|
إستفسار هام ياجماعة بخصوص جنوط الفيرنا
يا كل الفيرناوية انا كنت عامل موضوع قبل كده وكنت قايل فيه اني هغير طقم الجنط والكاوتش القديم وغيرته فعلاً وجبت طقم تاني جديد إسمه AM وشكله جميل وكل حاجة وجبته 13 وجبت مقاس الكاوتش 175/70 والمفروض ان ده المقاس الأصلي للعربية وتمام التمام المشكلة بقى ان برضو الجنط الجديد بيعمل مشكلة زي القديم والمشكلة هي إني لو ركبت في الكنبة معايا ورا 3 وجيت خدت مطب هوا أو ماشي على كوبري مثلاً أو العربية بتتهز والمساعد بياخد ويدي مع العربية بسمع صوت حكة في الرفرف والكاوتش غلبت في المشكلة دي ومش لاقي ليها حل بس هو أنا سألت اتنين جيراني معاهم فيرنا ومركبين اطقم جنوط اسبور و 14 كمان وبيقولولي انهم هما كمان بيحسوا بالحكة دي برضو ياتري الكلام ده صحيح ولا غلط وايه حل المشكلة دي لو الكلام ده مش طبيعي |
رد: إستفسار هام ياجماعة بخصوص جنوط الفيرنا
هو ده عيب الفيرنا اساسا
|
رد: إستفسار هام ياجماعة بخصوص جنوط الفيرنا
بص يا باشا هو مش عيب الفيرنا ولا حاجة ,هو ده بيحصل فى اى عربية بتجنط وبعدين حد يركب معاك ورا , عشان وببساطة الفراغ اللى بيبقى بين الجنط والرفرف بيقل لأن أبعاد الجنط وعرضه بيبقا غير العادى حتى لو نفس المقاس.
يبقى الحل ايه؟ انا اقولك وعلى فكرة انا عملت الكلام ده فى فيرنتى بص يا سيدى هو فى حلين اول واحد انك بتروح لسمكرى محترم ووتخليه يكسحلك ( يتنيلك ) الشفة بتاعت الرفرف لجوة ويطبعها على الرفرف بس قبل الحكاية دى تحط على الشفة دى زيت او شحم عشان متعملكش بارومة. والحل ده ممكن تبدا بيه وتشوف المشكلة هتروح ولا لأ. لو بقا لسه المشكلة موجودة يبقا تطلع على بتاع العفشة وتخليه يحطلك صدادات بس يحطلك صدادات طرية بتاعت اوبل مثلا وبكده هتنسى المشكلة دى خالص . انا كنت عامل الحاجتين دول ومريح دماغى وكنت مركب جنط 15 وكنت بركب ورا 3 وساعات 4 وكانت زى الحلاوة. ارجو ان اكون افدتك |
رد: إستفسار هام ياجماعة بخصوص جنوط الفيرنا
اقتباس:
بصراحة أفدتني جداً يااحمد وألف شكر ليك على ذوقك وأدبك وإسلوبك اللي زي العسل بس انا كان عندي إستفسار تاني كده لو تنيت شفة الرفرف زي مابتقول السمكري بيتنيها بشاكوش ولا بكماشة ولا أيه وياترى لو كنت عايز ارجعها تاني هل ممكن ترجع لطبيعتها ولا كده الرفرف شكراً وكمان موضوع الشحم أو الزيت اللي انت قولتلي احطه عشان الباروما وكده هل في نوع شحم أو زيت معين وهل لو غسلت العربية بعد كده هحط شحم تاني ولا أيه بالظبط معلش أنا تقلت عليك بس اعذرني لأن الحاجات دي مش فاهمها |
رد: إستفسار هام ياجماعة بخصوص جنوط الفيرنا
اقتباس:
أه بيتنيها بشاكوش ومبيبقاش باين اى حاجة وطبعا لو عايز ترجعها تانى بتتفرد تانى وبترجع زى الاول عشان هى محملة مش خفيفة. وبالنسبة لموضوع الزيت او الشحم, عادى اى نوع مش هتفرق وطبعا مش كل ما هتغسل هتحط بس كل فترة كده إبقا شوف الاخبار ايه ولو احتاجت حطلها تانى مش هيخسر . وانا تحت امرك فى اى وقت لو عايز تسأل فى اى حاجة.:14BFD8~148: |
| الساعة الآن 11:22 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017