مشكلة في شفروليه سبارك موديل 2007 أتوماتيك
 

أنا سيدة عايشة في الشارقة بالامارات .. بشتغل في مدرسة و احتجت اشتري سيارة ضغيرة اقضي بيها مشاويري للدوام بس ... المسافة بين بيتي و المدرسة لا تتعدى 4 كيلومتر ... من كام شهر بدأت اشارة المحرك في التابلو تنور بشكل متقطع و بعد اسبوعين كدة بدأت تبقى منورة ع طول و لما سألت قالولي كده طبيعي ما دام مافيش مشكلة ظاهرة .. بعد كدة بدأت المسائل تتعقد شوية و بدات السيارة يحصل بيها رجفة بسيطة و انا ماشية و طبعا لأني ما بفهمش بالسيارات وديتها الميكانيكي(اللي هو هندي و اكتشفت بعد كده انو عبيط و ما بيفهمش خالص) .. قالي انو مافيهاش حاجة بس محتاجة مادة تنظف بيها خزان البنزين و احاجات تانية انا مفهمتهاش المهم قلتلوا توكل ع الله و اعمل اللي انت عايزو المهم السيارة ترجع تدور تاني من غير رجفة ... بعد كدة كانت امورها 100% و اختفت اشارة المحرك و بطلت تنور ... بعد كدة حوالي بشهرين كنا في شهر 9 و هو طبعا أكتر شهور السنة حرارة في الشارقة .. رجعت المشاكل تاني لدرجة انها في مرة قصرت معايا و عملت حادث بس جات سليمة و الضربة جات بالباب الخلفي .. طبعا الميكانيكي سوا شغله ... بعد كدة بدات أعاني كل شهر مشكلة جديدة و الكارثة ان الميكانيكيين هنا كلهم هنود و عبيطين اوي .. و بدات أحتاس فيها المشكلة اني مينفعش اشتري سيارة تانية لظروف مادية خاصة و مش عارفة إيه المشكلة فيها ... دلوقتي بدورها الصبح عادي و بطلع فيها شغلي بس لما أروح الظهر و خاصة في الأيام الحارة ما بترضاش تدور إلا لما أدوس بنزين الأول و بتبقى طول الطريق ترقص ع الوحدة و نص و أحيانا بتوقف خالص (تطفي) لما ادوس بريك عشان أخفف سرعتي يعني أنا مش عايزة أوقف بس عايزة اخفف سرعة تقوم هي بقى تقفل خالص ... و ديتها مليون ميكانيكي و كلهم بيعملوا نفسهم فاهمين و فحص كمبيوتر و مش عارفة إيه و بالمحصلة ما فيش حاجة صلحت و انا تعبت ..

ساعدوني لو سمحتم

رد: مشكلة في شفروليه سبارك موديل 2007 أتوماتيك
 

اولا اهلا باهل الامارات المحترمين والاخوة الاعزاء علي قلوب المصريين
اهتزاز المحرك ليه اسباب كتيرة
قاعدة الموتور - بوجيه او رشاش بيفصل او جاب اخره - فيشة حساس الكرنك مهزوزة او مش راكبه كويس
اولا :- مطلوب فحص كمبيوتر مطبوع عشان نعرف الاكواد اللي بتطلع بالرقم بتاعها (كل عيب بيطلع برقم معين) واللي يهمني الرقم وخليه يكشف علي حساس الاكسجين
وفي النهاية ان شاء الله حاجة بسيطة ممكن تنظيف حساس البوابة يحل المشكلة

رد: مشكلة في شفروليه سبارك موديل 2007 أتوماتيك
 

حلوة قوي الجملة دي ومبتكرة
و بتبقى طول الطريق ترقص ع الوحدة و نص

رد: مشكلة في شفروليه سبارك موديل 2007 أتوماتيك
 

حضرتك غيرتي سير كاتينة قريب

رد: مشكلة في شفروليه سبارك موديل 2007 أتوماتيك
 

اقتباس:" قاعدة الموتور - بوجيه او رشاش بيفصل او جاب اخره - فيشة حساس الكرنك مهزوزة او مش راكبه كويس
اولا :- مطلوب فحص كمبيوتر مطبوع عشان نعرف الاكواد اللي بتطلع بالرقم بتاعها (كل عيب بيطلع برقم معين) واللي يهمني الرقم وخليه يكشف علي حساس الاكسجين
وفي النهاية ان شاء الله حاجة بسيطة ممكن تنظيف حساس البوابة يحل المشكلة"

متشكرة اوي يا افندم .. بس اصلهم الهنود هنا ما بيرضوش يدوك أي حاجة مطبوعة معرفش ليه بس اصل هو بعد ما عمل الفحص حكالي انه حساس الكرنك (و بالمناسبة دلوقت بس لما حضرتك كتبت اسمه أنا تأكدت انو انا سمعته صح ؛-) ... ) هو اللي خربان و تم تغييره ... وما زالت المشكلة قائمة ..

البوجيه تم تغييره و حساس الكرنك كمان و استعمل منظف عشان يحل مشكلة الرشاش ...
فاضل يكشف على حساس الاكسجين و حساس البواب و قاعدة الموتور
بس عاوزة أستأذن حضرتك ايه هو حساس البواب يعني أحكيله إيه عشان يفهم ؟؟؟
دي بقى مشكلة التواصل مع الهنود ... غير ان اللي بياخد السيارة للميكانيكي هو حارس المدرسة عشان انا ما ينفعش أروح بنفسي