام ؟؟؟

انا عن نفسى شايف انه ممكن يكون اسهل من تحويل المانيوال لاتوماتيك ..

على اساس ان الريداتير ممكن ميتغيرش وكذلك المارش و الدينامو ...

وهيقتصر الامر على :

فتيس مانيوال

مجموعة دبرياج

بدال دبرياج

بارات وعصاية الفتيس

ممكن تغيير علبة زيت الباكم


ده اللى اعتقد انه هيتغير فى حالة عمل التعديل ده ...


دى اول واهم واصعب مشكلة فى العربية ..

فاتمنى من خبراء المنتدى ان يدلوا بدلوهم فى الموضوع ده ..


واسف جدا للاطالة ...



يتبع .........

رد: حان الوقت للاستفادة من آراء خبراء الصيانة فى المنتدى ....
 

يا باشا دا انت ياما خدمت ناس
رايى و الله اعلم ضرورى جدا تغير الفلتر و بالتالى حتغير الزيت
و ان شاء الله يبقى كويس و توفر وقت و مجهود التغيير للمانيوال

رد: حان الوقت للاستفادة من آراء خبراء الصيانة فى المنتدى ....
 

يا باشا دا واجبى تجاه المنتدى .. وكون ان ربنا انعم عليا بشوية خبرة .. يبقى تطبيقا لمبدأ "زكاة العلم اخراجه" مينفعش حد يطلب حاجة اقدر عليها واتأخر عليه ...

بالنسبة لموضوع الفتيس ..

انا فعلا شاكك فى ان السبب فلتر الفتيس .. بس انا ملاحظ حاجة مهمة جدا ..

والعربية باردة .. المشكلة التانية مش بتكون واضحة وبتبدأ تظهر لما العربية تبدأ تسخن ...

ايه رأيك يا هندسة ؟؟؟

رد: حان الوقت للاستفادة من آراء خبراء الصيانة فى المنتدى ....
 

مخبيش عليك يا حسام باشا انا دورت فى google و مش لاقى تفسير بس طالما الموضوع مرتبط بالحرارة يبقى احتمال مواصفات الزيت مش مطابقة بالاخص ان المشكلة تقريبا ظهرت بعد تغيير الزيت بفترة وجيزة فانا لو مكانك اغير زيت وضرورى فلتر و اجرب الاول و يا رب خير :14369D~149:

رد: حان الوقت للاستفادة من آراء خبراء الصيانة فى المنتدى ....
 

هى المشكلة موجودة من زمان ومن قبل تغيير الزيت كمان ..

وانا اللى خلانى اغير الزيت هو الموضوع ده ..

ولأن الميكانيكى اللى عملى النص عمره كان مش بيشتغل فى الاتوماتيك فمقدرش يفيدنى فى الموضوع ...

بصراحة انا شاكك فى تبريد الفتيس .. بس مش عارف حواره ايه بالظبط ...

انا قلبت جوجل ياما فى الموضوع ده ولكن دون جدوى ..

حتى حاولت كتير اوى اجيب المانيوال بتاع العربية دى وللاسف مش لاقيه خالص ..


حاجة تهبل صح ؟؟ هههههههههههه


انا استعملت زيت موبيل اللى هو العلبة اللتر ام 18 جنية تقريبا .. يعنى زيت كويس ..

طيب متعرفش يا باشمهندس احمد سعر فلتر الاتوماتيك كام ؟؟ او فى رينج كام ؟؟ وتغييره ازاى ؟؟؟

لانى بصراحة محتار فى طريقة تغيير الزيت والفلتر الصحيحة .. ومش عاوز حد يفتى عليا او يشتغلنى ...

والف شكر يا احمد باشا على آرائك الجميلة .. ربنا يجعلها فى ميزان حسناتك يا رب ...