مصر موتورز مجتمع السيارات - مرايات الجنب اتسرقت.......حسبى الله و نعم الوكيل

النهاردة و انا نازل لقيت الكفه بتاعة المرايتين اتسرقت و دى تانى مرة فى نفس المكان من قدام البيت (المرة الاولانية من سنه فى عربية تانية)
و طبعا متخيلين حرقة الدم و ما رحتش شغلى لأنى باسوق فى اماكن زحمة و مستحيل اسوق من غير مرايات. على كل انا كنت متوقع اليوم ده من زمان لأن السيراتو بقت منتشرة بشدة و بقت زى اليابانى و من المتوقع ان سرقتها تزيد
رحت عملت محضر عشان لو المرايه باظت تتغير فى التأمين. المهم ان الصول فقاللى ان ما شافش ناس كتير بتعمل محاضر للموضوع ده معناه ان الناس بتستعوض ربنا و تقول يعنى لو انا عملت محضر هاترجع المرايات
و عليه توجهت للقطامية ما لقيتش المرايات فاتصلت بأبو رواش لقيتها موجودة الفردة ب100 جنيه بالضريبة بس قلت انزل شارع دمشق الأول لقيتها نادرة و ب120 جنية و شمال بس مش عارف ليه و البياع قاللى ان اللى موجود منها فى السوق مش مكفى السرقة لانها بقت منتشرة جدا. و المشكله ان لا فيه منها تايوانى و لا صينى
قلت مابدهاش رحت أبو رواش و اشتريت الاتنين و استعوضت ربنا فى الفلوس و أحسن ما كانت المرايه كلها تبوظ و تمنها 850 جنية
نصيحة ان اللى مش بيركن العربية فى جراج يغطيها أحسن

و نصيحه لكل من يحدث معه هذا الموقف انه يعمل محضر لأن دى أمانة و ماحدش عارف لو كترت المحاضر ممكن تطلع عصابات و الداخلية ترصدها انما لو ماحدش اشتكى يبقى هاتزيد و ممكن تحصلك تانى زى حالاتى لما كبرت أول مرة. احنا نعمل اللى علينا قدام ربنا و مالناش دعوة بعد كدة.

و ربنا يكفينا من كل شر و يسترنا فى الدنيا و الأخرة