صوت طقطقة تقريباً كوبلن :(
 

العربية انا موعود بيها فعلاً كل يوم حاجة كل يوم حاجة لما حسيت اني دفعت ثمن عربية فوق عربيتي
ما علينا الحمد لله

المهم انا بسمع صوت طقطقة قدام يمين مع الفرامل و بحس ببرجلة ف الدركسيون ف نفس الوقت وانا بفرمل انا شاكك بنسبة 90% انها كوبلن و كتير قالولي كده

المهم لو هي كوبلن فعلاً ياتري نصيحتكم إيه ؟ بتتعمل فين و بكام الكوبلن و كام المصنعية و لو حد يعرف مكان ممكن اعمله فيه في الحلمية او عين شمس و يكون كويس يبقي خدمني
بس الاول كام سعر الكوبلن و الافضل اني طبعاً اشتري جوز كبالن امامي عشان مفيش حاجة الجديد ميحملش ع القديم يبقوا الاتنين جداد مع بعض أفضل انا صح ولا ايه !؟

ده حاجة

الحاجة التانية العجلة اللي قدام يمين برده في حد قالي انها مرحلة لورا شوية روح اعمل ترصيص الكلام ده صح ؟ الترصيص يظبط العجل !؟ ولا اعمل ايه!؟ واعرف ازاي انها مرحلة لورا فعلاً مع اني شوفتها و حاسس انها فعلا مرحلة لورا شوية طبعاً ده بخلاف الكوبلن لان الكوبلن ده سبب الطقطقة لكن ترحيل العجل ده شئ ملحوظ بالعين ايه رأيكم

بانتظاركم يا بشررررررر :w6w200504112220146b

رد: صوت طقطقة تقريباً كوبلن :(
 

لو عاوز حد فى عين شمس
انا ممكن اديلك رقم تليفون عفشجى على الخاص
بس اللى عندك دة اشك انة كوبلن
دة حاجة فى كليبر الفرامل (جهاز الفرامل ) وطبعا الطنابير عندك عاوزة تتخرط
ثانيا
العجلة لو مرحلة لقدام او للخلف دى زوايا اسمها زوايا كاستر وفى معظم العربيات ملهاش ظبط رجلاش يعنى او تظبيط زوايا
ولكن ليها حل
اولا لازم تكشف على الركبة اللى فى الجنب دة ودى بتتغير عادى جدا وتمنها مش غالى بتربط بلحام مع الصدر الاسفل اللى بيشيل الردياتير
ونكشف على مكان رباط الميزان مع نفس الصدر اللى بيركب علية بكاوتش الميزان فى غالب الـ 128 بيكون فى شرخ وبيتلحم عادى مفيش مشاكل
شوف لو عاوز رقم العفشجى اولى وانا ابعتهولك فى رسالة على الخاص

رد: صوت طقطقة تقريباً كوبلن :(
 

لو العفشجي تمام و آمين و هيقولي المشكلة و يحلها و سعره كويس اوكي ابعتلي رقمه و عنوانه و تسلم يا حبى
بالنسبة للحاجات اللي انت قولتها هكون كداب لو قولت اني فهمت لكن اللي فهمته هو انك عايز تقول ان العيب مش من الكوبلن العيب من الفرامل مظبطهاش كويس!؟ صح!؟
و ف الحالة دي يبقي ارجع لبتاع الفرامل ابن الـ!@#$%^ اقولة ظبطها
و كمان انت عايزني اتطمن ع الركبة عشان الرجرجة اللي ف الدركسيون اللي بتيجي مع دوسة الفرامل صح انا فهمت ولا غلط!؟

بالنسبة للرجلاش و الكنافة انا مفهمتهاش بصراحة لاني مش بارع ف الميكانيكة :( بس حاول تفهمني هتلاقيني بفهم ع طول :CHUBBY~36:

رد: صوت طقطقة تقريباً كوبلن :(
 

ارجوا غلق الموضوع تم حل المشكلة و اتضح ان المشكلة كانت من تيل الفرامل الامامي مش متثبت كويس و الحمد لله تم الحل