مصر موتورز مجتمع السيارات - الامانة في البيع والشراء .....!! لازم ترجع تاني

السلام عليكم
الموضوع ده بصراحة اصبح يضايق وخاصة انعدام الضمير وقلة الاخلاق في عملية الشراء والبيع
ندخل في الموضوع :
فيه ناس عشان تبيع عربيتهم لازم يكدبوا ويلفوا ويدوروا كل همه انه يخلص م العربية عشان يجيب غيرها حتي ولو فيها عيوب كتير ملهاش حصر ويا ريته بيصارح اللي هيشتري بكل حاجة لا .....! بيسيبه يلبس ويدخل في الحيط بعد ما المسكين يدبس فيها لانه باختصار بيكون ملصم فيها لغاية ما يخلص منها وبعدها ...............
تفتح بقها ع المسكين اللي دفع فيها دم قلبه ويا عالم جايب الفلوس ازاي ومدبرهم منين عشان كل طموحه اما يركب عربية يقضي بيها مشاويره او يشتغل بيها او تأني عياله من بهدله المواصلات وزحمتها .... بس للاسف بيلاقي نفسه عمال يدخل في حاجة وقبل ما يطلع منها يلاقي نفسه دخل في حاجة تانية واصبحت العربية بدل من وسيلة بقت عبئ عليه وبتاخد من قوت عياله
.........
طيب ليه ميبقاش عند اللي بيبع ضمير م الاول ويقول فيها كذا وكذا (( والله هتترد له في اي بيعه تانية لما ييجي يشتري )) مهي داين تدان
طالب فيها مثلا 50 الف لو سليمة بس تبعها بايظة بالمبلغ ده يبقي عشان خايف تقول اللي فيها لينزل 5 الاف جنيه من تمنها يعني عشان متخسرش تدبس اللي ادامك
يا اخي ده فيه حديث بيقول " رسول الله ‏ ‏صلى الله عليه وسلم ‏ ‏قال ‏ ‏رحم الله رجلا سمحا إذا باع وإذا اشترى وإذا اقتضي "
خلي عندنا امانه في البيع وفي كل حاجة
مفيهاش اي خسارة ليك ان صارحت المشتري بكل حاجة والله مش هتخسر فلوس وربنا هيعوضك دايما بالخير لانك باختصار عندك ضمير وعندك امانه
معلش كنت لازم اكتب الموضوع ده لاني لاحظت كتير من اللي بيجي يبع عربيته بيقول لك فابريكا وتطلع مغيرة نص ويقولك مفيهاش خربوش وتطلع عاوزة سمكرة ودوكو ويقولك البيع لدواعي السفر واهي كلمة عشان تتباع بسرعة وتحس انها لقطة ويقولك مرفوعة 10 سنين ويطلع العداد ملعوب فيه وغيره من الكذب والتضليل
ارجوا الحذر عند الشراء ومتتغرش بالكلام والمصطلحات الرنانة اللي قبل البيع
وخاصة من الناس اللي بقوا معنهمش ضمير ولا امانه (( طبعا فيه ناس كتير اوي محترمين وعندهم ضمير ))

ليس بالسهولة إن يعرض البشر ضمائرهم للبيع , و لكن من السهل إن تجد فئة أشهرت البيع
( مقولة اعجبتني )