يا ترى ايه أفضل سيارة كروس اوفر في مصر
 

انا بفكر اشتري عربية كروس اوفر جديدة و بصراحة محتار جدا بين الموديلات المختلفة منها فمثلا ممكن تكون شكلها هايل بس صيانتها وقطع غيرها نار زي نيسان قشقاي وممكن تكون عليها الطلب وسهلة البيع بس سعرها مبالغ فيه زي السبورتاج والاسم كوري وممكن تكون سعرها مناسب و متينة بس شكلها مش جذاب زي رينو داستر وهكذا
علي العموم انا دورت كتير وأخيرا وصلت ل 5 عربيات :
سوبارو xv
سوزوكي 4X
هيونداي كريتا
بيجو 2008
كيا سبورتاج
فياريت أهل الخبرة يفيدونا برأيهم في الموضوع ده وايه الأفضل فيهم ولو عندهم اقتراح تاني فأهلا وسهلا بيه

رد: يا ترى ايه أفضل سيارة كروس اوفر في مصر
 

بص هو انت كده مش محدد حاجة خالص وهتوه نفسك لازم تقسمهم شرائح
اولا البيجو اركنها على جنب خالص ديه عربيات عايزه خواجات مش مصريين
ثانيا العيله اليابانى
دايهاتسو تريوس
سوبارو XV
دول شريحه عربيات تطلع فيها على الرصيف ,وديه شاسيهات نص نقل وديه عفشه خدمة شاقة وديه محركات وفتايس العمر الطويل وقول زى ما تقول واليابانى فى الفئات ديه سمعته معروفه فى العالم كله لكن فيه فروق بين الاتنين تعمل مقارنه لوحدها زى على سبيل الذكر لا الحصر
السوبارو صالون اقيم واوسع - استهلاك بنزين اعلى - قطع غيار واعادة بيع اسواء
التريوس عمليه اكتر فى نواحى الصيانة وقطع الغيار واعادة البيع والكماليات الخ الخ بالاضافه لاستهلاك البنزين رائع عيبها بس انها ضيقه شوية كصالون فى الفئه ديه بس ده لا يمنع انى شايل فيها امبارح باب بالحلق بتاعه 90 سم جواها عادى يعنى مش ضيقه للدرجة اللى بيبالغ فى وصفها البعض خالص

اما السوزوكى فهى اقل بالكتير من انها تقارن بباقى العيله لكن لو اتقارنت بالكورى هى فى رائى الشخصى اقيم لكن مازالت عربيه مش منتشره ويمكن الداستر منتشره عنها

ثالثا عيله الكورى
ديه عربيات تجيبها علشان بياعه وبس لكن لا تمت لاداء والجودة بصله للعربيات اللى ذكرت الاول فلو عجبتك اى واحده فيهم اشتريها من غير مقارنات لانهم كلهم اداء متقارب جدا ان لم يكن واحد

تفهم من ما سبق انحيازى للتريوس طبعا لكن الهيونداى والكيا مش وحشين واختيار عملى مش بطال طالما ديه احتياجاتك لكن لو عايز عربيه كروس اوفر بطعم الجيب والاوف رود مش منظر بس يبقى التريوس او السوبارو واليابانى حصريا وبس

يارب اكون افدتك واهلاً بيك فى مصر موتورز نورت المنتدى

رد: يا ترى ايه أفضل سيارة كروس اوفر في مصر
 

الف شكر Abonora علي ردك الشافي الوافي
انا بالفعل ميال جدا للسوبارو وبعد كلامك اقتنعت بيها اكتر وربنا يبارك لك في عر بيتك
فعلا الياباني وبس