|
ضبط كهرباء الموتور والكاربراتير
انا عندى لادا 2107 موديل 2002
المشكلة عندى ان انا حاسس ان العربية مش مضبوطة يعنى كان عندى عربية قبلها لادا برضو كانت مضبوطة على الشعرة يعنى تيجى تدور اول مرة فى اليوم تدور وباقى اليوم تدور منغير ما ادوس بنزين لكن دية لازم ان انا ادوس بنزين علشان تدور فى كل فترات اليوم وتانى حاجة الكهرباء بتاعت العربية حاسس ساعات تعلى وساعات توطى نفسى واحد يعرف يضبطها على الشعرة اكيد فى طريقة ما ومكان سمعت ان المفروض الابلاتين بيتضبط بالفيلر كل الميكانيكى اللى بروحلهم مش بيظبطوا بالفيلر حاجة اخيرة المفروض امبير ال RPM يبقى على كام فى السلانسيةعلما ان العربية كاربراتير المكانيكى قالى المفروض يبقى على ال 0 الزيرو بس الصبحية لما باجى ادور بتدور حلو كان لازم افضل ساند رجلى على البنزين علشان متبطلش ومترعش والف شكر ليكم يا رجالة |
رد: ضبط كهرباء الموتور والكاربراتير
بص يا ريس
أولاً تكشف على فلتر البنزين, شوفه نضيف و لا لأ, و خلى بالك بيبقى شكله من فوق نضيف و الرواسب كلها من تحت مخلياه أسود هباب. يعنى تحاول تشوفه و تتأكد أنه نضيف. بعد كده تشيل الكلبستين بتوع الإسبراتير و تشوف الأبلاتين لادع و لا لأ. بعد كده تفك عمة الهوا تنضف فلتر الهوا بكمبروسر هوا مضغوط و تنضف الكربراتير و تنفخ فى البيكات بتاعته (خاصة السلانسية) و أخيراً تتأكد من البوجيهات إنها نضيفه (لا مهببه و لا مزيته) غالباً مشكلتك مش هتخرج برة الـ 4 دول: فلتر بنزين أو هوا غير نظيف - أبلتين (و أو كوندنسر) - بوجيهات - كربراتير (بيكات مسدوده) لو غير دول يبقى مرحله ثانية: ضبط الكهربا بتاعة الإسبراتير عند ميكانيكى سمعته حلوه. ضبط تاكيهات. لو بعد كل ده لسه الدنيا بايظه ... بيع العربية و أنت الكسبان :Bravo: بالنسبة للميكانيكى العبقرى إللى بيقولك السلانسية على صفر أنصحك تقطع علاقتك بيه تماماً. ده أصلاً ميعرفش يعنى أيه rpm. الطبيعى يكون على 700-900 لفة فى الدقيقة يعنى أقل من الواحد الصحيح (1000) فى ناس بتحب تخليه أقل علشان ميسحبش بنزين. طبعاً ده حسب مقاس بيك السلانسية عندك, بس المفروض يكون عدد لفات الموتور فى الحدود دى. |
رد: ضبط كهرباء الموتور والكاربراتير
اقتباس:
بص انا عملت اية :) انا اشتريت فلتر جديد واشتريت طقم بيجوهات ونضفت فلتر الهواء ونضفت الكاربراتير بس المشكلة ان الميكانيكى اللى قلتلى اقطع علاقتى بيه ده بيضبط الابلاتين منغير فيلر وده اكييد مش صح وتانى حاجة احب اشكر حضرتك جداً فى موضوع ال RPM اللى بيقولى عليه المفروض يبقى على صفر خصوصا العربية القديمة كان بيبقى تحت الواحد بشوية يعنى تقريباً على 7000 وكانت مضبوطة فا انا دلوقتى محتار اغير الميكانيكى واخلى ميكانيكى تانى يضبط كاربراتير والابلاتين بالفلر ولا اية ؟؟ والف شكر لحضرتك |
رد: ضبط كهرباء الموتور والكاربراتير
طيب بما إننا هنستبعد إن المشكله تكون من فلتر البنزين أو الهوا أو نضافة الكربراتير
و أنحسرت فى ضبط الكهربا و الإسبراتير عاوزين توضيح: هل السلانسية عندك نغمه واحده, و لا بيعلا و يوطى كل شويه لواحده؟ موضوع الأبلاتين إللى بيركب من غير فللر, أعتقد مش ده المشكله الميكانيكى بتاعى كان بيعمله برضه من غير فللر, و بعد كده بقيت بأعمله أنا, و طبعاً من غير فللر. (ممكن يكون الكلام ده غلط) متابع معاك رأى الخبراء فى الكهربا أستاذ هشام الجزار ... عبقرى كهرباء المحرك |
| الساعة الآن 12:22 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017