|
مشكله غريبه فى العفشه
السلام عليكم بفضل الله جبت كارينز 2010 عامله 58 ألف كيلو من 50 يوم بالظبط العربيه بسم الله ماشاء الله كانت زى الفل ... قلت أروح أشيك على العفشه .. الراجل قاللى المساعد اليمين جايب زيت وعايز يتغير ... طبعا ماينفعش تجيب واحد بس .. جبت 2 جديد من الخضرى فى المنصورة بــ 1100 جنيه ... وغيرت جلبتين مقصات عشان اقفل باب العفشه وما ارجعلوش تانى وفى نفس اليوم بعد ماخلصت روح أظبط زوايا وأرصص بعد ماالراجل خلص لقيت العربيه بتحدف يمين رجعتلو تانى وتالت ... كل شوية نجرب وارجعله .. المهم انها ما اتحلتش برضو .. وع فكره العربيه كانت بتحدف يمين قبل ما أعمل أى شغل فيها ...الراجل بتاع ظبط الزوايا قاللى العربيه ارتفاعاتها مش مظبوطه يعنى اليمين قدام أعلى من الشمال ... واليمين ورا أوطى من الشمال ...رجعت للعفشجى بدل اليايات ورا وقاللى الكلام ده مش مظبوط وروح لواحد تانى هو اللى مش عارف يظبط الزوايا سبت الموضوع شويه ... قيمه شهر بالظبط ... سمعت اول امبارح صوت من اليمين قدام .. خفت ليكون المساعد باظ تانى واللى حسبته لقيته .....المساعد اليمين قدام جاب زيت ...فى واحد بيقوللى أكيد مش أصليين بس حتى لو مش أصليين يبوظ بعد شهر من تركيبه .. مع العلم انو الواحد بيحافظ ع العربيه من المطبات جدا مش عارف بقى .... افتونا يا أهل الخبره |
رد: مشكله غريبه فى العفشه
يسر الله أمرك وعاوز أقولك اطلع على التوكيل علشان يظبط العربية صح دا لو مكانش فيه عفشجى نضيف يبص على العربية الاول لو انت من المنوفية كنت وديتك لواحد أحسن من التوكيل كمان |
رد: مشكله غريبه فى العفشه
شكرا ع المتابعه يا أستاذ حسن .. العربيه بالفعل نمر المنوفيه ... بس انا من شربين / دقهليه انا فى دماغى كام حاجه عايز أبص عليهم الاول قبل ما أغير المساعد تانى ... ومنها المقص اليمين .. أشك انو السبب فى المشكله دى وربنا يقدر الخير |
رد: مشكله غريبه فى العفشه
بص انا مش خبير بس اللي فهمته من كلامك .,,,.
سبب بوظان المساعد ممكن من ارتفاع الجنب و حدفيه العربيه , بمعني حاجه تؤدي لحاجه , عايزه عفشجي او الافضل كما ذكر ا.خسن روح التوكيل . |
رد: مشكله غريبه فى العفشه
اقتباس:
والله العظيم الطبيعى انك تجيب حاجة وتطلع بايظة مش فى العربيات بس .... ابدا فى كل حاجة فى حياتنا لو اتكلمنا عن حاجات العربيات انا غيرت عفشة كاملة فى عربيتى مساعدين وجلب مقصات وكبالن !!!فى واجب يتعمل اكتر من كدة مع عربيتك الكبالن طقطقت بعد 3000 كم من التركيب المساعدين حجرت بعد 4000 كم عربية تانية وانا بجبلها عفشة كاملة حتى الطنابير قلت اجيب حاجة اغلى من اللى جبتهم فى عربيتى مساعدين جداد ومقصات جداد وطنابير جداد واتياش سكاترا جديدة (ابقى شوف الموضوعين فى قسم 516) تعالى بقى اركب النهردة العربية تقدر تقول عليها محتاجة عفشة كاملة تانى والكلام دة فى حدود 8000كم جبت مجموعة دبرياج كامة لعربية ريتمو فكيت الفتيس تانى بعد 1000كم عشان الاسطوانة باظت طب فى باقى حياتنا العادية رحت اشتريت سخان غاز عشان اوفر استهلاك الكهرباء وعشان انا مبفهمش فى انواع السخانات اغلى حاجة كانت معروضة اشترتها ولكن زى الباشا اتصلت بالصيانة عشان السخان عامل مشاكل جبت شاشاة LCDفول اتش دى بعد شهرين جم خدوها وغيرو الشاشاة بالكامل جبت لاب نوعة توشيبا وحضرتك عارف يعنى اية توشيبا والله بدلتة مرتين موبايل سامسونج بدلتة مرة لو فضلت اتكلم للصبح مش هابطل كلام هى كدة ....حياتنا كدة .... |
| الساعة الآن 06:54 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017