مصر موتورز مجتمع السيارات - فرامل اللادا

اقدم لكم هذة التجربة الحديثة مع فرامل العربية ، العربية بتشد شمال مع الفرامل لكن فى الطوالى تمام يعنى العفشة والزوايا تمام بعد الكشف عليهم ، روحت للميكانيكى نشوف الحكاية قالى غير التيل ( على فكرة كان لسة راكب طقم جديد ايطالى) غيرتة بطقم مصرى ماركة تراكس ب 35ج ، والحقيقة اتظبت شوية بس لما التيل طبع مع الطنابير بدأت تشد تشد تانى بس على خفيف ، رحت مع نفسى حليت الطنابير قدام لقيتهم مخروطين قبل كدة روحت المخرطة قاللى لا انصحك لأنها هتبقى خفيفة وممكن تلف ( تتعوج) قلت ريح نفسك واشترى طنابير جديدة لقيت 3 انواع روسى ( مضروب ب 145ج) وايطالى والمانى ب 175ج والحقيقة اخترت الالمانى نظراً لاحترامى لصناعتهم وركبتهم وبعدها لقيت الفرامل احسن طبعاً ولكن : مازالت بتشد شمال ؟؟؟؟؟؟؟؟؟؟
فقررت اعمل تجربة بنفسى قمت رافع العجلتين قدام وبدأت الف كل عجلة لوحدها ، ولاحظت ان الشمال اتقل فى الحركة من اليمين ، ففهمت علطول ان صامولة البلية الشمال مزنوق عليه وبالتالى حركتها اتقل ويترتب على ذلك سرعة استجابتها للفرامل ، فقمت مهويها تهوية بسيطة لا تؤثر على استقامة لفة العجلة وقمت متيلها ( زنبها بلغة الصنايعية) ولفيتها بقت نفس خفة اليمين وطلعت جربت العربية لقيتها اخيراً اتظبتت لا يمين ولا شمال ، وحمدت ربنا لأنى كنت ناوى اغير الاجهزة نفسها بعد ماغيرت الخراطيم والتيل والطنابير ...................، وعجبى:playing_music: