شوية مشاكل كده مع فتيس العربيه انجدوني بالله عليكم
 

أولا : كل عام و حضراتكم بخير يا رب العالمين و ربنا يجعلها سنة هجريه سعيده علينا أجمعين و يجعلها سنة خير و يمن و بركات علينا ..

من يومين كده كنت سائق عربيتي في شارع الهرم و كالعاده الطريق بيبقى زحمة جداا فجيت اهدي كده ونزلت الغيار الثاني و كان ببعض و ثقيل جدا و بالعافيه كده لغايه ما جبته مع اني كنت دايس دبرياج على الآخر و حسيت بحركه كركبه كده تحتيا . و لما وقفت بقى الطبيعي اني اجيب الغيار الأول . المهم بقى عصاية الفتيس عملتها معايا و كان عندي احساس اني لو جبت عشر رجاله معايا مكنش هيتحرك من مكانه. المهم بعد معاناه جيبته و كان من حسن الحظ البيت قرب. فضلت ماشي ع الأول كده لغايه ما ربنا قدرني و عرفت اجيب الثاني . لغايه ما وصلت البيت. المهم بقى طلعت عيني عشان اعرف اركن العربيه لأن المارشدير كان صعب و ثقيل جدااا .
معلومه بسيطه ان الغيار الثالث حلو جدا و حرير كمان. الرابع ثقيل حبه بس مش اوى و الخامس حلو جداا.
العض ده ملهوش كتير . يا ترى بقى مشكلتي ايه خصوصا اني من شويه كده جازفت و قلت انزل اجربها و الجو كويس اهو و هي بارده. لقيتها أحسن شويه بس فيه عضه خفيفه . هو ايه ده ؟ و المفروض اعمل ايه ؟
العربيه هيونداي I10 2008. و عامله 78000 كيلو.
افتوني أفادكم الله

رد: شوية مشاكل كده مع فتيس العربيه انجدوني بالله عليكم
 

ممكن تكون مشكلة فى الدبرياج .. ممكن الماستر بتاعه يكون بيسرب زيت ..

ابقى بص على زيت الدبرياج ولو لقيته ناقص يبقى غالبا الماستر محتاج تغيير

رد: شوية مشاكل كده مع فتيس العربيه انجدوني بالله عليكم
 

.
طاب معلش بما اني جاهل في الحاجات دي .
كان واحد صديقي بيقولي أنها لا قدر الله ممكن تكون مشكلة ديسك و اسطوانه و كده.
بس و أنا مبطل العربيه العبارات كلها بتبقى حلوه جدا و ناعمه .
و الميكانيكي إلى انتقالي عليه مسافر عشان الاجابه. ممكن توضيح يعني ايه ماستر ؟

رد: شوية مشاكل كده مع فتيس العربيه انجدوني بالله عليكم
 

بص يا باشا .. الدبرياج عندك بيكون شغال على ضغط زيت وبياخد زيت باكم زى الفرامل بالظبط

والصمام المتحكم فى ضغط الزيت اسمه ماستر دبرياج .. زى ماستر الفرامل كده ..

افتح الكبوت هتلاقى علبة زى علبه زيت الفرامل بس اصغر دى بتاعت الدبرياج وبص على الزيت اللى فيها شوفه ناقص ولا لأ ..

هو عموما انت محتاج تروح لميكانيكى يكشفلك عليه علشان حتى لو ناقص وزودته المفروض يتاخد الهوا بتاعه ويتكشف على سبب التسريب الاول