بجد مرتين فى أسبوع واحد !! كرهت السواقه
السلام عليكم
انا يا جماعه جديد فى السوقه و حاليا بسوق سياره والدى مرسيدس و انا كنت بقالى فتره الحمد لله مستواى اتحسن فى السواقه لكن للاسف بسبب عدم الممارسه الكتيره و لانى تركت القياده فتره حوالى شهر لان رجلى كانت مكسوره و لما الحمد لله ربنا عفانى و ابتديت أسوق تانى بحس انى تايه بالعربيه و خصوصا الشوارع الضيقه و اللى ضايقنى اكتر انى فى اسبوع واحد حكيت مره فى ميكروباص و مره تانيه حكيت فى عربيه فى شارع ضيق ومن ساعتها وانا فقدت ثقتى فى نفسى فى السواقه و وبقيت بتجنب تماما المناطق الضيقه لدرجة انى بالرغم انى جديد فى السواقه و مش بحب اجرى اوى بقيت افضل الطرق السريعه او مثلا امشى فى الحارى الشمال و اضطر انى اجرى احتراما لقواعد المرور فى الحاره دى وكل اما اكون رايح مشوار افكر الف مره و افتكر المرتين اللى حكيت فيهم و اتردد و ممكن مخدش العربيه اساسا عايز نصايح يا جماعه |
رد: بجد مرتين فى أسبوع واحد !! كرهت السواقه
هات ليك سواق يسوق العربيه
|
رد: بجد مرتين فى أسبوع واحد !! كرهت السواقه
حاول متخليش الحاجات الصغيرة دي تفقدك ثقتك بنفسك دي حاجات عادية و بتحصل لناس محترفة سواقة كمان مش ناس لسه متعلمة جديد
خليك هادي و انت سايق و متسمحش لحاجة تخرجك عن شعورك و ركز اكثر و انشاء الله تبقي مع مرور الوقت احسن محدش فينا اتولد و هو بيسوق بالتوفيق انشاء الله ROSE4U |
رد: بجد مرتين فى أسبوع واحد !! كرهت السواقه
بص هقولك على حاجه والله العظيم انا اشتريت عربيتى القديمه (كانت دوجان ) و مكنتش بعرف اسوق بعد 3 ايام بالضبط خدها و طلعت على الماظه و تعرف انا منين انا من بنها يعنى مشيت زراعى و دائرى (بصراحه كنت مرعوب و ماسك الدركسيون بايدى الاتنين و مشغل قراءن بصوت عالى ههههههههه ) بس انا قصدى ان الموضوع عاوز شويه جراءه منك
|
رد: بجد مرتين فى أسبوع واحد !! كرهت السواقه
طبعا ده شىء شبه طبيعى ...خصوصا ان المرسيدس ( اللى انت حاططها صورة ) عربية عريضة جدا و ابعادها مش سهل التعود عليها .....لو قدرت تراجع ابعادها كتير و انت سايق ..و حاول تخلى الكرسى عالى ( ممكن بوضع شلته او مخدة ) و اظبط المرايات ( خلى حد يظبطهم لك وانت قاعد على كرسى السواق ) و بلاش ترتبك و انت بتكسر يمين او شمال ..و افتكر انك لازم تاخد على واسع عشان العربية طويلة ( يعنى مثلا لو هتحود يمين يبقى خد شمال سنة صغيرة و بعد كله لم الدركسيون كله يمين مرة واحد ..و ده ممكن يبقى سهل عليك لان المرسيدس المعدل اغلبه باور و الباور بتاعه خفيف جدا كمان ) ....افتكر الحاجات دى و متزعلش اوى لما تحك حد بس ياريت يبقى عندك ثقافة الاعتذار و احترم اى حد حكيته ..و اخيرا ..ياريت متخشش شارع ضيق وواقفة فيه عربية جديدة او غالية ....عشان ممكن متقدرش على تصليحها ..هههههه ! بالتوفيق و اسف على الاطالة دى !
|
الساعة الآن 03:55 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017