مصر موتورز مجتمع السيارات - تجربة قيادة التويوتا اليارس

طبعا كلمك عارفين التويوتا اليارس و ممكن تقييمي ليها مش هايفيد في حاجه
بس انا هاقرنها بالصني
اول ما ابن خالتي جابها سميتها سلاحف النينجا
اول ماركبتها عربيه واسعه من ورا و من قدام مريحه
اول ما دورت مش بتدور ايه العربيه عطلت مصلحه رجعها يا ابني و هات نيسان صني
طبعا كان الرد دوس ديبرياج ماتبقاش فلاح
دوست الديبرياج و دورت في يا ابني العدادات في النص
بعد التدقيق في عداد الحراره مش موجود في لمبه لما تطفي يبقى العربيه سخنت
ماشي
المهم طلعت بيها طبعا الطول لازم يفضحني مش عارف ادوس الدوسات
ليه علشان التابلوه مكمل لحد العدادات
المهم مشيت فين يا ابني بوز العربيه مش عارف اشوفه قالي ماتخفش لما تاخد عليها هاتبقى سهله
اديتها ابعد البسات الي انا حافظها عن ظهر قلب و مشيت
التسارع صاروخيه و المتور معاك على ايه سرعه لحد 200 كيلو
بس الثبات بعد 90 كيلو ركبي خبطط في بعضها
الباور ناعم جدا جدا جدا
الوسع سافرنا بيها 5 و كنا مستريحين و الشنطه واسعه
العيوب بصراحه مش شايف اي عيوب غير ابعادها الغير واضحه سواء من قدام او من ورا ركنتها مقرفه مش عشان صغيره لا انت مش شايف اي ابعاد تشجعك على الركن
الصيانه توكيل تويتا محترم جدا خصوصا بتاع العباسيه بالحجز و يديك معاد امته تاخد العربيه و تشوف العربيه و هيا بتتعمل قدامك و انت في الاستراحه و المصنعيه بالساعه و مافيش اي مشاكل منه
استهلاك البنزين 350 كيلو في الصفيحه على الطريق بالتكييف
العربيه جامده جدا بس انا شايف انها غاليه بس في تويوتا انت بتشتري جنيه دهب