مصر موتورز مجتمع السيارات - تقرير عن الماهيندرا سكوربيو بنزين بعد اول 100 الف كم

http://www.masr1.com/di-XVZX.jpg

السلام عليكم،
حبيت اشارككم عن تجربتي مع سيارتي الماهيندرا سكوربيو بنزين موديل 2008
اولا العربية انا اخترتها بنزين و الحمد لله بعد ما شفت ازمة السولار حمدت ربنا و اتمنى ان التوكيل ينزل النسخة الجنوب الافريقية اللي هي بنزين لان هو حاليا بينزل ديزل بس.
العربية موتورها 100 100 ماركة رينو 2000 سي سي ناعم زي صوت الكورولا و عزم ممتاز باعدي بيها ال160 كم / ساعة مستريح و الموتور استهلاكه ممتاز وعالي التقنية 2 كامة ملتي بوينت انجكشن 16 صمام و هو نفسه موتور الرينو لاجونا 2000 و جميع قطع غياره متوفرة سواء في التوكيل او عند بتوع الرينو.
انا اشتريت العربية 4 في 2 و ماشتريتهاش دفع رباعي علشان اوفر في البنزين و ماتبقاش العربية ثقيلة و علشان انا مش بامشي غير على الاسفلت و العربية بصراحة احسن عربية لمصر بالنسبة للاسفلت لان موتورها مش كبير 2000 سي سي (وترخيصه 1% مش 2% علشان 2000 سيسي مش اكثر و كان اول سنة 1300 جنيه و كل سنة بينزل 5%) و لان عفشتها جبارة المساعدين بيعيشوا كتير جدا (مش زي السيدان اللي بترميهم كل 40 الف) و انت مش حاسس بالطريق اساسا لان العفشة ناعمة جدا ده غير وضعية القيادة اللي هي اعلى من الباجيرو في نفس علو الهامر و غير قعدة الكراسي المريحة جدا اثناء السفر، ده غير انها مش عربية طويلة انما تصميمها مربع بذكاء ماخوذ من تصميم الرانج روفر و دي ميزة رهيبة في الركن ، جرب كدة تركن مثلا عربية كومودو و انت تعرف الفرق. و هي مفيهاش حساسات ركن و عمري ما احتجت اني اركبلها ، الركنة سهلة جدا بعد ما تحفظ ابعاد العربية.
من ضمن الادلة على مدى قوة العربية انها معتمدة في الجيش الاسرائيلي اللي مش بيشتري غير انضف المعدات زي ما احنا شايفين و سامعين.
الباور ستيرنج بتاعها تحفة و سهل جدا و كهربائي، واحد صاحبي معاه فولكسفاجن جولف الشكل الجديد قال لي شعر في الباور بتاع الماهيندرا لما جربها.
التكييف ممتاز و فيه فتحات في الكنبة الخلفية.
لو مش عايز قطع غيار من التوكيل ممكن تستبدلهم بما يلي
- أي قطع غيار محرك (محرك رينو لاجونا 2000 بما فيها سير الكاتينة و البكر).
- فلتر الزيت (اي فلتر زيت رينو لوجان او لاجونا) موضوع الكاتينة ده مهم لان التوكيل بيغير الكاتينة كاملة ب 3000 جنيه بينما السير و البكر عند بتوع الرينو حوالي 400 جنيه و شوية.
- تيل فرامل امامي (فيه زيه بالضبط ماركة Bendix الفرنسية الشهيرة جدا و يبيقى له زايدتين بسيطتين من الاجناب بتشيلهم بالمكنة و هو أرخص من التوكيل ب100 جنيه)
- المساعدين (ممكن تستخدم مونرو و لكن يرجى التأكد من هذه المعلومة تحديدا قبل الشراء)
Front: Monroe Gas Part GT2028
Rear: Gabriel Safari Part G56116
- الاطارات : الاصلي بتوعها ممتازين وانا باغيرهم كانوا بحالتهم بس اللي احلى و اروع كمان الجوديير الالماني.

العيوب:
- الفرامل بتاعتها مفيهاش ABS ودي حلوها في الموديلات الاحدث. و عموما تيل بنديكس انا حاسس انه ممتاز و احسن من الاصلي.
- خزان البنزين صغير وفيه حوالي 12 او 15 لتر غير مستخدمين العربية ممكن تقطع و هي لسة فيها فوق ال10 لتر بنزين، الخراطيم و الجوانات بتشقق بسرعة و بيبقى فيه ريحة بنزين بعد ماتفول و فيه مرة سربت بنزين. ومفيش لمبة قرب نفاذ البنزين في التابلوه انا باستخدم مؤشر المسافة المقطوعة B علشان موضوع البنزين. بصراحة انا عايز اسأل اذا كان الواحد ممكن يركب لها خزان بنزين من عربية تانية انا ممكن اعمل التعديل ده لو حد من الاعضاء ممكن يدلي بدلوه في الموضوع ده يبقى له جزيل الشكر.

دي كانت وجهة نظري عن العربية طبعا انا لما اشتريتها قريت تعليق عن ان شكلها مش بيعجب بعض الناس (مع ان شايفها حلوة و هيبة و رياضية من جوة و برة) بس انا برضه حاسس انه فيه ناس بتبقى بتحب اللي بيضحك عليها بالعربيات الغالية و لما بتلاقي عربيات سعرها رخيص الفار بيلعب في عبها معندهاش اي ثقة في نفسها (لاحظ ان عربيات زي الباجيرو و كدة من اول ال700 الف و انت طالع و انا باتكلم عن فئة الجيب مش الهاف جيب و الكروس اوفر و الكلام ده انا باتكلم عن عربية جيب عالية و واسعة جدا من جوة. ميزة تانية خطيرة في العربية ان التكييف و لوحة القيادة مش ديجيتال و الفتيس المانيوال كمان بيوفر البنزين و يدي عزم اشد و كمان اوفر لتيل الفرامل و أأمن عن طريق الdown shifting النقل للأسفل لمساعدة الفرامل. و الميزة الاخطر ان صيانة الاجهزة البسيطة بتبقى ارخض و ابسط علشان كدة و بعد 100 الف كم انا شايف ان العربية دي هي الانسب لشوارع مصر المهم تغير الزيت و اي حاجة في ميعادها و ماتبخلش عليها تفضل جديدة معاك.