|
استفسار من السادة خبراء الفيات 132 وخصوصا الأستاذ حازم خضر
السلام عليكم ورحمة الله وبركاته الاخوة الافاضل / الاستاذ حازم خضر اولا اعرفكم بنفسى أسمى على ( أبو أحمد ) (الواد العسل اللى ف توقيعى ده) (: عندى فيات 132 2000 سى سى وبصراحه انا بحب العربية دى جدا وبعاملها زى عيل من عيالى بالظبط وماببخلش عليها بحاجة العربيه من بره زى الفل وجنوط وبطارية وعفشة وفرش وفرامل وكرونة كله تمام مشكلتى فى الموتور والفتيس الموتور فية رجرجة جامده جدا وصوتة مرعب وعالى جداااااااا والعربية بتاكل بنزين وزيت طبعا انا عارف انها عمرة بس للأسف امكانياتى المادية حاليا ماتسمحش بالعمرة لانى زى ماقلت سلفا انا صرفت عليها كتير قوى الفترة اللى فاتت فهل يوجد خطورة من استمرار الوضع على ماهو عليه ؟ يعنى امشى بيها كده لحد ماربنا يفرجها وفى ميكانيكى قاللى نعمر وش السلندر بس والعربية هاتتظبط ولما نيجى نعمل العمرة مش هانعملة تانى . هل ده صحيح؟ العمرة لو كامله ممكن تتكلف كام؟ لأنى سألت اكثر من ميكانيكى وكل واحد قال رقم مالوش دعوة بالتانى مثلا 1300 و 1750 و 2500 جنيه نيجى بقى للفتيس بكل بساطة الفتيس فيه خشونه ده اللى الميكانيكى قاله طبعا الخشونة مش فى النقلات لان النقلات سهله خالص والفتيس مابيعضش ولا بينطر غيار انما فى صوت عالى واحتكاج بيروح لما افصل بالدبرياج ده حله ايه؟ لان واحد قاللى بلى والتانى قاللى اسطوانه والتالت قاللى الفتيس بايظ وهات واحد جديد والغريب ان واحد قاللى الفتيس زى الفل مافيهوش حاجه (: ودى صور العربيه http://img63.imageshack.us/i/my132one.jpg/http://img410.imageshack.us/img410/6421/my132two.jpg http://img410.imageshack.us/i/my132two.jpg http://img63.imageshack.us/img63/4729/my132one.jpg بانتظار ارائكم ومقترحاتكم ولا حرمنى الله منكم اخوكم ابو احمد |
رد: استفسار من السادة خبراء الفيات 132 وخصوصا الأستاذ حازم خضر
اهلا و سهلا يا ابو احمد
بسم الله ما شاء الله عربيتك شكلها كويس من بره بالنسبه لمشكله حضرتك هو كده الموتور محتاج عمره كامله و فعلا العمره حتتكلف في حدود 2000 جنيه مثلا و الموتور استعمال خارج لا يقل عن 5000 الاف جنيه في اي حال من الاحول!!!! نصيحه حاول تمشي بالعربيه علي كده لما تغير الزيت حط مع غيار الزيت علبه زيت شنبر دا حيخفف شويه و يعتبر مسكن للعربيه و بلاش تحط زيت تقيل لان الزيت التقيل حيجيب اجل الموتور اسرع من الزيت العادي و ما تسمعش كلام اللي بيقول دا الزيت التقيل احسن للمواتير الخفيفه علشان التبخر و الكلام الفاضي دا و سايس العربيه و بالراحه عليها لحد ا تعمل عمره. بالنسبه للفتيس انا بصراحه مش شايف مشكله طالما نقلات الفتيس عاديه و الفتيس بياخد حاراته مضبوطه يبقي الفتيس سليم لو فيه صوت في الفتيس بيروح لما تدوس دبرياج يبقي كده البليه بايظه لو فيه صوت زي صوت ونه مع الرابع يبقي كده الفتيس بيشاور عقله و الحل هنا انك تحط للفتيس زيت تقيل الونه دي حتختفي ان شاء الله و حيعيش عمر طويل معاك. و اي سؤال انا تحت امرك و شكرا لثقتك الغاليه |
رد: استفسار من السادة خبراء الفيات 132 وخصوصا الأستاذ حازم خضر
يا باشا ربنا يخليك ومايحرمنيش منك اقتباس:
انا بزود زيت حوالى كيلو كل عشر ايام او اسبوعين او بعد مشوار سفر وبحط زيت سايب (بقول كده كده مش فارقه طالما هاعمر) فالمفروض انى هازود زيت بكره والا بعده ان شاء الله لأنى كنت فى بنها من يومين والمؤشر بتاع الزيت النهارده كان قليل فهل ينفع احط زيت شمبر مع تزويد الزيت ده والا لازم اغير الزيت خالص؟ وهل زيت الشنبر ده هايقلل الصوت والتخبيط بتاع الموتور؟ وبالنسبة للفتيس بحس ان فى حكه او نعره ( حاجه كده مش عارف اوصفها ممكن تقول زى صوت العربية وهى ماشية فى الطين) بس صوت معدنى ولما امور او ادوس دبرياج الصوت بيختفى خالص ومعلش يا باشا تقلت عليك |
رد: استفسار من السادة خبراء الفيات 132 وخصوصا الأستاذ حازم خضر
هو المفروض برضه كل فتره تغير الزيت مش لازم تزوده بس
اول ما تغير الزيت حط زيت الشنبر و دا مهمته انه بيدخل في الاماكن المتآكله و بيسدها علي قد ما يقدر بالنسبه لصوت الفتيس هو كده مجموعه الدبرياج مش الفتيس يعني ديسك او اسطوانه و اكيد بليه طالما الصوت مرتبط بالدبرياج يبقي دبرياج |
رد: استفسار من السادة خبراء الفيات 132 وخصوصا الأستاذ حازم خضر
اقتباس:
اقتباس:
تسلم يا باشا بس زى ماقلت لحضرتك انا مبغيرش زيت لأن الزيت دايما نضيف لأنى تقريبا بحط كل شهر 3 كيلو والزيت بينقص مش بيبوظ فسؤالى هل ينفع ازود زيت الشنبر على الزيت الموجود؟ بمعنى لو الموتور محتاج كيلو زيت, وعلبة زيت الشنبر ربع كيلو مثلا, احط تلت تربع كيلو زيت + علبة زيت الشنبر (ياريت اكون عرفت اوضحلك اقصد ايه) (: بخصوص الفتيس البليه اللى بايظه دى بتاعة الفتيس والا بتاعة الدبرياج؟ وهل بتاع الفرامل والدبرياج يفيدنى فى الموضوع ده؟ يعنى يقدر يعرف العيب فين قبل ما يشتغل؟ ومره اخرى اسف على تعبك معايا أبو أحمد |
| الساعة الآن 10:06 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017