|
الاسعار بين الحق والظلم
الكلام كتر في الفتره الاخيره عن الزيادات في كل شئ اسعار العربيات وقطع الغيار والاكل والملابس الخ الخ وكل ده مربوط بزياده الدولار اللعين وللاسف في مفهوم خاطئ دارج عند الناس الا وهو (مبدأ ليه النصب والسرقه ) بمعني تلاقي واحد رايح يشتري حاجه عارف ان سعرها 10 جنيه ويلاقي الراجل صاحب المحل بيقوله دي ب15 جنيه عشان في زياده حصلت في الاسعار يقوله طب وانا مال اهلي الحاجه دي عندك علي الرف من اكتر من 6 شهور يعني انت شاري بالسعر القديم . انت عاوز تضحك عليا تشتري بالقليل وتبيع بالغالي ؟؟؟؟؟؟؟ ومن مطلق خبرتي المتواضعه في الاقتصاد وبحكم عملي كمحاسب قانوني وخبرتي وعملي ايضا في مجال قطع الغيار لزم الاتي : توضيح فكره الزياده وليه الراجل صاحب المحل لازم يبيع بالسعر الجديد وللتبسيط بالبلدي حنضرب مثال مع بعض كان زمان لما تروح تشتري حاجه ولتكن قطعه غيار سعرها شبه موحد ولنفرض فلتر زيت مثلا كنت تسأل الراجل الفلتر بكام يقوللك مثلا 50 جنيه تقوله لاياعم ده 40 جنيه في كل مكان يقوللك ياباشا البضاعه زادت تقوله طب وماله بس الفلتر ده علي الرف بقاله كام شهر يعني جايبه بالرخيص تنصب عليا ليه وتقوللي زادت والكلام الفاضي ده وتسيبه وتمشي لاكن لما دخلت اللعبه فهمت الحقيقه وعرفت ان ظلمت ناس كتير بحسبه بسيطه جدا جدا لنفرض اني اشتريت الفلتر ده جمله ب30 وببيعه ب40 جنيه تمام ال10 دي منها 7 مثلا تكاليف نشاط يعني المصروفات اللازمه لاداره النشاط و3 جنيه ربح تمام نزلت الزياده ال30% يعني 9 جنيه فاصبح سعر الفلتر جمله 39 جنيه اذا سعر الفلتر اصبح جملته 39 جنيه وبحسبه بسيطه جدا اصبح سعر الفتر من 30 الي 39 جنيه سعر جمله يعني انا لو استمريت في بيع الفلتر للزبون ب40 اللي هوالسعر القديم حلاقي نفسي بعت الكميه كلها واصبحت دون مكسب بل عليا مديونه لصالح ايجار وكهرباء ومياه وتامينات وضرائب ونظافه وتراخيص مرتبات مخازن مصروفات عموميه الخ الخ حيندفعوا منين ؟؟؟؟؟؟؟؟؟؟؟؟؟؟؟؟؟؟؟ طيب ولما اروح اجيب البضاعه الجديده بالسعر الجديد حجيب منين ؟؟؟؟ اذا كان انا اكلت من رأس المال مبلغ كبير يعادل قيمه اجمالي التكاليف السابقه الذكر ؟ يعني بالبلدي خلال كام شهر لو ما تفاعلتش مع الزياده حتلاقي راس المال بح وحكون خسران ومديون وما اقدرش حتي اجيب بضاعه قد اللي كانت عندي فهمتوني ولا ايه ....... :fun_36_3_16[1]: :fun_36_3_16[1]: :fun_36_3_16[1]: |
رد: الاسعار بين الحق والظلم
معلش كلام حضرتك غير واضح لانه لو استمر فى بيع الكميه القديمة اللى اشتراها بالسعر القديم وهيبعها بالسعر القديم هيحقق نفس هامش الربح يعنى مثلا:
اشترى ب30 وباع ب40 يبقى الربح 10 انما لو اشترى ب30 ولما ارتفع السعر باع ب50 يبقى الربح عشرين انا على فكرة معاك ان التاجر بيتحمل كتير وعلية التزامات كتير وكمان كونه انه يشترى بالسعر القديم ولما تغلى يبيع بالسعر الجديد وكمان لو المشترى مش عاجبه السعر براحته حتى لو باع الحاجه ام 30 ب 100 لكن الفكرة فى الامانة والمصداقيه يعنى هوة لما بيعمل كده كل من عندة اى سلعه بيعاملة بنفس النظام وسلعات كثير من التجار بيحققوا ارباح خرافيه نتيجة الاختلاف فى الاسعار زى لما حصلت من كام سنه مع السجاير والزيت والسكر وغيرة كتير وساعات بيكون رد التاجر انه لو الاسعار نزلت من بيحاسبه على فرق السعر لما بيكون هوة شارى بالغالى. انا راىى ان الموضوع دة محتاج فتوى شرعيه تعرفنا موقف الدين منه وتحياتى :140109~347: |
