إلى إخواني خبراء الميكانيكا: هل ممكن فعلا الكرنك يتكسر؟؟؟
 

السلام عليكم إخواني جميعا ورحمة الله وبركاته:
أنا عندي مشكلة في صوت موتور عربيتي (مازدا 323 مو 82) هي إن الموتور كان بيعمل صوت وجوجة زي ما تكون بلية بايظة كدة، المهم في الفترة إلا فاتت اهتميت وحاولت أعرف الصوت ده من إيه، فرحت لميكانيكي أول ما سمع صوت الماتور عمل مهرجان وقال لي روح للميكانيكي بتاعك، دي العربية عايز عمرة كاملة والصوت ده في الكرنك، والكرنك عايز يتخرط، ولازم تبطل تمشي بالعربية وإلا الكرنك ممكن يتكسر.
طبعا الكلام ده ما دخلش عقلي؛ لأنه واضح جدا إنه مبالغ فيه، فرحت لميكانيكي تاني، فقال لي الموتور هيفضل معاك بالصوت ده لحد لما تخرط الكرنك، بس قال لي: إني ممكن أمشي عليها، ونصحني إني أخرط الكرنك في نهاية الشتا وقبل دخول الصيف، عشان عمرة الشتا بتبقى أفضل.
لكن إلا محيرني رغم كل ده، إن العربية ما بتاكلش زيت، هو طبعا الزيت بينقص، بس النقصان البسيط إلا ما بيعديش العلامة الثانية، يعني برده بيفضل الزيت بين العلامتين.
ثانيا العربية ما بتدخنش لا دخنة زرقا ولا بيضا، ولا حتى سودا.
ثالثا: سحب العربية كويس جدا ، صحيح هي ما بقتش بتجيب 160 زي الأول، بس بأمشي بيها على 120، و130 عادي جدا.
فحضراتكم تنصحوني بإيه، أنا شخصيا عايز أتنش وكدة كدة فحص العربية كمان سنة ونص، بأقول أتنش سنة طالما العربية كويسة في المشي وما بتاكلش زيت، وأبق أعمل العمرة دي قبل الفحص، ومش مشكلة الصوت إلا بأسمعه.
فهل كلام الناس دي صح، ولا وجهة نظري أنا إلا صح، منتظر ردودكم؟ وشكرا مقدما

رد: إلى إخواني خبراء الميكانيكا: هل ممكن فعلا الكرنك يتكسر؟؟؟
 

طبعا في فرق ضخم في التكلفة بين إلا قالوا الميكانيكي الأولاني إلا عملها مشكلة؛ لأنه قال لي : إن أجرته 350 جنيه، وأجرة الخراط 500 طبعا غير الحاجات إلا هتيجي.
أما الثاني فقال هنسحب الكرنك ونخرطه، والخراط هياخد 200 جنيه، ونعمل شنبر، بس مش فاكر قال هياخد كام ولا لأ، أرجوكم تفيدوني.

رد: إلى إخواني خبراء الميكانيكا: هل ممكن فعلا الكرنك يتكسر؟؟؟
 

مفيش عمود كرنك أتكسر نهائيا معايا

حتى لما مكنه قفشت عندى كمان وبأت المكنه حته واحده

لأن عمود الكرنك بيكون قطره محمل وتخين

ممكن آه يتعوج سنه مثلا من عند ركب البيلات

أنما يتكسر ................صعبه

رد: إلى إخواني خبراء الميكانيكا: هل ممكن فعلا الكرنك يتكسر؟؟؟
 

جزاكم الله خيرا على اهتمامكم، وكنت أود أن أعرف تقييمكم للموقف، هل أطمئن طالما السيارة لا تأكل زيت، وأمشي عليها ، مع العلم أني في آخر مرة من شهر مركب بوجيهات سن طويل طبعا الكلام ده قبل الشوشرة الأخيرة دي بخصوص الكرنك، بس البوجيهات ما فيهاش أي مشكلة وما بتقطعش، وأنا أعرف إن العربية لو عايزة عمرة البوجيهات بتقطع عشان بتعرق زيت؟
فما رأيك أستاذي العزيز، أمشي عليها ولا أفك وأعمر؟

رد: إلى إخواني خبراء الميكانيكا: هل ممكن فعلا الكرنك يتكسر؟؟؟
 

اخى الكريم ملخص مشكلتك انك تعانى من تاكل فى سبايك الكرنك بالرغم من احكام الجزء العلوى الخاص بالبساتم والشمايز فنتيجة طبيعية ان البوجيهات مش بتعرق زيت ولا العربية بتطلع دخنة لكن دة مش معناة ان موتورك سليم لا عندك مشكلة ........ وانصحك بسرعة علاجها هاؤلك لية دلوقتى فى خلوص بين سبايك الكرنك والكرنك ودة هايخلى الكرنك يعمل ريجة اكبر طول ما انت بتمشي بالعربية يعنى مثلا لو فكيت الكرنك دة النهردة هاتخرط مثلا زيرو 10 اما لو فكيتة كمان شهر هاتخرط زيرو 20 وهاكذا كل ما تتنش كل اما الخوص بيزيد تانى حاجة فعلا صعب الكرنك يتكسر انما ممكن جدااااااااااااااا ان البيل لا قدر الله هو اللى يتكسر نتيجة الطرق الكبير علية بحكم ان فى خلوص بين السبيكة وعامود الكرنك ولو دة حصل لا قدر الله عليك العوض فى البلوك ما تتنش وحاول تحل المشكلة حل جزرى اللى هو مش خرط كرنك بس وانما فك الموتور بالكامل وعمل تشك كامل على كل اجزاء الموتور وانا اشك ان اللى حصل دة نتيجة ضعف طلمبة الزيت .............معلومة انا لسة جايب موتور مازدا موديل 84 بالفتيس بـ 2000 جنية من الحطابة بالقلعة وشغال كويس اوى وعلية ضمان اسبوع وكنت عملت عمرة لعربية من نفس النوع من فترة كلفتنى 2300 جنية لك الاختيار مع الاخذ فى الاعتبار بيع الموتور القديم
اسف لاطالة