اعلان غريب اوى
 

ببص دلوقتى فى كونتاكت كار والموقع دة بيعد الاكبر فى بيع وشراء العربيات وبيتخدمة ناس كتير
لقيت واحد عارض لادا 2105 موديل 1994 بـ 16000 جنية ومواصفاتها كالاتى
لادا 2105 موديل 1994 لون ابيض فابريكة دواخل رخصة سنة فرش جديد لاتحتاج الى مصاريف السعر نهائي السيارة تعمل بالغاز والبنزين السيارة روسي

وصراحة السعر دة قليل جدا لان سعرها تقريبا فى حدود22000 وهذا نص المكالمة بينى وبينه
بكلمك بخصوص العربية
- انهى عربية يا باشا
العربية ال لادا
- اة زى منا كاتب بالظبط وهات اى ميكانيكى معاك يتفرج عليها
طب مش شايف ان السعر قليل شوية عليها
- اة انا عامل اوكازيون عشان عاوز ابيع واخلص
بس اللى بيكون عاوز يبيع ويخلص بينزل الف اتنين انما انت نازل حوالى 5 الاف جنية
- ايوة يا باشا واتخانقت مع اخويا عشان السعر دة
طب الرخصة باسمك
- لا باسم اخويا
طب انت عنوانك اية عشان اجى اتفرج عليها
- قالى فى فيصل بس استنانى كمان يومين هاكون موجود فى العنوان دة لحسن انا مش هنا دلوقتى
وقفلت معاة السكة
عاوز بس اعرف من الاخوة الاعضاء الراجل دة ناوى على اية خصوصا فى الظروف اللى بنعشها اليومين دول
هل العربية متباعة بتوكيل وناوى يبعهالى تانى
ولا مسروقة بالرخصة ولا اية بالظبط
مستنى راى الاستاذ ايمن عبد الحميد بصفتة محامى

رد: اعلان غريب اوى
 

هوا 22 سعر عالى لان الاسعار فى السوق اقل من النت بكتير يعنى فعلا ممكن تلاقيها ب 16 و فيها شوية شغل او حتى نضيفة وصاحبها عايز يخلص انما الغاز لو سعر فبالغاز 16 سعر قليل جدا فعلا عموما انت ريح دماغك ما تاخدش ميكانيكى خد سمكرى محترف يبص على الاساسيات ويتاكد ان العربية مش قاطعة او مغيرة نص وان الدواخل فعلا فابريكة لان فيه صنايعية بيرشوا دواخل تبان اكنها فابريقة و خلى معاك واحد فاهم كويس فى الاجرائات والمرور وماتشتريش بتوكيل اعمل عقد ابتدائة ونقل ملكية واديله فلوسة بعد ما المهندس يفحص واكد على مهندس المرور انه يرخم عليك ويفلى العربية

رد: اعلان غريب اوى
 

الإستخارة ثم الإستخارة ثم الإستخارة، بتعمل عجايب والله

انا عن نفسي مبحبش اشتري عربية من تاجر، وادام بدأ معايا بكلمة "أنهي واحدة" انا غالبا بغير رأيي على طول
بس تقدر تقول دي عقدة شخصية، كل اللي عاوز اقوله ان خد بالك منو كويس ودايما حط في دماغك انو تاجر

رد: اعلان غريب اوى
 

يا سيدى السر والله اعلم ان هذة السيارة خليع تاكسى ورخصها ملاكى

رد: اعلان غريب اوى
 

فعلا زي ما قال الاستاذ علي العربية ديه اكيد كانت تاكسي واتكهنت لملاكي

لو هتروح تشوفها خد معاك ميكانيكي وسمكري واول حاجه تبص عليها رقم الشاسيه والماتور لو نفس الرقم اللي في الرخصه تروح واخده وطالع بيه علي الشهر العقاري وتعمل عقد مسجل باسمك وتديله عربون نص المبلغ وتاخده معاك في المرور ولما العربية تترخص باسمك تديله بقية المبلغ وربنا يسترها عليك لان اليومين دول الواحد بقا بيشك في صوابع ايده