استفسار فى كيا كارينز
 

السلام عليكم .... كل سنة وحضراتكم طيبين ....
انا عربيتى كيا كارينز كنت ماشى بيها وبعدين عديت على بلاعة كان غطاها عالى فحكت فى بطن العربية جامد وبعدها بشوية لمبة الزيت اللى فى الطابلو نورت نزلت اشوف الزيت لقيته كويس وبعدها اللمبة طفت ومشيت على العربية عادى جدا عاوز اعرف اتصرف ازاى عاوز اعرف مدى تاثير الحكة دى عليها وايه اللى حصل للمبة الزيت .... والف شكر

رد: استفسار فى كيا كارينز
 

مبدئيا تركن العربية و تتأكد ان الارض تحتها نضيفة
الصبح تتأكد من الاتى :
تبص تحت العربية تتأكد ان مفيش بقع زيت
و تكشف على مقاس الزيت
و تحاول تبص تحت العربية على كارتيرة الزيت تشوف الخبطة عملت فيها ايه
افتح كونتاكت من غير ما تدور و تأكد ان لمبة الزيت منورة مع باقى اللمض اثناء ال test لان المفروض ك test لمبة الزيت تنور مع الكونتاكت ( من غير إدارة الماتور ) لو مش منورة يبقى كدا فى خلل فى دايرة اللمبة
لو مبدئيا متطمن و كل اللى فات طبيعى جرب تدور و راقب اللمبة كويس
لو لمبة الزيت طفت بعد ما العربية دارت ( بتاخد ثانية او اتنين ) ابتدى تابع صوت الماتور يفضل تفتح الكابوت و تسمع كويس بس فى نفس الوقت لازم واحد متابع اللمبة
لو اللمبة نورت تانى او فى اى صوت مش طبيعى او اللمبة منورتش مع تكة الكونتاكت بتاعة ال test اوعى تمشى بالعربية و تبطلها لغاية لما تشيلها توديها لمركز صيانة
تكلفة المشى بالعربية و فى خلل فى دورة الزيت اغلى بكتير من علاج الوضع الحالى

ايه اللى حصل ؟ الله اعلم

لو اللمبة معملتهاش تانى يبقى ممكن الكارتيرة انبعجت جامد و مع الخبطة اثرت على مضخة الزيت لحظيا ادى الى اضائة لمبة تحذير انخفاض ضغط الزيت

لو اللمبة نورت تانى و الزيت مقاسه مظبوط يبقى مضخة الزيت حصلها حاجة
لو اللمبة نورت تانى و الزيت ناقص يبقى الكارتيرة اتشرخت و سربت الزيت فالضغط قل و اللمبة نورت

اهم حاجة كل ثانية تعدى و العربية دايرة و اللمبة منورة ....... بتعد فلوس

رد: استفسار فى كيا كارينز
 

الله ينور يا استاذ احمد يا مشرفنا الجميل