|
البطاريه اتسرقت من قدام البيت
السلام عليكم ورحمه الله وبركاته
الحمد لله الذي لا يحمد على مكروه سواه , من كام يوم صاحي الصبح وبدور عربيتي مدرتش واكتشفت ان البطاريه اتسرقت MAD الحمد لله جبت بطاريه جديدة ( نسر55 ) بـ 290 جـ من غير القديمه طبعن وركبتها . انا ناشر الموضوع للتنبيه ان اسهل كبوت يتفتح هو كبوت 128 -127 - الادا وانا عملت الاحتياطات دي - خرمت مكان للوير بتاع فتح الكبوت لجوة شويه وربطه بافيز بلستك (عشان يبقى صعب الوصول ايه) - لحمت سلسه حديد حولين البطاريه عند الحداد ولفتها بشنبر عجل قديم عندي وقفلت عليها بقفل محترم شويه - اتفقت مع الحداد انه يعملي حل عشان اقفل على الاستبن بردة بقفل وان شاء الله اصور وابقى ارفع الصور واهم حاجه .... اهم حاجه ..... عشان نتقي السرقه نغطي العربيه ومنسبهاش من غير غطى لان الغطى بيحمي العربيه من الحرميه وربنا يستر على الجميع وانصح الجميع بتامين نفسهم او لو عندهم حلول اخرى للتامين يكتبوها في الموضوع دة عشان كلنا نستفيد :fun_15_8_204[1]: تحياتي |
رد: البطاريه اتسرقت من قدام البيت
ربنا يعوضك خير باذن الله ومبروك على البطارية الجديدة بالنسبة للكبوت عند حضرتك فيه هويات الهوايات دية موجود عندى زيها فى الادا بيكسر الهواية البلاستيك ويدخل بنز ويسحب الوير ويفتح الكبوت أنا شوفت عربيات حطط هويات نيكل أو حديد ولأغى البلاستيك اللى تتكسر بسهولة وأعتقد أن ديه فكرة كويسة جدا وكمان علشان العربية متتسرقش فى ناس بتعمل فاصل تيار كهرباء بزرار مخفى داخل السيارة أى كان المكان اللى حضرتك عايز تحط فيه السيارة وبكده العربية متتسرقش وفى حاجة كمان حضرتك بتعمل زرار بحيث السارق لما يفتح الكبوت أو الباب أو الشنطة كلاكس العربية يعلق ويفضل شغال لغاية لما حضرتك توصل للعربية وتدوس على زرار أخر مخفى تبطل الكلاكس وفى حركة تانية حضرتك كمان ممكن تعملها وأنك تشيل الفيوزات بتاعت تشغيل السيارة أو تخلع كبل الموبينة فالعربية متتسرقش وشوفت كمان من فترة واحد جايب كلابش زى بتاع المرور ومكلابش العربية وزيادة فى الحرص كمان ممكن تعمل حتيتين حديد فى الأرض بقفل منها تحجز مكان للسيارة ومنها تزود نسب اعاقة الحرامى لأنه دائما بيدور على الحاجة السهلة اللى متخدش وقت. وأرجو أنى أكون قدرت أفيد حضرتك. أخوك محمد :140109~347: |
رد: البطاريه اتسرقت من قدام البيت
شكرا أ/ محمد على المعلومات الجامدة :Wkiss5:
فعلن الهوايه البلاستك بتاعت الباب احد الثغرات السهله لفتح 128 لانها اتفتحت عندي قبل كدة :08da300846c84943ae1 والحل بتغيرها وانك تجيب النيكل ودي مش موجودة او تعدل البيبان كلهم وتخليه ذي التسعنات ودة مكلف انا عملت حاجه بعد ماتفتحت بعد قفل الهوايا ربط مسمار في طرفها بالباب بحيث يعيق فتحها تاني حتى لو كسر البلاستك بتاعها كله |
رد: البطاريه اتسرقت من قدام البيت
ياعم انا البطاريه بتاعتى اتسرقت 4 مرات ومن اماكن مختلفه، وبقت أكبر مشاكلى انى اركن العربيه فى مكان ابقى مطمن فيه ان البطاريه مش هتتسرق، لدرجة انى اديتها لواحد صاحبى يخليها عنده، ياريت يا جماعه اللى عنده حل للموضوع ده يقولى عليه ولو فى صور يبقى كتر خيره
|
| الساعة الآن 02:25 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017