مصر موتورز مجتمع السيارات - طريقة تنظيف مصفة طرمبة بنزين الريجاتا وال 128

السلام عليكم ورحمة الله
انهاردة حبيت افك طرمبة البنزين اللى عندى ايطالى ماركة
BCD الاصلية والمنتشرة لدى محلات قطع الغيار
وهى تعتبر من النوعيات الجيدة .. كلنا نسمع ان فيها مصفة داخلية لتنقية شوائب البنزين صح ؟
وكتير بيحصل ان الطرمبة تقف واسهل حل عند الميكانيكى " غيرها يا بية وهات واحدة غيرها "

ودة اللى عملتة غيرت 3 طرمبات بنزين واحدة كانت ف العربية اصلا وقطعت .. والتانية جديدة BCD ايطالى
وكويسة لما لقيت فلتر البنزين احيانا بيبقى فاضى قمت مغيرها زى مقال الميكانيكى بالاضافة ان العربية مش بدور الصبح بسهولة
فقالى طرمبة على طول غير .. غيرت ! واتضح ان الطرمبات شغالة زى الفل وكل ما فى الامر
مصفة البنزين محتاجة تنضف من شوائب التنك واتسدت ! .. طيب مكانها فين بقى فى الطرمبة

اولا : حضرتك هتفك مسامير هتلاقيها فى الطرمبة داير ميدور تقريبا 6 اتمنى الصورة توضح مكانهم

بعد كدة هتلاقى فية كاوتشة سوداء الكاوتشة دى خامتها جميلة جدا شيلها بأيدك ومتقلقش مش هتتقطع

http://nicegypt.com/images/100_1504.JPG

تحت الكاوتشة دى فية مكانين مكان للداخل هتلاقى فية مصفة البنزين .. والدايرة او المكان الاخر هو تجمع خروج البنزين
من الطرمبة الى الكاربراتير .. زى الصور دى :

http://nicegypt.com/images/100_1506.JPG

http://nicegypt.com/images/100_1507.JPG

لو حسيت ان الكاوتشة الحمرا اللى برة دى تعبانة غيرها على طول انا مجربتش اغيرها بصراحة
بس اكيد هتلاقيها بعد متغيرها وتغسل المصفة ترجع كل حاجة مكانها وتتأكد انك ربطت المسامير كويس جداَ جداَ
لانها لو مهوية هتاخد هوا وبالتالى الكاوتشة مش هتشتغل كويس لانها بتكبس الهوا فتشفط البنزين وطبعا هتسرب
لو مش مربوطة كويس .. بعد معملت دة كلة طلعت العدة وجربت اركبها ف العربية واشوف

والنتيجة ان الطرمبة شغالة وزى الفل !! وخسرت مرة 65 ج تمن طرمبة يوغسلافى و 80 ج تمن طرمبة ايطالى
اتمنى اكون افادت الاعضاء وكتير وانا منهم مكنتش اعرف مكان المصفا فين وشكل الطرمبة اية من جوة

ملحوظة : لا تعتمد ان على اصلاح اي طرمبة بنزين بشكل كامل ... ما ذكرتة بالاعلى ما هو الا مسكن فى حالة
ان الطرمبة قطعت منك لا قدر الله .. وقد تعمل معك لفترة طويلة والله اعلى واعلم .