إحذروا من النصب بأوراق سليمة
 

السلام عليكم ورحمه الله وبركاته
الصراحه أنا أتنصب عليا
أيوه أتنصب عليا فى عربيه أوكتافيا 2008
فضلت أحكى لكم القصه علشان مافيش حد منكم يوقع فى نفس المشكلة
من يومين أتعرض عليا عربيه أوكتافيا 2008 بسعر 90 ألف ونزلت المبلغ إلى 86,500 دفعت 60000 وأخدت عقد بيع إبتدائى وثانى يوم كام المفروض الراجل يعمل لى توكيل لأن الرخصه سارية لغايه 2010 المهم قلت لآ أسجل عقد فى الشهر العقارى وبعدها أنقل الملكيه أحسن
ثانى يوم الصبح بدرى حاولت أطلع المخالفات من على النت كتبوا لى أن المركبه بياناتها غير صحيحه
قلقت شويه لكم قلت يمكن الموقع فيه غلط ولا حاجه
وفعلاً رحت الشهر العقارى لقيت الراجل اللى أشتريت منه العربيه جايب واحد تانى وقالى أنه صاحب العربية ومعاه توكيل من واحد قبله
شفت التوكيل لقيته شاريها برده بتوكيل من واحد قبله
وبما أننا كنا فى الشهر العقارى قلت لو فى أى شىء هيتم إكتشافه
المهم عمل لى العقد المسجل ولقيته جايب لى شهاده مخالفات أنتهت من يوم سابق يبقى لازم أطلع شهاده جديده
خلصت الشهر العقارى ورحت على المرور
أكتشفت الكارثه هناك
العربيه مالها أى ملف فى المرور والنمر بتاعتها تخص عربيه مسروقه من شهرين موديل تانى خالص
وكانت الكارثه فعلاً
الورق كله سليم التوكيلات والرخصة كل حاجه سليمه مش مضروبه
اللى كشف الموضوع أن الظابط اللى ماضى على الرخصة كان شغال من 6 سنوات يبقى إزاى العربيه دى موديل السنه اللى فاتت
الحمد لله عرفت آخد العربية وطلعت على الراجل اللى إشتريتها منها
وقلت له أنا حصل لى ظروف وعايز أرجع له العربية ويخصم 2000 جنيه شرط جزائى
وافق بس قال هيخصم 5000 جنيه قلت خلاص موافق وجاب لى الفلوس وحجز عنده 10000 جنيه لغايه ما ثانى يوم أعمل له توكيل بالبيع تانى
المهم ثانى يوم رحت له من غير ما أعمل التوكيل لآنى لو عملته هكون مشترك معاهم فى الجريمه دى
وبعد شويه سياسه أخدت منه ال10000 جنية والعقد معايا ورحت القسم عملت محضر بأنى أشتريت عربيه ورجعتها فى نفس اليوم ورحت للراجل تانى أقنعته أنه يجي معايا مجرد إمضاء بس على أنه أستلم منى العربية وكده يكون العقد المسجل فى الشهر العقارى لاغى
وفعلاً جه معايا القسم وعملنا المحضر
وكنت شرحت لمأمور القسم كل اللى حصل بالضبط
قالى خلص أنت نفسك من القصه وإحنا هنتابعه لغايه بيته ونسمك العربية ونشوف اللى ممكن نقدر عليه
الحمد لله يارب رجعت فلوسى ماعدا ال5000 جنية اللى اعتبرتهم أتعلمت بيهم درس كبير قوى
يا رجاله خدوا بالكم حتى الرخض الجديده بيتم تزورها
يعنى خلاص الدنيا أتقل خيرها ومش نافع أى شىء معاهم النصابين دول
الحقيقه وربنا شاهد وعالم الناس وقفوا معايا بشكل طيب ضباط المرور وضباط القسم بجد فى ناس فيها الخير كفايه أنهم ساعدونى أنى أسترد فلوسى والخساره القريبه أحسن من الخسارة البعيده
وبإذن الله مافى حد منكم يتعرض لمشكله زى دى
أنا فضلت يومين لانوم ولا أكل
لكن الحمد لله على كل شىء

رد: إحذروا من النصب بأوراق سليمة
 

رد: إحذروا من النصب بأوراق سليمة
 

ربنا يعوض عليك خير ان شاء الله
و شكرا على النصيحة و العظة

رد: إحذروا من النصب بأوراق سليمة
 

رد: إحذروا من النصب بأوراق سليمة
 

الحمد لله على كل شىء
وإن شاء الله ربنا يعوضنى خير
قدر الله وما شاء فعل
شكرا لشعوركم الطيب