مصر موتورز مجتمع السيارات - اشتريت اللوجان 2013 أتوماتيك (المقارنة - التقسيط

السلام عليكم ورحمه الله وبركاته

الصراحة أنا بكتب الموضوع ده ردًا للجميل
جميل هذا المنتدى الرائع اللي استفدت منه كتير أوي في اختياري لأول زرو في حياتي

المهمه كانت شراء عربية لا تزيد ثمنها عن 80 ألف جنيه
وأنتوا عارفين أن في هذه الفئة السعرية هيا اللوجان الأتوماتيك الأختيار الأفضل والفضل ليكم لأنكم عرفتوني عليها

خبرتي في العربيات
شاهين 2000
لانوس 2004
فيرنا 2008
طبعَا من هذه الخبرة خلاني مفكرش لحظة في الفيرنا أو اللانوس
الفيرنا مش كوري دي هندي تجميع مصري
والشيفروليه صيني تجميع مصري وبلاش أي هاوي من هاواه شفيروليه يقولي أمريكي :110105~127:

المقارنة كانت بين:
اللوجان اتوماتيك
BYD أتوماتيك
برتون ساجا
الأفيو مانيوال
الفيرنا 2013 (عشان أكون اديتك فرصتك الأخيرة)

أنا قلت عشان أبقى موضوعي وبلاش أمشي ورا قلبي وعشان تعبان في كل قرش في العربية دي لازم اروح اذاكرهم في النت وانزل افصصهم في التوكيلات ودي كانت أحسن طريقة أوعي تسأل أي سمسار كفتجي أو واحد قريبك كل اللي بيفهمه انه بيسوق بقاله عشر سنين طز في كل ده :017165~155:.

سيبكم من اللوجان الأتوماتيك عشان مش هقول فيها أكثر من اللي قولتوه

BYD أتوماتيك وشوفتها في سمير الريان
حلوة وجميلة بس عيبها ان الموتور اللي نازل معاها مش بتاع لانسر البومة ولكن المرة دي مكتوب عليها بي واي دي، والتقفيل بتاعها سىء وخصوصًا فتحة السقف.
صيني صيني يعني :tng: فقلت الله الغني
تقييمي لتوكيل سمير الريان:
كويسيين بس اللي مستغرب له أن كل ما اقابل واحد هناك يقولي أنا مدير التسويق :smileW4: وعنده كل العربيات اللي في الدنيا لأنه بعمل إعادة بيع للسبع وغيرهم

بروتون ساجا
العربية تقفيلها كويس وبروتون شركة محترمة بس لسه عليها كتير لو جين أو برسونا كنت هفكر بس للأسف صعب ينافسوا في الفئات السعرية دي وكمان الموتور 1300 عادي جدًا من شديد زي ما الناس بتقول.
الخلاصة مش زي جين أو برسونا خالص شغل على قد فلوسك واللي شفته كان 2012 ووكيلها عز العرب وبلاش اشتم:fun_36_1_30[1]:
واللي قفلني منها لما شفت الفيديوهات بتاعه شاب بيقارن بينها وبين اللوجان بصراحة قمة السخافة بطريقة خليني كرهت العربية من أسلوبه ده ANAA7TG.

الأفيو مانوال
ليه مانوال عشان على قد فلوسي وزيادة كام ألف كنت هستلفهم وأشمعن شيفروليه عشان كنت في المصرية للسيارات وأنت لو في المصرية في السيارات وناوي تشتري صاروخ تروح بيه القمر هقولك متجيبه شيفروليه :011:، توجيه غير طبيعي من بيائعين المصرية للشيفروليه يمكن عشان عمولتهم أعلى في الشيفروليه بس البياع استفزني خصوصًا لما قالي "هتركب عربية روماني ليه يا بيه متركب امريكي مضمون تقل ايديك وهات أفيو" :00020080: طبعًا أنا قمت معاه بالواجب
العربية عادية جنط 14 التقفيل وحش أعلى من البي واي دي بس مصري لم يشدني إلا فقط الشكل الخارجي المميز الصراحة بس.
وكمان العربية فوق الـ 100 تخوف جدًا بتعوم دي لما جربتها مع اختى، ضحكوا عليها في المصرية وخاوهلوها تشتري أفيو.

