|
سيارة النترا مخبوطة و مطحونة...ممكن مشورة ضروري
السلام عليكم ........
كما قلت لكم اشترينا سيارة هونداي النترا 2011 خليجي من السعودية و قلنا تسافر بيها و بعدين نجمركها ....و حصل اللي حصل اشتريناها و سافرنا بيها ...و فجأة و بدون سابق انذار عملنا حادثة و العربية اتبهدلت و مكملتش معانا 20 يوم .... و العربية اللي حصل فيها كالآتي : الجنب اليمين كلو بح ....و الشنطة راحت تجيب فول و طعمية و هية جية واحد خبطها ... و السقف راح ....و الفانوس الامامي انكسر و الكبوت عاوز سمكرة يعني حوالي 60% من هيكل السيارة متبهدل مفيش في الهيكل سليم الا الجنب الشمال من نصف الكبوت الى الباب الخلفي الشمال و الحاجة الحلوة انو مفيش توكيل رحنا لعمنا غبور ...... كشف على العربية عارفين قال كام ...... 60 ألف جنيه بالتمام و الكمال ......جنيه ينطح جنيه ستين ألف ....دا العربية اشتريناها ب 45 ألف ريال يعني بحوالي 62 الف جنيه نروح نصلحها بتمنها المهم .......رحنا طلعناها برا التوكيل ووديناها عند واحد برا قالنا هاجيب طلبات مستورد يعني مستعمل و هتكلف حوالي 30 ألف جنيه بالكتير يعني نصف سعر غبور بس أنا خايف منو... السؤال هوه ..... لما هيصلح السيارة هترجع زي الاول كأنها جديدة و لا هتكون هناك مشاكل ؟؟ و هل المستورد ده مضموم و كويس و لا أي كلام و مش مضمون ؟؟؟ و هل بعد التصليح كأني اشتريت سيارة مستعملة و هدوخ على الصنايعية مرة بتكركب و مرة مش عارف ايه و لا لأ ؟؟؟ مع العلم ان الموتور و العفشة سليمة 100% كل الاضرار في هيكل السيارة بالنسبة للسعر في مصر لو حبيت أبيعها هل هيأثر جامد و لا مفيش حد هيعرف انها مخبوطة ؟؟؟؟ و هبيعها كأنها جديدة ممشتش الا حوالي 2000 كيلو و لا هبيعها كأنها مخبوطة ؟؟؟؟؟؟ معلش طولت عليكم بس اللي عارف يجاوبني لأن السيارة عند الميكانيكي الآن مستني مني تلفون علشان يبدأ الشغل |
رد: سيارة النترا مخبوطة و مطحونة...ممكن مشورة ضروري
لو كان صنايعي نضيف هايروقها
بس اكيد الخبطة هاتاثر ع السعر بس مش اوي لو كان الصنايعي نضيف و المهم سلامتك و انك كويس ومعروف ان غبور غالي بس بيروق العربية بيخليها احسن من الجديدة |
رد: سيارة النترا مخبوطة و مطحونة...ممكن مشورة ضروري
قدر الله و ما شاء فعل
يا ريت صور للعربيه علشان نحدد حجم الخابطه قد ايه. عموما لما تتصلح حيبان انها متصلحه حتي لو اللي بيشتري ما اخدتش باله لااااااااااااااازم انت تعرفه انها مخبوطه و متسمكره علشان ربنا يباركلك في فلوسك ما اعتقدش انك ترضي ان حد يخدعك و انت بتشتري عربيه و يبعهالك معيوبه علي انها عربيه سليمه. بالنسبه لشغل السمكره طالما العفشه سليمه يبقي مش حتسمع كركبه ولا حتسمع اصوات اهم حاجه اللي يشتغل في العربيه يكون نضيف و يضبط الفروقات و جسم العريبه بالضبط |
رد: سيارة النترا مخبوطة و مطحونة...ممكن مشورة ضروري
قدر الله وماشاء فعل قول الحمد لله انك طلعت منها سليم وبالنسبه للعربيه ممكن توديها الحرفيين فى القاهره هناك فى صنايعيه كويسيين اوى انا شوفت بعينى عربيه هامر H 2 كانت بتستعدل الشاسيه و BMW M6 كانت بيعمل شغل ميكانيكا وعربيه بورش كايين تيربو كان وشها رايح فى داهيه وكانت بتتصلح فأسأل على صنايعى نضيف وخليه يشتغلك فيها وان شاء الله هترجع زى الاول
|
رد: سيارة النترا مخبوطة و مطحونة...ممكن مشورة ضروري
قدر الله وما شاء فعل
ممكن تروح المنصورة اسمع انهم اساتذة فى التصليح واكيد ارخص |
| الساعة الآن 05:44 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017