نداء لأهل الخبره افيدونا
 

أولا كل سنه و انتم طيبين و دائماً بخير
انا يا جماعه لسه حالا بايع عربيتي الاسبيرانزا 113 a المهم أني حمدت ربنا علي أني خلصت منها ... دلوقتي لفيت السوق علي عربيه تكون محترمه و حماله آسيه و مشاكلها معدومه او قليله في حدود 100 ألف جنيه لقيت البيرسونا و الجين تو و البريليانس كروس ( انا عاوزها اتوماتيك ) المهم أني دلوقتي بعد ما شفت و سمعت عن التلاته عربيات دول لقيت أنهم افضل حاجه فرأيكم إيه أجيب أي واحده منهم ؟؟ و اللي مخوفني أن سعر أعاده البيع واقع جداً فلو سمحتوا تفيدوني أيهم أحسن و احتماله عالي و يكاد يكون خالي من المشاكل. و إيه سبب التفضيل ؟؟ رجاء الإفادة انا شبعت قرف مع عربيتي القديمة أرجو أن يكون الرأي بحيادية تامه. و ألف شكر

رد: نداء لأهل الخبره افيدونا
 

معلش انا حسأل حضرتك على عربيتك القديمة هيا اة كانت العيوب لموجودة فيها عشان انا محتار بين الاسبرنزا A113 و جاك A10 و مش عارف اجيب مين و شكرا

رد: نداء لأهل الخبره افيدونا
 

بص أنا اللى اقدر افيدك بيه الاسبيرانزا لان الجاك ماعنديش معلومات حلوه او وحشه عنها
أولا العربيه اللي كانت معايا بعد 7000 كيلو الدينامو باظ و بقي بيقطع و غيرته علي حساب التوكيل ، الطنابير إتاكلت و غيرتها مرتين علي حساب التوكيل و بخناقه حساس ال abs للعجله الشمال غيرته لانه باظ بعد حوالي 30000 و ده علي حسابي سلوك البوجيهات غيرتها لانهم في التوكيل كسرو فبره البوجيه التالت الزجاج من أول ما إستلمتها لحد ما بعتها و دايما في مشاكل في المكنه و نوعيه المكنه زباله ( عندي الزجاج الخلفي يمين و شمال ) مش عارف تقريبا في مشكله في كهربه العربيه لإني غيرت تلاته بطاريات و آخرهم فارتا ألماني مع العلم أنا العربيه معايا من 2008 و كنت جايبها علي الزيرو ، العفشه ناشفه جداااااااااااااااا جدااااااااااا و بسببها غيرت كاوتش مرتين ( العربيه عامله 60000 كيلو ) آه المساعدين خفاف جدا جدا جدا و غيرت واحد خلفي علي حساب التوكيل لانه كان جايب زيت و بعدها بشهر تقريبا غيرت الاربعه بمساعدين ألماني من شارع دمشق و طبعا دول أحسن آه و نسيت أقولك إن حصل الصيف اللي فات إن مثلث التوزيع اللي طالع من الرادياتير بيخش علي الموتور علشان دوره التبريد إتكسر أو داب مصنوع من بلاستيك ردئ للغايه و العربيه سخنت و ربنا ستر و رحت لميكانيكي و عملي مثلث نحاس و ركبته و إشتريت دماغي و لحد لما بعت العربيه كان الردياتير فاكك لحام من فوق يعني محتاج تغيير و قلت عليه للمشتري علشان يغيرو هوه و خسرت جامد من تمنها بعتها ب 33 ألف بس و كنت جايبها ب 57 ألف ده غير اللي صرفته عليها .... الموتور حلو و قوي و سحبته حلوه قوي بس أنا زهقت من المشاكل دي و تعبت ده غير الانتظار في الصيانه من 8 صباحا لحد 4 مساء
ممكن تفيدني أنا في الاختيار بتاعي جزاك الله خير

رد: نداء لأهل الخبره افيدونا
 

اشكر حضرتك و بشدة الحمد لله ان حضرتك قولتلي على البلاوي دو كلها قبل ما اجبها ان شاء الله الامل ف الجاك و بشكر حضرتك مرة تانية :THUMBS~220: و بالتوفيق لحضرتك ان شاء الله

رد: نداء لأهل الخبره افيدونا
 

أمل مين و عمر مين ... برأيي الجاك لو مش زي أسبرانزا هتكون أسوأ

سيبك من الصيني كله و اشتري دماغك !!!!

أنا عموما أنصحك تدخل منتديات الصيني و تشوف التقارير و شكاوي الأعضاء

من بحثك هتقيم العربية كويس ...

أتمنى لك كل التوفيق في إختيارك ... و طبعا أولا و أخيرا لا تنسى الإستخارة يا غالي .