مصر موتورز مجتمع السيارات - الشهيد " أحمد بسيوني " كان زميلي

السلام عليكم ورحمة الله وبركاته
مش عارف أبتدي منين ، بس الموضوع إن الشهيد أحمد بسيوني كان زميلي في الكلية " تربية فنية " , وكان أول أو تاني دفعة أدرس ليها أول ما إتخرجت وإتعينت معيد في الكلية ، وكان شخصية هادية جدا جدا ، وفنان الي أبعد مدي ، وعلي أد خبرتي وقتها لكن توقعت ليه مستقبل باهر وعظيم ــ وقد كان ــ وإتعين في الكلية ، وإتعرف بالطيبة وسماحة الخلق والعلم الواسع ، ومكانش بيبخل علي أي حد بمعلومة ، وكان بيعتبر الطلبة دول إخواته الصغيرين ، دايما كان صوته هادي وواطي ، ومركز في شغلة ، كان هوه قسم غيري بس كنا بنشوف بعض علي طول .
أد إيه حزنت وعيطت عليه كتير لما عرفت إللي جري له لإني ماكنتش متوقع إن هذا الشخص بالمواصفات ديه والهدوء ده فيه جواه وحش كاره للظلم والقهر ، وعمل إللي غيره ماقدرش يعمله ، ويمكن أكتر حاجة كانت مأثره فيه إن ليه طفلين ، لسه صغيرين ، نصيبهم في الدنيا إنهم يعيشوا من غير أب ، لكن ده وسام شرف علي صدرهم يفخروا بيه طول عمرهم .
حسيت بالعذاب وبكيت لما شفت أبوه وهوه بيتقبل العذاء فيه وبيبكي بحرقة عليه ، حسيت وقتها يعني أيه أب يشوف إبنه متشال علي الإكتاف أدام عينيه ، ودعيت ربنا يصبر أهله عليه همة وزوجته وأولاده .
أد إيه كنت حاسس بالأسي عليه وحزين علي فراقة ، وأد إيه كنت حاسس بالفرحة ليه علشان مات شهيد وبقي في الجنه ، حسيت إنه رفع راسي وراس كل واحد مصري ليه كرامة وعزه ، ورفع راس كل واحد كان يعرفة أو زميل ليه في الكلية أو حتي طالب كان بيدرس له ، ياريت ندعي ربنا يتغمده في فسيح جناته ، ويصبر أهله وأبوه وأمة وزوجته وأولادة ، ويسكنة مع الشهداء والبرره والصالحين ، الفاتحة .