يعني ايه المساعد جاب زيت؟ هل بيبقى الزيت عليه من بره باين؟؟
 

السلام عليكم ورحمة الله
كل سنة وانتم طيبين
اول امبارح اخدت العربية غسلتها بالكامل وخليتهم يزيتو العفشه
النهارده ببص عالعربية لقيت ناحية الكفر الشمال
العمود اللي بيبقى شايل العربية وحواليه سوسته (المساعد؟؟)
السوسته عليها زيت والعمود عليه شويه زيت كده
بس الناحية اليمين مفهاش حاجه من كده
فهلا ياترى هوا ده مايطلق عليه بأن المساعد جاب زيت؟؟
ولا ده من تزييت العفشه اللي عملوه في المغسله؟
ولو فعلا كده المساعد انتهى هل لازم اغير الاتنين الاماميين مع بعض ولا واحد لوحده؟؟
معلش استفساراتي كتيره بس عشان اول مره اتعرض لحاجه كده...

تحياتي للجميع

رد: يعني ايه المساعد جاب زيت؟ هل بيبقى الزيت عليه من بره باين؟؟
 

بص يا نجم ..

انت هتيجى ناحية العجلة اللى فيها المساعد اللى عليه زيت ده .. وتقعد تدوس على العربية جامد .. لو بتنزل معاك بسهولة واول لما تسيبها تتهز مرتين تلاته .. يبقى المساعد عاوز يتغير ..

لو بتثبت اول ما تشيل ايدك على طول يبقى المساعد سليم ..


وعموما ممكن وغالبا تكون دى اثار التشحيم وتكون مش باينه فى الناحية التانية عادى يعنى ووارد جدا ...

رد: يعني ايه المساعد جاب زيت؟ هل بيبقى الزيت عليه من بره باين؟؟
 

السلام عليكم
وانت طيب اخى الكريم اعادة الله عليك وعلى اسرتك بالخير والبركات
نعم اخى الكريم كدة المساعد فعلا تلف وانصح بتغيير الاتنين مع بعض عشان لو غيرت واحد الحمل كولة هايكون على المساعد الجديد مما يعجل بتلفة انما لو الاتنين مع بعض كدة الحمل والصدمات بتتقسم على الاتنين
على فكرة ما فيش حاجة اسمها تزييت العفشة فى حاجة اسمها تشحيم العفشة وتربيط العفشة اى زيت بالمزيتة يتحط على جزء متحرك من اجزاء العفشة ملهوش اى لزمة بالعكس ممكن يكون مضر لانة بيلم تراب ويبوظ الحاجة انما التشحيم السليم بيكون نزع كاوتش التراب الموجود على المقصان او الكبالن وملؤة بالشحم وتغطيتة تانى او لو فى مشاحم للعفشة بيتم التشحيم منها

رد: يعني ايه المساعد جاب زيت؟ هل بيبقى الزيت عليه من بره باين؟؟
 

هجرب ان شاء الله وانا نازل الجامع حالا وربنا يسهلها ان شاء الله

كلام حضرتك جميل جدا بخصوص التشحيم لكن للاسف انا حتى مأخدتش بالعربية اي مطبات او حاجه تبوظ المساعد لكن عموما هستنى بس الناس تفتح واحاول اروح اكشف عليهم وربنا ييسر الاحوال

وسؤال فعلا متجاوبش هل فعلا لما يضرب الزيت بيكون كده عالسوسته وباين من بره ولا بيكون شكله ازاي؟؟؟


تحياتي

رد: يعني ايه المساعد جاب زيت؟ هل بيبقى الزيت عليه من بره باين؟؟
 

ممكن ليه لا ؟؟

مهو الزيت بيتسرب بقى وييجى على اى حاجة جنبة .. بس انت اكيد هتلاحظ ان الزيت خارج من المساعد (لو اصلا بيجيب زيت) ..

وكمان اتاكد ده زيت اصلا ولا شحم ...