|
محتاج مشورة منكم بالله عليكم بخصوص اسبرامزا a113
بسم الله اولا انا العربيه دخلت دماغى لعده اسباب الاوبشن اللى فيها اللى لو لقيته فى عربيه تانيه هيبقى ضعف السعر تقريبا وكمان علشان السعر وانا راجل ممكن اوفر المبلغ بتاعها فقط وقلت بدل ما اخش فى موضوع القديم ووجع دماغه فخلينى فى الاسبرانزا افضل المهم دخلت القسم هنا لقيت شكر جامد فيها اوى دورت على واحده مستعمله وبالفعل لقيت واحده ودى مواصفاتها كامله مانيوال 1300 بره وجوه موديل اخر 2008 ماشيه 60 الف كيلو والحاله العامه جيده جدا الراجل بكل امانه قاللى ان فيها عيوب صناعه زى اى عربيه من الموديل ده وهيه العفشه خشنه شويه والغيار بيعض فى التالت واسبوع فقط واتعود عليه وقاللى ان صوت الماتور عالى شويه فى الكابينه عن اى عربيه تانيه فى نفس الموديل بس مش عالى اوى يعنى بسيط المهم العربيه مش متهانه والراجل طالب فيها من الاخر 30 الف بالله عليكم بما انكوا خبره فى العربيه دى ايه رايكوا فى الموضوع كله وانا صراحه مش كل يوم هغير يعنى هجيب ومش مستعد انى اخسر فيها او فى بيعها 1- ايه رايكوا فيها وحالتها وسعرها 2- ولو عايز اغير مساعدين علشان موضوع الخشونه ده الجوز الاصلى بكام 3- وهل فعلا قطع غيارها موجوده بره التوكيل بس اصلى؟ وهل فى حل لعضة الفتيس دى؟ واسف جدا جدا جدا للاطاله بس بجد ملقتش منتدى فيه تفاعل زى هنا |
رد: محتاج مشورة منكم بالله عليكم بخصوص اسبرامزا a113
اولا اهلا بيك يا elmashtoly99 عضوجديد فى اسره مصرموتورز الكبيره والجميله و انا هتكلم فى نقط محدده وان شاء الله اقدر افيد حضرتك :
- الأسبرانزا عموما من الموديلات اللى نجحت فى وقت قصير جدا انها تثبت جدارتها فى السوق المصرى وتنافس مع شركات كبيره وعريقه ولها باع طويل فى نفس الوقت وترتب على ده ان بدأ يكون ليها انتشار كبير جدا وبالتالى ليها سوق فى اعاده البيع وبقى فى استهلاك لقطاع كبيير جدا من المصريين واصبح قطع غيارها موجوده بكثافه وكثره وبالتالى فجزئيه قطع الغيار دى متقلقش منها خالص لأنك هتلاقىها كتييييييييييييييييييييييي يييييييييييييييييير جدا - ال113 من انجح موديلات اسبرانزا وانا ركبتها مع واحد صاحبى وسوقتها كتيير اوى وهى عربيه ماشاء الله عليها حاجه جميله جدا جدا وانا لومكنتش جبت ال516 عشان عائلتى كنت جبت ال113 ليا والمشاكل اللى فيها بتتحل بسهوله سواء فى التوكيل اوبره التوكيل وبقى فى حلول لعضه الفتيس والعفشه الناشفه ومش شرط يكونوا المساعدين بايظين عشان كده العفشه ناشفه دى حاله عامه فى جميع موديلات اسبرانزا يعنى حاجه ميتقلقش منها . - انا عامه لا افضل المستعمل اوكسر الزيرو فياريت لو حضرتك قدرت تدفع المبلغ اللى معاك فى واحده زيرو و تقسط الباقى يكون افضل ليك كتيير بحيث تكون اول واحد ركب العربيه ومش قلقان من اللى كان قابلك عامل فيها ايه اما لو حضرتك ناوى تشترى المستعمله دى فياريت تتأكد مها كويس اوى عن طريق واحد ميكانيكى فاهم فى الأسبرانزا وعارف فيها عشا متندمش بعد كده لاقدر الله واى استفسار انا تحت امر حضرتك |
