هل الجراند تيريوس من السيارات الجديدة اللى تستحمل بعد الفولفو240
 

السلام عليكم و رحمه الله و بركاته،
الحقيقه دى اول اشارك معاكم و انا سعيد جدا و الله بالمنتدى المفيد دا.
انا بفكر اجيب جراند تيريوس...و ساعات بقارن بينها و بين الليفينا بس محتار فعلان. المشكله انى معايا فولفو 240...و مش حقولكوا على العربيه دى...فول اوبشن...سفر ايه و ثبات ايه على 170 و180 حتى لو كانت فيها حاجة بايظة و حتى لو كانت محمله على الاخر...والله العربيه بتمشى و هى بايظة ما شاء الله عليها. الاسرة و الولاد بيركبوا معايا و مش بفكر انى بخاف من اى حاجة على الطريق...حتى اللواري المجنونه اللى بتعدى جنبك ساعات طايرة على الطريق الدائرى بالليل ربنا يكفينا شرها. المهم انا بفكر اجيب حاجه جديدة مجرد بس لان شكل الفولفو قديم شويه.. و طبعا الكماليات الجديدة احلى ...ياترى ممكن الجراند تيريوس تبقى قريبه من قوة الفولفو دى فى السفر و التحميل..الخ؟ و جزاكم الله خيرا

رد: هل الجراند تيريوس من السيارات الجديدة اللى تستحمل بعد الفولفو240
 

و برضه نسيت اقول عن الارتفاع بالنسبه عن الارض فى الفولفو ( 19سم) زى التيريوس ( 20 سم) او اى 4 فى 4 تطلع على الرصيف تعدى الناحيه التانيه و مفيش مشكله خالص.... محتار فعلا و خايف ادفع 156 الف والاقى العربيه مش فى نفس القوة.

رد: هل الجراند تيريوس من السيارات الجديدة اللى تستحمل بعد الفولفو240
 

بص يا باشا ....

من رأيي ..... و الله الفولفو تكسب ....

انا معايا تريوس 5 راكب ..... و قبليها كان معايا لادا 2105 روسي ....

التريوس بوجه عام عربية شديدة و ممتازة و ثابتة بجد ........ بس لما آجي افتكر سواقة اللادا .... بجد اللادا حاجة تانية .....

طبعاً ح تسمع كلام من دا كتير ..... انت ليه مستحملها ؟ ... دي راحت عليها ..... شوف لك حاجة جديدة كدا تناسبك و تناسب وضعك .....

الكلام دا بيأثر على نفسية الواحد أي نعم ..... بس انا واحد فاهم عربيتي و فاهم نظامها .... و مريحاني في السكة و مدياني الأمان الكامل ..... ابيعها ليه ؟

انا اللادا بندم اني بعتها .... لولا بس ان واحد صاحبي قوي كان نفسه فيها و كان بيزن عليا بالشهور علشان ياخدها ....

طبعاً انا مش باذم في التريوس .... التريوس عربية ممتازة ممتازة ... ثابتة حتى في السرعات العالية ماشاء الله .... واسعة و مريحة و أأمن .....

لو حضرتك عاوز حاجة في قوة الفولفو .... ممكن بقى تدور على الأمريكاني ( الجيب ) ..... و لو ان الفولفو لا يعلى عليها بجد ....

و انا بشجعك على اختيارك للتريوس ... و ح يكون اختيار موفق ان شاء الله ....

التريوس للأسف مش 4×4 لأنها لو كانت كدا كانت بقيت أغلى من 156 ألف ..... و الكلام دا من التوكيل نفسه .... هى 2×4 .. لكن ح تلاقي شكلها يدي على 4*4 ...

لكن لو في حدود ميزانية حضرتك .... هاتها و اتوكل على الله .... مش ح تندم ...

العربية الحمد لله مخلصة ألف و 200 كيلو و مفيهاش خدشة ماشاء الله .... و ياما في الكيلوات دي اكلت مطبات و على 120 و 140 و العربية زي ما هى متزنة ثابتة .... استهلاك في البنزين موفر الى حد ما .... عربية احتمالية و محدش بيقول عليها كلام وحش ....

بالإضافة الى التوكيل المحترم .......

معلومة : التريوس 5 راكب : ياباني 100 %
التريوس 7 راكب : مكونات يابانية و تقفيل اندونيسي

ح تلاقي هنا حضرتك مواضيع بتتكلم عن التريوس ..... شوفها حضرتك و استفسر أكتر و اختيارك جه في حاجة محترمة جداً جداً ..... و ربنا يبارك لك في العربية الجديدة ان شاء الله :)

رد: هل الجراند تيريوس من السيارات الجديدة اللى تستحمل بعد الفولفو240
 

شكرا جزيلا على الرد الشامل دا يا باشا... فعلا كلامك صح بس انا ان شاء الله لما اشترى التيريوس مش حبيع الفولفو ابدا...بالنسبه للتيريوس انا فعلا عملت عليها بحث كتير على النت ...بس موضوع انها مفيهاش 4 فى 4 فى مصر منها دا جديد عليا....انا اعرف ان فيها فئات2 فى 4 او 4 فى 4....و اعلى فئه منها هى اللى 4 فى 4 و برضه الجراند تيريوس 4 فى 4 ....انا شفت افلام كتير عنها فى اليو تيوب ماشيه فى الرمل و كده....شفتها بتطلع من الغرس بالفور باى فور ... عموما انا حتأكد برضه من الموضوع دا فى التوكيل و انا شاكر جدا لحضرتك على الرد السريع و مبروكه عليك ان شاء الله عربيتك ..ربنا يديك خيرها و يكفيك شرها.

رد: هل الجراند تيريوس من السيارات الجديدة اللى تستحمل بعد الفولفو240
 

لا مقارنه
ثبات و اعتماديه الفولفو لا تقارن باي سياره حديثه
بشرط الحاله المعقوله.
لو عربيتك نضيفه ما تبعهاش غير لما تبتدي تصرف معاك