8 اختلافات تميز الميكروباص فى بورسعيد عن باقى محافظات مصر ..
 

كتير من الناس بيقولوا على بورسعيد " جمهورية بورسعيد " مش محافظة بورسعيد ...

لانها بالرغم من انها من اصغر محافظات مصر لكنها دايما مختلفة عن باقى محافظات مصر ..


وطبعا الميكروباصات الاجرة (السيرفيس او المشروع) كان ليها نصيب كبير فى الاختلافات دى ..

فاحلى حاجة الميكروباصات الاجرة هنا فى بورسعيد .. شغالة بنظام مختلف عن مصر كلها ...

اولا الباب الجرار بيكون مفتوح طول الوقت وغالبا السواق بيربطه بكاوتش عجلة جوانى قديم او يزنقه بشبشب ههههههههه

ثانيا ممكن لو مفيش مكان تتشعلق ع الباب وده شئ عادى جدا وممكن 3 يتشعلقوا فى الباب مع بعض .. ولما تشاور لميكروباص مليان وحابب يسألك هتتشعلق ولا لأ يشاورلك بايده (اى حاجة) او انت تشاورله بايدك (نفس الاشارة) .. والاشارة دى بهز الايد اليمين بشكل دائرى كانك بتقول لحد على حاجة معينة (اى حاجة والسلام)

ثالثا ممكن زبون ينزل وبعدين انت تنزل بعديه ب 10 او 15 متر والسواق ميقدرش يتكلم ولا يفتح بقه ..

رابعا مفيش حاجة اسمها تباع هنا والسواق هو اللى بيحاسب بنفسه (ودى شغلانه كبيره وخصوصا مع الفضه) 444546 ..

خامسا الطبيعى فى بورسعيد انك تدفع الاجرة بعد لما تنزل مش وانت جوا زى بقيت محافظات مصر .. تقوله على جنب يا اسطى .. تنزل تمد ايدك من الشباك بتاع الراكب للسواق تديله الاجرة وتاخد الباقى ..

لو ممعكش فكه وقاعد ورا تقوله "واحد من عشرة معاك ياسطى ويقوم هو محضرلك الباقى وباعتهولك وبعدين ياخد العشرة جنية (شوفتوا الاحترام) ...

سادسا الاجرة موحده 50 قرش ومتفرقش لو نازل بعد شارعين او نازل فى اخر الخط ...

سابعا مفيش نظام المحطات وتقدر تنزل او تركب من اى مكان فى الخط براحتك عادى ودى ميزه كبيره .. ولكن فى مواقف صغيره كده غير رسميه ولكن معروف انك لو هتكمل بعدها هتدفع مواصلتين وبيبقى موقفين بس فى الخط كله ..

ثامنا 99% من الميكروباصات هنا فى بورسعيد لازم تسمع صوت تيل الفرامل بتاعها بيصفر ده شئ اساسى .. بجد والله مش بهزر شئ اساسى وده بسبب كتر الوقوف المستمر والتيلات المضروبة .....




فسبحان الله اللى جعل لبورسعيد شخصيتها الخاصة وطابعها الخاص بها ....

رد: 8 اختلافات تميز الميكروباص فى بورسعيد عن باقى محافظات مصر ..
 

رد: 8 اختلافات تميز الميكروباص فى بورسعيد عن باقى محافظات مصر ..
 

بجد دى فعلا الحقيقة
بس احب اضيف حاجة ان 90%من الميكروباصات موديلات حديثة وكتير منهم بيحط ساوند سيتم هايل
وبمناسبة الباب المفتوح فى يومين الشتا دول الى راكب فى الكرسي الى جنب الباب بيظبط جامد وبيغير لون البنطلون الى لبسة بلون الطين

رد: 8 اختلافات تميز الميكروباص فى بورسعيد عن باقى محافظات مصر ..
 

هههههههههههههههههههههههه
جامد جدا الموضوع ده يا حسام تسلم ايدك

رد: 8 اختلافات تميز الميكروباص فى بورسعيد عن باقى محافظات مصر ..
 

ربنا يحفظك يا بدر باشا وشكرا على كلماتك الرقيقة ...

هههههههههههههه عندك حق ..
ده غير شوية الهوا الحلوين اللى هياخدهم ...

حبيب قلبى يا كريم باشا ...

منور يا عسل ....