مصر موتورز مجتمع السيارات - اخيرا تقرير صيانة الالف لسبيرانزا a113

السلام عليكم يا احلى اعضاء فى الدنيا دى . انا طبعا زى ما اغلبيتكوا عارفين انى و الحمد لله اشتريت اسبيرانزا 113 فى اخر شهر 9 اللى فات ده ، و بصراحة انا الفترة اللى فاتت دى معظمها كنت راكن العربية لغاية ما قطعت الالف كيلو روحت عملت الصيانة يوم الاحد اللى فات ده .
طبعا اخدت بنصيحة استاذ احمد فاروق و الاستاذ حازم شاهين بخصوص ايهما افضل تكنو سيرفس 1 او تكنو سيرفس 2 ، و انا على نصيحتهم روحت لتكنو سيرفس 2 .
و بصراحة انا قولت اجرب مع تكنو 1 دول لقيتهم مستهترين و ماعندهمش حجز يعنى الصيانة بأولوية الحضور و لقيت انسة ردت عليا قولتلها طيب خدى بيانات العربية قالتلى مش مهم انت بس قولهم انك داخل ( لفلانة ) ، فطبعا الاسلوب ده نرفزنى جدا و حسيت من اولها ان فى استهتار ، فتوكلت على الله و روحت للتانى .
علشان ما اطولش عليكوا العربية قبل ما اروح كان فيها شوية حاجات كده ، يعنى مثلا دواسة الدبرياج منخفضة اوى و تقريبا كانت عايزة تظبط الخلوص بتاعها ، العربية بعد ال 100 فيها رعشة فى الدركسيون ، الفتيس بيعض فى التانى ، الفرامل تكاد تكون منعدمة ( و ده سبب ركنتى ليها بصراحة ) ، و الموتور تقيل شوية فى السحب .
اول ما دخلت المركز استقبلنى مهندس الصيانة و كتب عنده الكلام ده كله فى ال file اللى فتحه للعربية ، و العربية خدت الرقم بتاعها و وقفت طبعا فى طابور طويييييييييييل لغاية ما جه دورها و دخلت . اول حاجة عملوها شيكوا على الفرامل كلها و رجلشوها ، و بعد كده غيروا زيت و فلتر ، و تربيط للعفشة و حطوا الموتور على جهاز بيظبطوا كده . و ظبطوا خلوص الدبرياج و ساعتها الفنى اللى كان شغال فيها قالى ان عضة الفتيس سببها دواسة الدبرياج لانها كانت معلقة تقريبا و فعلا العضة دى راحت بعد ما ظبطها .
و بعد كده دخلوها ورشة الكهرباء يكشفوا على كل الانوار و العدادات و يظبطوا كهرباء الموتور ، و دى اخر مرحلة و بعد كده العربية وقفت على الاستلام بس طبعا ده ليه كمان دور ، و روحت دفعت المعلوم و اتكلت على الله .
موضوع الرعشة اللى بعد ال 100 ده طلع ترصيص و هما للاسف ماعندهومش جهاز ترصيص ولا ظبط زوايا ، فالموضوع ده نرفزنى جدا جدا لانى كان نفسى اجرب العربية على السرعات بعد ال 120 بس طبعا العربية بعد ال 100 كلها بتشخلل .
نيجى بقى لحكمى عليها فى الفترة اللى فاتت : العربية الحمد لله غير اللى كان فيها جميلة و مريحة فى القيادة ، بس متعبة شوية فى المطبات و الطرق الغير ممهدة ، استجابتها عالية و الحمد لله . واسعة من جوة يعنى تشيل 5 بمنتهى الراحة . الفرامل دلوقتى اتظبطت عن الاول بمراحل و بقت تمسك معايا .
التكييف بصراحة لسة ماجربتهوش خالص يعنى ما اقدرش احكم عليه . استهلاكها فى البنزين انا شايفه معقول جدا ، و كمان الاوبشنز بتاعتها كويسة و كتيرة .
رأى ده على فكرة كان نفس رأى ملاك تانيين للعربية قابلتهم فى الصيانة بيشكروا فيها جدا و مريحاهم ، اللهم ماعدا عيوب بسيطة و موجودة فى اى عربية .. المركز ده بصراحة خدمته ممتازة و اللى بتقولهولهم فى العربية بيهتموا بيه و بيعملوه و ناس معاملتها كويسة بجد ..
ده رأى فى العربية و انا قولته بمنتهى الامانة و الحيادية لعل و عسى يكون الكلام ده و التجربة دى مفيدة لحد ممكن يكون عايز يجيب العربية ، لان انا قبل ما اجيبها دخلت هنا و شوفت المواضيع عن العربية و رأى الناس فيها و طبعا ده كان ليه اثر كبير على قرار شرائى ليها .. و كمان دى شهادة صريحة من مستخدم للعربية بعيدا عن المغالطات و المزايدات و طبعا ده اللى اتعودنا عليه هنا فى مصر موتورز
بس ليا سؤال صغير : هو انا لو عاوز ارفع صور ياريت تقولولى ازاى لانى ماليش فى الموضوع ده و مش عارف ارفع اى صورة للعربية ، و لكم منى جزيل الشكر ؛؛