رد: محتاج مشورة منكم بالله عليكم بخصوص اسبرامزا a113
اقتباس:
اولا اهلا و سهلا بيك يا غالي ونورت بيتنا العزيز بالنسبه للعربيه دي تحديدا فهي عند اخويا و عربيه ماشاء الله عليها فعلا تستحق فلوسها بالنسبه للمستعمل فانا مبحبش المستعمل بوجه عام وليس تحديدا في الاسبرانزا اما لو استقريت عليها فنصيحه تفحص العربيه لابعد حد وخد بالك اوي اما في عيوبها فدي مهياش عيوب ولا حاجه حل خشونه العفشه الاول تحط في الكاوتش نيتروجين بدل الهوا ولو لسه مش عجباك هتغير جلبه المساعد ودي ب 10 جنيه ولو لسه برضو فتغير المساعد كله وعندك حل من اتنين يا اما تجيب نفس المساعد بتاع العربيه او تجيب مساعد من عربيه تانيه موديل تاني توفقه فيها وهتلاقي بالنسبه لعضه الفتيس ممكن يكون زيت الفتيس عايز يتغير او الغوايش عايزين يتظبتو او صاحبها كان بيسوق عربيه انعم في الفتيس من الاسبرانزا بس عموما الاسبرانزا فتيسها محترم و نعومته كويسه بالنسبه لعلو صوت الموتور " شوف هو بيستخدم بنزين كام ومغشوش والا لاء " بالنسبه للسعر فهي رخيصه 5 الاف جنيه ودي اجتهادات بس عموما شوف الصيانه الدوريه واكشف عليها كويس وبالتوفيق يارب في اختيارك وربنا يديك خيرها و يكفيك شرها |
رد: محتاج مشورة منكم بالله عليكم بخصوص اسبرامزا a113
الف شكر لكل اللى ردوا ومنتظر رد
حد من الناس اللى عندها العربيه |
رد: محتاج مشورة منكم بالله عليكم بخصوص اسبرامزا a113
طبعا مش حازود حاجة على كلام اساتذتى ابو الاسعاد و باسم ، بس طبعا لو يسمحولى اقول رأى كمجرب للعربية و هى عندى بالفعل مو 2011 :
العربية بسم الله ماشاء الله جميلة جدا على الطريق و ناعمة و سحبها حلو قوى . بالنسبة للعفشة الناشفة دى حاجة عامة و موجودة فعلا فى كل الاسبيرانزا و بجد الموضوع ده ينرفز اووووووووووى . بس انا ابتديت اتأقلم معاه خلاص . اوبشنها فعلا جميلة و كتيرة و ممتعة و ماتحسش انها عربية صغيرة ب 50 الف شوف صوت الموتور عالى ازاى ؟ هل هو عالى فى السلانسيه و هى دايرة عادى ؟ ولا عالى على الطريق و انت سايقها ؟ و لو فى الحالة التانية دى هى فعلا صوتها عالى على الطريق و ده اعتقد عادى و فى كل العربيات ، حتى فى الاكسنت اللى معايا كده برده . و بعدين ده موتور 4 سلندر ، 2 كامة يعنى كبير ، يعنى مش موتور عربية لعبة مايطلعش صوت . فوضع طبيعى و هى ماشية يكون صوتها عالى . انما لو فى السلانسيه ده اللى مش طبيعى و تكشف عليها المفروض . انا شايف السعر ده قليل عليها شوية ، المفروض فعلا تكون فى حدود 35 الف او 36 . ياريت حضرتك تكشف عليها فى مركز معتمد من التوكيل . غير كده العربية ممتازة و ربنا يوفقك لما فيه الخير . |
| الساعة الآن 01:59 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017