رد: الاسعار بين الحق والظلم
اقتباس:
اولا بشكر حضرتك علي مشاركتك الجميله وبرضه للاسف المعلومه مش واصلاك نفس حالي بالظبط من فتره قليله بس انا حبسطهالك زي ما انت قولت السلعه ب30 جنيه والراجل بيبعها ب 40 جنيه اذا في فرق 10 جنيه عباره عن 8 جنيه تكاليف و 2 مكسب الراجل تمام حصلت الزياده اصبح سعر المنتج 39 جنيه تمام لو الراجل باع بالسعر اللي هوه 40 يبقي خسر 1 جنيه من المكسب بلالضافه انه دفع من جيبه ال8 التكاليف المطلوبه للنشاط حتقوللي السلعه كانت جايه ب 30 من الاول مش ب 39 تمام اقولك انه لما يشتريها تاني حيشتريها بكام ؟ 39 صح يعني فرق كام 9 جنيه طيب وهو كسبان كام ؟ 2 جنيه بس اذا التاجر حيتحمل خساره فرق السعر في بضاعته 7 جنيه علي القطعه الواحده . اذا في 10000 قطعه في المحل ب 70000 جنيه خسااااااااااااائر طيب ليه يتحملها التاجر :fun_36_3_16[1]: |
رد: الاسعار بين الحق والظلم
نهار ابيض 100 مشاهده ومشاركه واحده بس :shwt: :shwt: :shwt: :shwt: |
رد: الاسعار بين الحق والظلم
معلش أسمحلي أختلف معاك
لو التاجر باع البضاعة القديمة بسعر البيع القديم مش هيخسر بالعكس هيكسب الربح المعتاد عنده بالإضافه لشعور العميل بأن التاجر في صفه و أنا اليومين دول بأشوف الكلام ده عملي انا صاحب مطبعة و بأشتري الورق من تاج معين من سنين اول أمبارح قالي الأسعار زادت لكن أنا هأبعت لك الورق بنفس السعر القديم لأن الورق ده عندي من الأول هوه كده ما خسرش هوه كسب المكسب العادي بالإضافه لشعوري انه شاريني كعميل عنده و بيزود الصلة بيني و بينه و لما يشتري خامات جديده بالسعر الجديد هيبيعها بالسعر الجديد و في الغالب بنفس المكسب و ممكن يقلل المكسب شويه عشان يدي انطباع انه بيمشي السوق فهوه مش هيخسر بالمرة لو باع البضاعة القديمة بالسعر القديم و باع البضاعة الجديده بالسعر الجديد أما مسئله يبيع بكام و يكسب كام هوه حر طالما ما بيحتكرش البضاعة بالأخص فيما هوه ضرورة لحياة الناس ذي الأكل مثلآ و الدواء اما نسبة المكسب مفيهاش حرمه مطلقآ و كما سألت احد العلماء في الحرم قالي اشتري بريال و بيع بميت ريال بس ما تحتكرش سلع ذي الاكل مثلآ و السوق مليان تجار و مليان زباين الي ما يعجبكش سعره اشتري من التاني لكن مش منحقك تقول عليه ده حرامي عشان بيبيع بالغالي هوه حر انت اشتري من حد غيره أنت كمان حر و لو اضطريت لظروف سفر مثلآ و على الطريق تشتري حاجه بسعر غالي اعلم ان هذا التاجر مش كل ساعه عنده زبون يعني كل فين لما بيبيع بيعه هوه فاتح في الحته المقطوعه دي على اساس كده و مفهوم للجميع انه مش هياكل زلط يعني لازم يكسب من بيعه و لا اتنين كل المكسب الي بيكسبه تاجر في وسط البلد من عشر بيعات و مما سبق التاجر حر يبيع البضاعة بالسعر الي على مزاجه و الزبون الي مش عاجبه يدور على تاجر سعره ارخص لكن ما تقوليش هوه لو باع البضاعة القديمه بالسعرالقديم يخسر ارجو أنك ما تزعلش سلام |
| الساعة الآن 02:58 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017