مصر موتورز مجتمع السيارات - تقرير عن تعديل عزل الماروتي

اولا السلام عليكم ورحمة الله وبركاته
ثانيا كل سنه وانتم طيبين وعيد اضحي سعيد علي الجميع
ونسئل الله ان يرزقنا جميعا زياره لبيته الحرام

انا بقالي يومين قولت استغل فرصه اجازة العيد وازود العزل في المراوتي لاني ساعات كنت بحس بحرارة الماتور وفي الشتاء كنت بشعر ببروده الجو من صدر العربيه
قومت توكلت علي الله واشتريت متر عازل حراري ب 10جنيه المتر من السبتيه جمب الشغل عندي
بعد ما اشتريته حسيت انه مش هينفع لانه العازل الحراري بتاع البتوجازات
قريت الموضوع ده هنا وعجبتني الفكره

طريقة تركيب أرضية جلد للسيارة و عوازل الصوت ( بنفسك ) بالصور

قولت انزل المناصره اسئل واشتري لقيت فوم عازل حراره وصوت ولقيت كمان لباد حراري وكمان لقيت فرش جلد للأرضيات
قولت اشتري العازل الفوم الاول جيبت مترو نص وروحت واتكلت علي الله وابتديت افك في التبلوه بصراحه اخد مني وقت حوالي 4 ساعات وكانت النتيجه بالشكل ده

http://www6.0zz0.com/2012/10/24/14/170055403.jpg

http://www6.0zz0.com/2012/10/24/14/948221680.jpg

بصيت علي العزل بتاع العربيه لقيته بصراحه ممتاز
بس المشكله كان متخلع من مطرحه كل اللي كان عاوزه انه يتشد مكانه كويس وخلاص
قولت طالما فكيت ازود العزل بالمره لقيت العازل الحراري بتاع الفرن اللي اشتريته ينفع يتحط تحت اللباد ابتديت اقص واخد مقاسات كويس
وقمت بوضع العازل الحراري علي صاج صدر العربيه ونضفت اللباد كويس وظبطه تاني مطرحه والشغل ده اخد مني يوم لاني لقيت الكهربائي اللي مركبلي الانزار كان عاكك الدنيا واسيب السلوك من غير عزل كويس ابتديت اظبط سلوك الكهرباء واعزلها كويس بشريط لحام
لحد هنا انا وقفت فاضل عزل الارضيات بالعازل الفوم ان شاء الله ابتدي فيه النهارده واكمل ليكم الموضوع