العربية بتسخن مع السرعات العالية
 

معلش هطول عليكم
انا معايا عربية شاهين 1995 )(1300 CC) الحمد للة فى الطبيعى الحرارة عمرها ما بتعدى 70 حتى فى عز الحر و الزحمة بس يوم الجمعة اللى فاتت كنت راجع من اسكندرية و قولت اجرى بالعربية شوية انا طبيعى مش بعدى ال 120 علشان مش بلحق من المطبات و الزحمة بس طريق اسكندرية القاهرة الصحراوى طريق كويس جدا جدا جدا و دا اللى شجعنى اجرى بس حصلت مشكلة العربية كانت بتجيب ال 120 و تطلع بعد كدا بالعافية العداد زى مايكون مش عاوز يتحرك اكتر من 120 فضلت دايس بنزين لحد ما العربية ابتدت تطلع ل 130 و شوية لاقيتها داخلة على 140 بس دا بعد كتير قوى يعنى حوالى بعد ما كنت دايس بنزين على الاخر لمدة 2 كيلو مثلا من 120 لحد ما قربت من ال 140 و فضلت دايس بنزين كدا حوالى 20 دقيقة و كانت عينى على عداد السرعة و الحرارة طول الوقت لانى مستغرب لية العربية مش بتجرى بعد المدة دى لاقيت عداد الحرارة على 90 و لمبة الزيت عمالة تنور و تطفى انا افتكرت الزيت نقص فى الموتور او فى تسريب (مع العلم الموتور مش خفيف الحمد للة) وقفت على جمب الطريق و استنيتها لحد مابردت و بصيت على الزيت لاقيتو تمام و دورت تانى لاقيت لمبة الزيت انطفت و كلو عادى جدا و طول الطريق عمال اجرب ازود عن 120 الاقى الحرارة بتبتدى تطلع تانى
انا حاطط فيها زيت توتال 3000 و بتاع البنزينة قالى غيرو على 2500 انا كنت ماشى بيها تقريبا 2000 كيلو بس الزيت لسة لزوجتو كويسة جدا هو اسود شوية بس اللزوجة كويسة
سالت ميكانيكى قالى ممكن تكون اسطوانة الدبرياج و سالنى لو كان صوت الموتور بيعلى انا مكنتش ملاحظ انو كان عالى كان العادى يعنى فقولت اجى هنا اسالكو لو حد يعرف اية هو سبب ال 3 مشاكل دول دول (مشكلة الحرارة و مشكلة نور زيت الموتور و مشكلة عدم السحب)
و ياريت لو تقولولى انهو زيت افضل للموتور و فى السحب توتال ولا شيل
و شكرا جدا لكم

رد: العربية بتسخن مع السرعات العالية
 

اعتقد مشكلة الحرارة وعدم السحب مرتبطين ببعض لان مع السخونية الكهرباء الخارجة من البوبينة بتضعف اوى
وسببهم من وجهه نظرى ان التكيهات عندك مش مظبوطة او تحديدا مقفولة زيدة عن اللزوم

ولما العربية تسخن زيادة عن اللزوم اية اللى يحصل فى الزيت ؟؟؟؟ اكيد هايخف واللزوجة بتعتة تتلاش وبالتالى الزيت مش هايقدر يوصل لغاية الهد من فوق لانة بقى عامل زى المية وعشن كدة لمبة الزيت ندك بتبدا تبربش
طب علاج السخونية اية
لازم تريح التاكيهات شوية حتى لو صوت الموتور مش عاجبك بس دة الاضمن
كمان عاوز تغير ترس الزيت اللى تحت الاسبراتير
ولو بالمرة تراجع على التقسيمة يبقى كويس اوى

رد: العربية بتسخن مع السرعات العالية
 

بالعكس انا عندى صوت التاكيهات الى حد ما عالى و التقسيمة لسة ظابتها من شهر تقريبا لانها كانت اتعكست لما كنت بغير الابلاتين و الكوندنسر و الماكانيكى ظبتها هى العربية لحد 120 مافيش اى مشكلة المشكلة بتبان لما اجى ازود عن 120
هل مازال السبب هو التاكيهات ؟
يا ريت لو تقولى التاكيهات تتظبت على كام عندى انا معايا شاهين 1995 1300 سى سى كامة واحدة

رد: العربية بتسخن مع السرعات العالية
 

لا انت عندك تاكيهات مقفولة زيادة عن اللزوم وتاكيهات مفتوحة زيادة عن اللزوم

رد: العربية بتسخن مع السرعات العالية
 

شكرا جدا انا بوكرة هسال على واحد متخصص تاكيهات و هظبتها لانى انهاردا فعلا لاحظت ان التاكيهات صوتها بردو مش مظبوت شكرا جدا لحضرتك بجد انت انقذتنى من بهدلة الميكانيكية و كل واحد يفضل يفك و يربط و يغير حاجات مالهاش علاقة اصلا بالموضوعبس ياريت لو كمان تقولى انهو زيت افضل للعربية شيل ولا توتال ؟