مصر موتورز مجتمع السيارات - رجاء من كل قائد سيارة ايا كانت نوعها و موديلها !

مصر موتورز مجتمع السيارات (https://www.masrmotors.com/vb/index.php)

- القيادة فن و ذوق (https://www.masrmotors.com/vb/forumdisplay.php?f=180)

- - رجاء من كل قائد سيارة ايا كانت نوعها و موديلها ! (https://www.masrmotors.com/vb/showthread.php?t=37195)

رجاء من كل قائد سيارة ايا كانت نوعها و موديلها !

مساء الخير عليكم جميعا

النهاردة حصلت قدامى حادثة بسيطة فى عين اللي يشوفها لكن....

فى طريق المعمورة الاصلاح ف الاسكندرية وقت خروج طلاب الاكاديمية بيبقى الطريق زحمة واللي بيعد مزلقان المعمورة بيجري ع الاصلاح

سوزوكي "توناية" قدامى ماشى على 70 - 80 ك وشفرولية نص نقل مقفولة " صندوق " بيلف U ترن بس الشارع حارتين بالعافية و سواق النص نقل شايفنا جاييين على السرعة المذكورة
ولا فى الدماغ والثقة الزايدة ف النفس و قام لافف المعلم
ولاقى نفسه الطريق مش جايبه قام جايب مارش و بيعدل نفسه
طبعا و بعيد عنكم سواق التوناية حاول يفلت منه بفرامل بس مع رجعة النص نقل ورا بقى مفيش مفر
مفيش مكان يفلت منه و لا الفرامل هتجيبه لصغر المسافة بين العربيتين

وحصل التصادم , وكنت انا اول عربية وراهم وقفت وولعت الانتظار و نزلت انا و 4 كانوا معايا ف العربية

وفوجئنا بأن التوناية " ابونيه " كلها اطفال من 8 لـ 10 سنين و بيصرخوا
فتحنا الباب بصعوبة ونزلناهم و الحمد لله كلهم بخير

اللي انا عمال احكي فيه من الصبح و ارغى انه لو يعرف سواق النص نقل انه التانى معاه اطفال استحالة يعمل كدة
حراااام بجد مش لاقى كلام اوصف بيه الخضة بتاعت العيال
ياريت يا جماعة نراعى بعض على الطريق و برة الطريق , دة لا سباق ولا حرب , وبلاش نقول انا جدع انا سريع العربية كذااا cc وموديل السنة و فى الاخر تبقى السبب فى حزن ناس تانية

معلش يا جماعة لو طولت بس ملاقتش غير المنتدى افضفض فيه :(

رد: رجاء من كل قائد سيارة ايا كانت نوعها و موديلها !

لا بس بجد وحشة اوى والحمد لله ان ربنا ستر وخلى بالك وربنا يستر طريقنا كلنا

رد: رجاء من كل قائد سيارة ايا كانت نوعها و موديلها !

انا معاك فى الرأى انت الوحيد البتعرف تسوق والباقى مبيعرفوش دا قانون السواقة
بلاش تنطيط عشان الضحايا بيبقوا ولهومش ذنب سواء اطفال او كبار والاطفال اكثر
دا ممكن يكون عقدة حياتهم ومينسوهاش تماما
تقبل مرورى
وشكرا لك على الموضوع المهم

رد: رجاء من كل قائد سيارة ايا كانت نوعها و موديلها !

اقتباس:

لا بس بجد وحشة اوى والحمد لله ان ربنا ستر وخلى بالك وربنا يستر طريقنا كلنا

الحمد لله على كل حال

اقتباس:

مش هتصدقنى لو قلتلك ان سواق النص نقل آخر واحد فكر فى الاطفال وهمه على الخبطة و لما عرف انه مفيش اصابات صوته علي و بقى حلو و امووور و بيعرف يتكلم

رد: رجاء من كل قائد سيارة ايا كانت نوعها و موديلها !

المشكلة ان مفيش مدارس سواقة حقيقية تعلم السواقة و لو فى مش هيعلموا حد حاجة عشان محدش يعرف حاجة عن قوانين السير و معظم الناس اتعلموا السواقة بالصدفة او من صاحب او قريب لكن مش من متخصص يعنى كل اللى يعرفة ركب الغيار و دووس و إطلع عارفين اول حاجة اتعلمتها فى مدرسة السواقة هنا فى الدانمارك اية هية انى عمرى ماهاخد الرخصة قبل ما يتأكدوا ان و انا ماشى على الطريق هكون أمين على نفسى و على اللى معايا و على اللى حواليا