|
تزييق قوي في العفشة الخلفية BYD F3 رجاء المساعده
عربيتي موديل 2012 وعامل بيها حوالي 35.000 كيلو من فترة بدأت ألاحظ صوت تزييق في المطبات وفي الطرق الغير ممهده وبعد بحث في المنتديات وهنا وهناك تم عمل الأتي : 1- غسيل شاسية العربية في البنزينه بالفوم والجاز الصوت راح ورجع بعد يومين اقوى من الاول !! 2- غسيل العربية تاني + تزييت جلب العربية والاجزاء المتحركة في العشفة الصوت راح خالص لمده أسبوع ورجع تاني 3- غسيل العربية تالت + رش اسبراي wd-40 على الجلاب والاجزاء المتحركة والصوت راح والمفاجأة بأه هنا ان الصوت رجع تاني بعد اسبوع او اتنين ياريت حد يكون عنده حل يقولي عليه ويكسب فيا ثواب وأخر حاجة بقى قرأت عنها على الموقع هنا حاجة اسمها اسبراي شحم ابيض وكل ما أسئل عليه في بنزينه او حد بتاع زيوت يقعد يهزلي في دماغة ويقولي معرفش حاجة بالأسم دة |
رد: تزييق قوي في العفشة الخلفية BYD F3 رجاء المساعده
اقتباس:
يا باشا متعملش حاجة من نفسك انت تسمع نصايح الاعضاء بس متعملهاش من نفسك روح لمتخصص بمعنى يا اما تروح للوكيل وتقوله المشكلة ولو متحلتش تروحله تانى بنصيحة من الاضاء بردو ولو انت مش بتابع مع الوكيل روح لعفشجي بيفهم وانا ارجح التزييق الجامد ممكن يكون تغيير الجلب الخلفية وتشحيم المساعدين وتربيط عفشة بس المهم روح لحد كويس وبيفهم والعربية في صنايعية كتير بيشتغلوا فيها وبالتوفيق وطمنا عملت اية |
رد: تزييق قوي في العفشة الخلفية BYD F3 رجاء المساعده
نصيحتى لحضرتك روح عند اسطورة العفشه مدحت الباشا بمنيل شيحه الراجل ده اسطوره بمعنى الكلمه ومصنعيته ارخص مما تتخيل الكشف على العفشه كلها ب 10-20 جنيه وبيقولك على الحاجات اللى بايظه بس وده رقمى لو حضرتك محتاج العنوان بالتفصيل 01007490168 مع العلم انى روحتله بعربيتى الاكسيل وفك العفشه كلها قدام وورا بالكامل وتغير كل الجلب والبيض والبطاحات والمساعدين وكل شىء والشغل اخد حوالى 6 ساعات وكان عندى عيب فى العفشه محدش عرف يحله الا هو بس وفى الاخر اخد 150 جنيه بس مصنعيه وهتلاقيه بيشتغل فى كل انواع العربيات كورى ويبانى والمانى وهو عباره عن مركز متخصص بشغل العفشه فقط لا غير وبصراحه محترم جداااا بجد |
رد: تزييق قوي في العفشة الخلفية BYD F3 رجاء المساعده
متابعة للموضوع *********** ذهبت للتوكيل لحل المشكلة وكنت بعمل صيانه الـ 35 الف والعربية دخلت صيانه وخرجت ولما مشيت بيها طبعا لاقيت التزييق زي ما هو ومحدش عمل حاجة كعادة توكيل الامل فرجعت تاني وقلتلهم ان الصوت زي ماهو.... طلعوا اتنين جربوها قالولي ان صوت التزييق من الكارتيرة !!! وانها محتاجه تتربط ... ودخلوها الورشة وربطوها كويس وكل حاجة وجربت العربية الصوت اختفى لكن على اخر اليوم الصوت رجع تاني ويمكن اقوى من الاول !!! روحت التوكيل تاني بعدها بكام يوم .... وجربوا العربية تاني وكانوا محتارين من الصوت مع اني قايلهم اني زييت الكاوتش او الجلاب اللي موجوده في اخر المساعد والصوت راح ومفيش فايدة . دخلت العربية الورشة وفكوا الكنبة الخلفية لانهم كانوا شاكين فيها وبردوا الصوت موجود في الاخر قاموا بتربيط العفشة وتشحيم الجلاب والصوت راح كتيير بس ما ختفاش روحت البيت وسئلت ميكانيكي جنب البيت معرفة بص عليهم وقالي هازودلك التشحيم بتاعهم شوية وجاب زييت باور ودعك بيه الجلاب وبعدها الصوت راح وبقى بالكاد تسمعه . المهم انا قولتله اغير الجلاب ديه قالي لاء بلاش تفكها وتغيير الجلاب ديه عشان كل اللي في الاسواق مضروبة وما بتيعش كتير لو غيرتها مش هاتحس بفرق كتيير والصوت هايرجع تاني كل فترة .... انا محتار اعمل ايه اغير ولا لاء الكاوتوش والجلاب اللي في العشفة .... ولا اعلي الكاسيت وانسى الصوت |
| الساعة الآن 07:00 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017