|
طريقة عمل فلتر هواء لتكييف لانوس ... بدون تفاصيل!!!!!!!
طبعا كلنا عارفين ان دايو لانوس 1 و 2 بينزلو من غير فلتر تكييف هواء
ودة يعتبر عيب او نقدر نقول انها امتياز او امكانية غير موجود فى لانوس 1 و 2 فمن هنا جت فى دماغى فكرة انى اعمل لها فلتر تكييف هواء انا عارف ان انا مش اول واحد يفكر فى الموضوع دة ومش اول واحد يحاول يعمل فلتر هوا لكن فى النهاية..... محدش وصل للفكرة الكاملة ازاى نعمل فلتر تكييف هواء للانوس والاهم هيكون مكانة فين وهيكون فلتر واحد ولا فلترين بس الاول قبل ما اخش فى الموضوع لازم اشرح دورة الهوا فى تكييف لانوس لان فية ناس معانا فى المنتدى كل اللى تعرفة عن تكييف عربيتة هو زرار A/C والبكر بتاع التوزيع اللى فوق الكاسيت وخلاص http://i1357.photobucket.com/albums/...ps0d5ca476.jpg وفى نفس الوقت عشان انا عايز الموضوع دة يكون تفاعلى بمعنى كل المواضيع اللى انا عملتها فى القسم دة كانت بالشرح والصور ما عدا الموضوع دة لازم يكون تفاعلى لان بصراحة بصراحة انا اتسحلت على اما انتهيت منة واخد معايا فترة طويلة (متقطعة) تفكير وتصميم والاهم المكان واكتر من محاولة فاشلة وكل محاولة كنت بصورها عشان لو نجحت ارفعها بالصور فى المنتدى لكن للاسف فى الاخر كانت بتفشل وايديا اتجرحت اكتر من مرة دة غير ان انا كنت مجبور انى اتعامل مع الاعراض الجانبية السلبية اللى كانت بتحصل من كل محاولة فاشلة لدرجة انى مرة فكيت العلبة اللى تحت التلاجة بالماتور (وكلنا عارفين مدى صعوبتها ورخامتها) ومرة اضطريت انى افك الرفرف اليمن الامامى بتاع العربية (بعدين هقولكم لية) وبصراحة من كتر ما انا تعبت فكرت انى اطرح الموضوع بشكل تجارى بس كانت المشكلة انى طول موسم الصيف بكون مشغول فى شغلى وكمان فى تنظيم رحلات السنوركل والغطس الحر والتصوير تحت المية اللى فى الموضوع دة http://www.masrmotors.com/vb/showthread.php?t=113179 ففعلا مكانش هيبقى عندى وقت عشان كدة قلت هعملة مجانى للاعضاء بس عشان انا تعبت فية بجد بجد فقلت ضرورى الناس تتعب معايا شوية وتجتهد وعشان تبقى الفكرة واضحة وكلامى واضح انا هشرح دورة الهواء فى التكييف بالصور وبعدين هستنى اراء الاعضاء وافكارهم فى 3 حاجات اساسية الفلتر هيتعمل من اية (ودة الجزء السهل) ؟؟؟؟ وهيكون فلتر واحد ولا فلترين (ودة الجزء المحير) ؟؟؟؟؟ وهيكون مكانة فين (ودة اصل الفكرة) ؟؟؟؟؟ ولما حد من الاعضاء يقولى مثلا هنعملة من كذا وكذا وهيكون مكانة فى الحتة الفلانية مش هقولة انت صح ولا انت غلط لكن هرد علية بالصور من كل المحاولات اللى انا عملتها وهطلب منة التاكد من فكرتة بالصور بردو وهنبهة على العقبات اللى هتقابلة وهفكر معاة بصوت عالى وكل دة هيكون بالصور من واقع التجارب الفاشلة والتجربة الوحيدة الناجحة لحد ما يوصل هوة او غيرة من الاعضاء للفكرة الكاملة ساعتها هطرح الفكرة بالكامل وبالصور وبالتفاصيل المملة هبدا الاول شرح دورة الهواء المبسطة فى التكييف الاول دة شكل التابلوة http://i1357.photobucket.com/albums/...psdbaad9a4.jpg وبعدين هنشيل التابلوة خالص عشان نعرف الدنيا تحت ماشية ازاى والارقام اللى انا هحطها على الصورة ركز فيها عشان هنحتاجها كتير فى الشرح وفى التفكير http://i1357.photobucket.com/albums/...ps1b7b68b3.jpg لما بيكون الزرار دة على الوضعية دى http://i1357.photobucket.com/albums/...ps10e73b0d.jpg يبقى معنى كدة ان بداية دخول الهواء لدورة التكييف من داخل صالون العربية تحديدا من حوالين درج التابلوة من عند رقم 1 ولما بيكون على الوضعية دى http://i1357.photobucket.com/albums/...ps57c29032.jpg يبقى معنى كدة ان بداية دخول الهواء لدورة التكييف من برة العربية من عند الهوايات اللى تحت المساحات http://i1357.photobucket.com/albums/...ps3972bb37.jpg فى الحالتين الهوا بيدخل على موتور المروحة رقم 2 اللى بنتحكم فى سرعتة من البكرة دى