مصر موتورز مجتمع السيارات

بص يا سيدي ..
دلوقتي الموتور من ضمن الاشواط بتاعته انه يسحب هواء مخلوط ببنزين و يطرد عادم . الصباب ده هو الباب المسؤول عن ان الهواء لما يدخل مايطلعش من نفس المكان و يحبسه و بالتالي يعمل كومبريشن (كبس) .. يتحرق و بعدين يفتح صباب العادم علشان العادم يطلع. الكامه هيا المسؤوله عن فتح و غلق الصباب في التوقيت المحدد و لمده محدده.

كل ما زادت كميخ الهواء الداخله و كل ما العادم طلع اسرع تزيد كفائه الموتور (بالنسبه للسحب) و يقل عزمه (مش شرط).
دلوقتي علشان تزود كميه الهواء الي داخله للموتور قام مهندسو الميكانيكا في زمن غير الزمن اللي احنا عايشين فيه بابتكار وش سلندر ب 2 صباب هواء و 2 صباب عادم لكل بستم ,, و بالتالي كان لازم يضيفوا كامه تانيه علشان تبقي مسؤوله عن فتح و قفل الصبابات الزياده .. فبالتالي اصبح وش السلندر فيه 16 صباب و كامتين .
في الموتور الكامه الواحده البستم (السلندر) بيبقي ليه صباب هواء واحد و صباب عادم واحد و بالتالي بيبقي ليه صبابين , في عدد البساتم 4 = 8 صباب.
في بعض المواتير زي الفيات القديم خلوا كامه لصبابات الهواء و كامه لصبابات العادم فاصبح الموتور 8 صباب عادي بس اتنين كامه
في حاله الاتنين كامه بيبقي فيه 4 صباب لكل بستم , و 4 بساتم يبقي 16 صباب ..
في بعض المواتير الاخري ابتكروا انهم يحطوا صبابين هواء و صباب عادم واحد يبقي 3 صبابات في 4 بساتم = 12 صباب.(زي التيوتا)
فيه مواتير تانيه ابتكرت تحط 3 صبابات هواء و 2 عادم في 4 بساتم يبقي 20 صباب.

اي خدمه