رجفة المكنة على السلانسيه - كورولا عيون
 

انا اعانى من نفس مشكلة الاستاذ اسلام هاشم فى مشاركة سابقة، رجفة المكنة على السلانسيه، عربيتى كورولا 1999 عيون - كاربريتر، الرجفة بتبقى شديدة اول ما ابدأ الدوارة بعد وقفة لساعتين مثلا، فى الجو السخن لما خانق الكربريتر يكون مفتوح.
انا اعرف ان فى الجو البارد فى الصبح مثلا خانق الكربريتر بيبقى مقفول والبنزين بيضخ فيه اكثر فمابتبانش الرجفة لان الموتور بيدور بسرعة، تبدأ الرجفة تظهر بعد ما اضغط على البنزين ضغطة او اتنين فيروح الخانق فاتح.

لما ادور المارش يبدأ الموتور يدور بصوت ضعيف جدا يعنى بدوران بطىء للغاية لدرجة انى بحط رجلى وازود البنزين لانى بخاف الموتور يتوقف، وكل ما ارفع رجلى بحس بالرجفة وبقتح الكبوت واشوف المكنة بترعش جامد لدرجة انى بخاف انها تقطع الكراسى (اللى عليها المكنة).

كمان الاهتزاز بيزيد لما اولع الانوار فى الليل او لما المروحة بتدور لما العربية بتسخن (والاسوا لما المروحة تبدا تدور والانوار والعة)، وبيخف جدا اذا زودت تقسيمة السلانسيه، انا بستعمل ده كحل، لكن بيصرف بنزين كتير والعربية بتسخن جامد لان اساسا فى السودان عندنا الجو حر جدا.

كمان صوت الموتور لما تضغط بنزين تحسه مكتوم او مخنوق كدة.

الكاربريتر ايسان اصلى جديد لسة ما كملش سنة، نضفته بالبخاخ وغيرت البلكات (البواجى) واسلاك البلكات والزيت غيار جديد.

انا حاسس ان الهوا اللى بيدخل مش كفاية، دورت على النت لقيت فيه بلف اسمه محبس التحكم فى الهوا اثناء السلانسيه (Idle Air Control Valve)، بس لقيت انه موجود فى سيارات نظام البخاخات بس ومش الكربريتر (لو الكربريتر فيه دلنى على مكانه). ومحبس الراجع الـ PCV اللى بيبقى فوق راس الموتر فكيته اوتاكدت ان البلية اللى فيه بتتحرك والمجرى سالك.

فكرت يمكن ضبط هوا للكربريتر (الخليط) - وحركت مسمار الهوا فى كل المواضع وطبعا الرجفة بتزيد لما بفتح المسمار اكتر (بلفه عكس الساعة). الوضع افضلا طبعا لما بقفل المسمار لكن بحس ان العربية متدايقة كدة ومخنوقة اكتر.

وكمان عندى احساس ان فيه مشكلة كهرباء لان فيه صوت غريب (وكأنه انفجار صغير) بيطلع لما ادوس البنزين فجأة دوسة جامدة شوية. وكمان صوت الدوارة بقى اعلى عن ما كان واحيانا بيبدأ بصوت انفجار بسيط برضك، وفى مرة قلت اتاكد ان البطارية بتفصل لما الموتور يدور، فرحت شغلت الموتور وفكيت القطب السالب البطارية واول ما نورت الانوار راح الموتور وقف على طول، ففهمت ان مولد الكهرباء مش بيستحمل لوحده الانوار. انا اعرف ان التكييف له جهاز بيزود السلانسيه لما يشتغل، فهل الانوار والمراوح ماعندهاش الجهاز ده ؟؟؟، وهل ممكن يكون السبب ان مقاومات المراوح استهلكت وعايزة تغيير ؟؟؟، وهل ممكن يكون موزع الشرارة الاوتوماتك عايز نضافة ؟؟؟. علما ان الجو عندنا تراب 24 ساعة. برضك قريت ان ممكن يكون سبب الرجة ان الكلتش (ألفتيس) مش بيفصل فصل تام فبيسبب الرجة.

العزم كويس وقوة الموتور كويسة و مفيش رجة مع التكييف لما الجهاز بينزود السلانسيه.

الصنايعية عندنا مش بتفصل الاسباب كدة، اول فكرة تجي لهم فى دماغهم يقولوا لك غير ده وغير ده وده وفى الاخر ما بتجبش نتيجة. ومفيش اجهزة يكشفوا بيها، كله بيعتمد على سماع صوت المكنة.

رد: رجفة المكنة على السلانسيه - كورولا عيون
 

رحت لميكانيكى ولغبط لى خراطيم الكربريتر والموتور بقى يلف بسرعة أقل لما افك خراطيم موزع الكهرباء !!!. فهل من منجد - على الاقل لضبط تركيب الخراطيم.

رد: رجفة المكنة على السلانسيه - كورولا عيون
 

الخانق بتاع الكهربا مش مظبوط (مسمار الكهرباء) روح لميكانيكى كويس خلية يظبتهولك و انشاءاللة هتلاقى العربية كويسة معاك و ياريت لو تغير طقم الكهرباء بالمرة لكفاءة اعلى (بوجيهات و كوندنسر و ابلاتين)
اما صوت الانفجار دا اللى بيسببو حاجة واحدة و هى تقسيمة البوجيهات اكيد مش مظبوطة
بالنسبة للخراطيم انا بامانة معرفش فيها

رد: رجفة المكنة على السلانسيه - كورولا عيون
 

بص ياباشا دة ضبط كربرتير يعلى شوية ويضبط كهربة الاسبراتير

رد: رجفة المكنة على السلانسيه - كورولا عيون
 

كل ده كان من التوصيل الخاطىء للخراطيم ما بين الموتور والكربريتر، فيه مجموعة من الانابيب المعدنية بتكون موجودة تحت الكاربريتر، الصنايعية يا اما بيفصلوها او يوصلوها خطأ. دورت على الدياجرام ووصلتها بطريقة صحيحة وظبطت الكهربا من الموزع (الموبينة) والامور اتظبطت. وعلى فكرة حتى التكييف كان سخن على السلانسيه، وبعد التصحيح اصبح ابرد بكتير.