http://i1357.photobucket.com/albums/...pscfd8357d.jpg وبعدين الهوا بيعدى على التلاجة اللى فى المكان رقم 3 يطلع هوا ساقع يدخل بعد كدة على الغرفة بتاعة سربنتينة السخن رقم 4 اللى بتعتمد على دورة المية بتاعة الموتور فى تسخين نفسها ودى الهوا مبيعديش منها ويتخلط بالسخن الا لو استخدمت البكرة دى عشان تخلط سخن ببارد http://i1357.photobucket.com/albums/...ps487b414e.jpg وهنا فية معلومة عايز اقولها ان دورة الفريون بتكون شغالة علطول حتى لو استخدمت السخن فى الشتا لانك لو استخدمت السخن بس بدون تخليط الهوا البارد او تشغيل التكييف حتى ولو بنسبة بسيطة نسبة الرطوبة فى الكابينة بتزيد وتحس نفسك اتخنقت والصالون اتكتم والازاز يشبر من جوة بسرعة بعد كدة الهوا بيدخل غرفة التوزيع رقم 5 واللى بنتحكم فيها من البكرة دى http://i1357.photobucket.com/albums/...ps7a1a77e8.jpg هى دى ببساطة دورة الهوا فى تكييف العربية الانوس طيب سؤال مهم وبيطرح نفسة هو الفلتر دة لزمتة اية؟؟؟؟؟؟ يعنى هوة رفاهية مثلا وترف؟؟؟؟؟؟ الاجابة لا الفلتر دة اساسى لان بدون الفلتر التراب اللى بيدخل بيتجمع على التلاجة لانها بتكون رطبة اثناء التشغيل وبيسد الشرايح بتاعتها فمع مرور الوقت تلاقى التكييف شغال بنص قوتة الحقيقية لان الشرايح بتاعة التلاجة اتسدت دة غير انك اول ما بتشغل التكييف بتلاقى ريحة عفونة طالعة من الفتحات وبتروح بعد دقيقة او دقيقتين من التشغيل عشان كدة تلاقى ناس تشتكى ان التكييف بالنهار يادوب ملطف الجو بالعافية جوة العربية لكن مبتسقعش من التكييف بالنهار ابدا وتلاقى الناس تروح لبتاع التكييف تشتكى من ضعف التكييف ويشحن فريون ومش عارف اية ويقولة الكباس والجوانات ...الخ والمشكلة كلها ان التلاجة مسدودة عشان مفيش فلتر هوا عشان كدة عملت الموضوع دة نيجى بقة لموضوعونا الرئيسى الفلتر هيتعمل من اية (ودة الجزء السهل) ؟؟؟؟ وهيكون فلتر واحد ولا فلترين (ودة الجزء المحير) ؟؟؟؟؟ وهيكون مكانة فين (ودة اصل الفكرة) ؟؟؟؟؟ |
رد: طريقة عمل فلتر هواء لتكييف لانوس ... بدون تفاصيل!!!!!!!
مع ان مش معايا لانوس ولا نوبيرا بس الحوار دة جامد
متابع |
رد: طريقة عمل فلتر هواء لتكييف لانوس ... بدون تفاصيل!!!!!!!
طبعا مشكور على المجهود الجبار اللى انت بذلته سواء فى التجارب المتتعدده الفاشله والتجربة الاخير الناجحة و كمان فى تصوير التجارب دى وقرارك بمشاركة المعلومة معانا وافادتنا بيها ..
انا مش دارس تابلوه الانوس اوى بس عاوز اقولك معلومه صغيره .. دايما خلى زرار سحب الهواء على وضعيه اعاده التدوير .. بكده هتحافظ على نضافه التلاجه من الاتربة وخلافه وكمان هتلاقى اداء التكييف افضل واستهلاك البنزين كمان هيقل (لان الكمبريسور هيفصل فترات اطول) .. تمام .. بالنسبة للفكره بتاعتك اظن انه هيكون فلتر واحد فى مدخل الهواء بتاع التلاجه فى مكان بعد التقاء مدخل الهواء الخارجى بالداخلى .. بس المشكله انك لما تحب تغيره لازم تفك الطبلوه تانى ودى طبعا شغلانه كبيره يا اما تعمل فلتر على مدخل الهواء الداخلى (وده امره سهل جدا وممكن توصله بفك درج الطبلوه بس) وفلتر على المدخل الخارجى (وده مش عارف ممكن يبقى ازاى لان العربية مش ادامى) ده تخيلى عن الموضوع .. ومستنى تعليقك .. |
رد: طريقة عمل فلتر هواء لتكييف لانوس ... بدون تفاصيل!!!!!!!
اقتباس:
بس بما انك مش معاك لانوس فانا مش هعرف اسألك على حاجة اقتباس:
|
رد: طريقة عمل فلتر هواء لتكييف لانوس ... بدون تفاصيل!!!!!!!
هى الشبكة دى مكان دخول الهوا للتلاجة ؟
http://i1357.photobucket.com/albums/...ps09599613.jpg الله اعلم ازا كانت هيا ولا لأ بس ممكن يركب عليها فلتر وخلص الكلام لكن ده ميمنعش ان التلاجة بتحتاج تتفك وتتغسل برضو حتى لو ركب لها 10 فلاتر http://i1357.photobucket.com/albums/...psd8e61444.jpg |
| الساعة الآن 08:20 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017