التسقيف وما ادراك ما التسقيف
 

يا جماعة انا بعاني من مشكلة التسقيف ده بقالي 6 شهور بالضبط واللي يقولي بوجيهات واللي يقولي فلتر بنزين وفلتر الهواء ... المهم اني من ساعة ما اخدت العربية طبعا مغير سيور الكاتينة والتكيف والدينمو وفلتر البنزين والبوجيهات ... المهم روحت لواحد ابن حلال بعد حوالي 5 شهور من معاناة التسقيف هوة كان بيغيرلي طرمبة البور فأنا قولت اقوله علي موضوع التسقيف في سكتي راح قاللي ده كده تقسيمة سير الكاتينة راح مأخرهالي سنة وطلع بيها راحت سقفت بردو راح فك واخرهالي تاني راحت التسقيفة راحت خااااااااااااالص وبقيت مبسوط جدا اني خلصت من صادع كان في دماغي والله ... ومشيت بيها بتاع سنة بالمنظر ده ....
المهم من حوالي اسبوعين بقي روحت اغير اولسيه الكرنك واولسيه الكامة روحت نبهت علي الميكانيكي اللي هوة غير ابن الحلال الاولاني بس ده ابن حلال اووووي لأني اعرفه روحت قولتله خلي بالك من تقسيمة السير بتاع الكاتينة لأن واحد ظبطهالي كويس ومخلهاش تسقف ... راح قاللي انا كده كده لازم ابص علي التقسيمة علشان اشوف شغل اللي قبلي المهم راح اول ما بص علي التقسيمة قاللي ايه ده حرام عليك ده مأخرة اوووووي بتاع 3 سنات كده وده كده تاكل بنزين معاك وتسخن وانا بيني وبينكم فعلا العربية كانت بتاكل بنزين وانا قال كنت فرحان ان العربية ما بتسقفش وطلع ابن الحلال الاولاني مش ابن حلال ... وبعد ما ركب الاولسيهات راح ظبط سير الكاتينة الظبطة الصح وطلعت من هنا والتسقيفة رجعت من هنا فأنا والله العظيم تعبت يعني هوة يا اما التسقيفة تروح والعربية تاكل بنزين يااما التسقيفة ترجع وماتكلش بنزين فياريت يا اهل المنتدي اللي طول عمري باخد منه احلي وافيد المعلومات في عربيتي يفيدني في حل المشكلة ده ....
ملحوظة 1 : التسقيفة ما بتظهرش غير لما اكبس علي البنزين يعني لو عايز اغرز مثلا او اعدي من عربية واقرص علي التاني او التالت بتظهر التسقيفة وتروح بعد كده ...
ملحوظة 2 : اللي بيحصل في الملحوظة 1 ده ما بيحصلش غير لما العربية تسخن وامشي بيها مشاوير كتيييييييييييييير
ملحوظة 3 : انا عملت سكان بالكمبيوتر علشان اعرف درجة حرارة العربية ولقيتها ما بين 89 و 92 درجة ... بس ظهرلي ايرور واحد 15-W.T.S signal low مع العلم ان مؤشر الحرارة عندي ما بيعلاش عن قبل النص بشوية ...
ملحوظة 3 : طلعت بوجيهات العربية وصنفرتها كويس اووووي لأني لسه مغيرها من حوالي شهرين او تلاتة
ملحوظة 4 : انا كنت لسه مغير الموبينة بواحدة جديدة من حوالي 4 شهور كده علشان القديمة كانت بتطلع شرارة من فتحتين بس
ملحوظة 5 : انا مغير فلتر البنزين والهوا مع البوجيهات
معلش يا جماعة انا طولت عليكم بس علشان ابقي قولت كل حاجة عن العربية بدل ما تقولوا نفس الكلام اللي انا قولته في ملاحظاتي

رد: التسقيف وما ادراك ما التسقيف
 

اه نسيت اقولك انا ما بحطش غير بنزين 92 والله

رد: التسقيف وما ادراك ما التسقيف
 

طبعا موضوع انك تاخر الكاتينة دة مينفعش خالص
لازم سير الكاتينة يكون راكب صح ونشوف بعد كدة اية العيب
انا اتوقع من خلال سرد المشكلة ان العربية دى بتسخن زيادة عن اللزوم وطبعا اى موتور بيسخن لازم يسقف
فلازم ندور على سبب سخونية الموتور لو انا بتكلم صح

رد: التسقيف وما ادراك ما التسقيف
 

ما هوة انا قولت ان الميكانيكي التاني ركبلي سير الكاتينة صح والتقسيمة الصح لأنه قاللي انه كانه مأخر والراجل ده انا واثق فيه بصراحة يبقي كده خلصنا سير الكاتينة ...
اما بالنسبة للسخونية انا الامبير عندي عمره ما طلع فوق النص بالعكس ده قبل النص بشوية وعلشان اتطمن اكتر يمكن الامبير بيخرف عملت سكان بالكمبيوتر ولقيت درجة الحرارة بين 89 و 92 يعني كده الطبيعي ... ياريت لو عندكم حلول او حاجة اعملها تاني قولولي يا جماعة

رد: التسقيف وما ادراك ما التسقيف
 

أنا معرفش كتير فى اللانوس بس أنا هأقول إللى عانيت منه ربما يفيد بأى فكرة:
- سير الكاتينه لازم يكون مضبوط عالشعرة لا تقديم و لا تأخير نهائى
- الإسبراتير بيكون متصل بترس طرمبة الزيت من تحت, ممكن يكون التقسيمة بتاعته غلط (قصدى الإسبراتير), يعنى واحد فكه و طلعه من مكانه و أثناء إعادة تركيبه سقطه مش فى نفس مكانه, بقى مقدم سنه أو سنتين على ترس الزيت. و دى تخلى العربيه تمشى بس تبقى بتسقف و المكنه بتترج عالسلانسية (مقدمة كهربا على طول). و الحل الميكانيكى يضبط تقسيمة الإسبراتير على لمبه بدوايه متوصله على الـ(+/-) بتاع الموبينه (الطريقة هنا فى المنتدى و المفروض الميكانيكى هيبقى عارفها)

ربنا يصلح حالنا و حالك