هشتري لادا استعمال 2107 وهشدها شده كامله من كله
 

نويت اشتري لادا 2107 موديل تمنينات مثلا اقل حاجه امكانيات تعبانه اهم حاجه البودي يكون سليم وهجبلها مكنه استيراد وكل حاجه دهان وسروجي وطقم كاوتشات وجنوط . كله كله عاوز نصايحكم علشان انا شوفت صور ليها بعد التعديل مناسبه جدا جدا وعجباني اوي ليا طلب بس ياريت حد يدلني عليه انا عاوز اشدها في مكان واحد مركز مثلا بس يكون مكان محترم وبيراعو ربنا مستني رد حضراتكم انا عارف اني طولت عليكم . انا اسف مقدما
انا نزلت كام صورة للشكل اللي في دماغي . تحياتي ليكم جميعا

رد: هشتري لادا استعمال 2107 وهشدها شده كامله من كله
 

بالتوفيق ان شاء الله ,,, بشمهندس zingo ان شاء يفيدك لانه خبير في الادا و في انتظار تعليقات باقي الساده الاعضاء ذوي الخبرات .,. و مبروك مقدما ...

رد: هشتري لادا استعمال 2107 وهشدها شده كامله من كله
 

ربنا يكرمك و يباركلك و يوسع رزقك يا دكتور, أنا لسه فى KJ-1 و لا خبير و لا حاجه, و أساتذة المنتدى هنا كلهم أحسن منى و بأتعلم منهم.

بص يا ريس اللادا بوجه عام مش عربية رياضية علشان خيالك ميروحش بعيد. و الأفضل فى شكلها هو شكل الفابريكا, لأنها مهما عدلت فيها هيفضل أدائها "لادا بردوا".

حضرتك طالب طلب محتاج مجهود و فلوس
أكتر واحد أتعاملت عنده, خبرة و تخصص و أمانه و علم و إنسان محترم جداً و كان شغال هو و والده فى توكيل لادا و طلع بعثات روسيا ... محمد طلبه, مش هأفضل أقولك ده مفيش منه و الكلام الفاضى ده. بس هأقولك "إعتبر نفسك وديتها التوكيل و هتركب أفضل قطع غيار و بأقل سعر و لا إشتغالات و لا نصب" و طبعاً يجيبلك أى حاجه العربية محتاجاها من الابرة للصاروخ - أى حاجه تخص اللادا من ميكانيكا /عفشة/كهربا.
فده رقم واحد للشد الصح فى أساسيات العربية
بالنسبة للشد الشكلى مش هأعرف أفيدك أوى بالصنايعية
بس من الـ 3 صور, باين أنك عاوز رشة محترمة على طقم جنوط على فامية و شوية لعب فى الأنوار, زينون و سبويلر و أورينجات على وحدة زجاج كهربا..... شوية حركات يعنى.
و سروجى تمام يشدهالك من جوة فرش و كسوة و أرضية جلد و يغير كاوتش داير الأبواب و الشنطة و كسوة الأربع أبواب و المقابض.

التعديلات الشكليه دى ميزانية لوحدها, لو مزاجك عالى ممكن تدخل فى 10.000 ج !!! و ممكن تزيد كمان.
المهم أساسيات العربية, مش صاج بس, مكنه و الآت جر (فتيس و كردان و كارونه)
و هأرجع أقولك تانى, متصرفش كتير أوى عالشكل علشان دى لادا مش مرسيدس و لا بى إم.

دى بيانات محمد طلبه, ممكن تكلمه و تشوف رأيه إيه فى اللى أنت ناوى تعمله بالضبط, مش هتخسر حاجه من الإتصال.
أعانك الله

رد: هشتري لادا استعمال 2107 وهشدها شده كامله من كله
 

1000 شكر لشخصك الكريم . بالنسبه للمصاريف هوا انا في مقدرتي احط 12000 غير تمن العربيه اللي هوا مش هايكون اكتر من 8000 جنيه من بق ميكانيكي في المنطقه يعني اما الشكل الخارجي انا ههتم جدا ب البويه مع شويه لعب صغيريين في الشكل . تحياتي ليك ومتشكر جدا والله ولو في اي نصايح برده انا مستني من حضرتك اي حاجه ولو تكرمت ممكن تبقي تسيب رقم حضرتك وبرده استفاد من حضرتك شويه

رد: هشتري لادا استعمال 2107 وهشدها شده كامله من كله
 

تمام بالنسبة للأداء
بعد ضبط المكنه و الفتيس و الكارونة
هتضبط الكربراتير عند الأسطى معتز المصرى - فى دار السلام, ده عبقرى كربراتير عن تجربة و بيشتغل الأكس و الباب بنفسة عالمخرطة و المقاسات عالشعرة.
و تركب اسبراتير الكترونى لادا أصلى من عند محمد طلبه. هتحس بفرق أداء و نعومة حاجه تانية

و تشوف كل شغل السمكرة المطلوبه بس تسأل أفضل سمكرى ميقولكش غير رفرف و نزل طبله و هات باب و الكلام العبيط ده, السمكرى الصح تجيبله علبه سمنه دايس عليها قطار يرجعهالك زى مكانت من غير متغير حاجه.

بالنسبة للدوكو تسأل سواقين التاكسى على أفضل صنايعى قريب منك و تتفق معاه على الألوان (فى ناس بتعمل لونين داخلين فى بعض غامق من تحت و فاتح من فوق لنفس اللون خطير) و متنساش يرشهالك شيشلوك (بلاك) من تحت و العتب و الكارتيرات علشان الصدأ بتاع الشتاء.
و بردوا تتفق معاه على اللون (عادة أو ميتالك) و نوعه و الفرن هتفضل جواه أد إيه, و حاول تكتب أدامه الكلام ده علشان الناس دى بترجع فى كلامها بسهوله.

يا ريت السمكرى ميكونش عارف بتاع الدوكو, و لو متخانقين مع بعض يبقى أفضل (هيتلككو لبعض عالشغل و أنت حاجتك تتضبط صح) :)

بس المهم تتطمئن عالأساسيات زى مقولتلك

أعانك الله