الفيرنا 2013
في الزبالة دي حبيبتي هو أنا أنسي :129E17~143:
نظرة مختصرة على العيوب 4 كوتشات نسر الكلاب تدفع 80 ألف في عربية زيرو يدوك 4 فرد نسر، الفرق بينها بين 2012 الطاسات فقط لاغير :clapW15: بصة من الخارج وبصه على الكبوت وبصه من بره خلوني اقول إنسي يا عمرو حرام فيها أشتريها زيرو لا تغيير ومراتي مسكتني من دراعي وقالتلي بلاش فيرنا تاني يا وليد

في النهاية لوجان ولا سانديرو ولا ستب أواي
أخترت لوجان عشان الشنطة فأنا شخص بيستخدم شنطة العربية كدولاب تاني لو احتجت مني أي حاجة أجيبهالك من شنطة العربية

قررت اشتريها قسط وكان الأختيار مع بنك ناصر لأنه أقل فائدة 6.5%
المهم روحت على طول على البنك اللي في وسط البلد البنك من العصر الناصري بجد :fun_36_1_31[1]:
انا قسطت بضمان وديعة حطيت وديعة بأسمي بقيمة 45200
ودفعت مقدم 12000 وقسط شهري 1506 لمدة خمس سنين
مع كام صورة بطاقة ووصل نور وعرض سعر من الوكيل أو المعرض لو فيهم رقم الموتور والشاسيه هتخلص في نفس اليوم لم مفيهومش هتضرب مشوار زيادة
هتقعد تملى حبه ورق وهيقولك عدي عليها بعد يومين عقبال ما الورق يأخد موافقة
انصحك تروح يوم اجازتك الساعة 9 صباحًا تكون هناك عشان تخلص في الروقان
المعاملة ممتازة وناس محترمة ومفيش أي شاي بالياسمين هناك

أشتريت العربية من الطارق
لانه الوحيد اللي كان عنده الرينو بكل فئاتها وألوانها وخصوصًا النبيتي أقوى لون في اللوجان بعد الموافقة من البنك جيبت للطارق الورق يوم الأحد وأستلمت يوم الخميس وكان موعدي مع مندوب الطارق أمام المرور، طبعًا في ناس سألتني أي ده مستلمتهاش ليه؟ ببسباطة لو كان فيها الهوا كنت سيبته في المرور وروحت :vctry:.

كان الموعد الساعة الساعة 7:00 صباحًا مع عم سيد امام الكابوس مرور فيصل
المهم الطارق من بيديك أي هدايا مع العربية بس بيدك عربية ممتازة كله زي ما الكتاب بيقول استملت العربية في دقيقتين وانا في طابور الفحص المفتاحين الكوريك الاستين الطاسات والكتالوج والعربية كانت عاملة 70 كيلو بس لما عرفت أنها كانت جاية افراج 1/9 خلاني مزعلتش والكيس متشال من على كرسي السواق وده زعلني جدًا لأن مش من حق السواق يشيله ولكن من حالة العربية كنت منتشي ومكنتش عايز ازعل حد :danceW7:.

المندوب كان صباح السلكان استاذ ورئيس قسم clapclap كان بيقولي ادي ده وادي ده ومتديش ده نص ساعة كنا فحصنا وقدمنا ودفعنا وقعدنا على القهوة نفطر ونشرب شاي ورجعنا استلمنا النمر والرخصة وكانت الساعة 9:00 أخر فلوس دفعتها 20 جنيه للي بيركب النمر وواحد درفه قالي 50 جنيه ركنه قالي المندوب اديله 5 قعد يرقص ويدعيلي :10FEE3~144:

ملاحظة: النمر في فيصل الأن م ص :01A0FF~139:
وده أكتر شىء ضايقني، افتكرت اعلان أحمد حلمي وهو بيستلم النمر ط ر ى، ولكن إحنا مصيبتنا كانت أكبر وحسبي الله في اللي اختار الحرفين دول.

طلعنا في ساعتها على البنك عشان من مميزات بنك ناصر أنه مش بيصرف شيك المعرض إلا مع لما أرخص وأمض هناك أني استلمت وهكذا، ساعة طريق وركنة و10 دقائق في بنك ناصر وخلصنا.

خلاصة مصاريف اليوم 900 جنيه تراخيص ورشاوي
150 جنيه للمندوب وبصراحة يستاهلهم
40 جنيه بعتهم للناس اللي غسلوا العربية وده عرف مشهور في أي عربية زيرو

وبقيت انا والعربية مع بعض وفي طريق العودة تذكرت رحلة المقارنة والاختيار وخلافه العربية ناعمة جدًا الموتور 110 حصان بجد التسارع بتاعها هايلة الفرامل لو حد كان قالي انها ABS كنت هصدق مش بتسخن العزل بتاعها هايل اوبشن المكالمات الموجود في الكاسيت ممتاز خلال المسافة من البنك للبيت حمدت ربنا وشكرت فضله على الاختيار.

عيوب لم أجدها في اللوجان:
1- مفيش نتشة خالص .
2- مفيش سخونة طالعة، معنديش سخونة خالص طالعة من تحت.
3- صوت الموتور مش عالي خالص بالعكس مش هتلاحظ انك مدور أساسًا غير لما تشغل التكييف.
4- استهلاك البنزين مميز جدًا 80 كيلو طير شرطة واحدة حوالي 5.5 لتر

عيوب اللوجان حتى الأن:
1- جنوط عادي مش سبور.
2- مفيش دلايات ومش عارف ليه واشمعن.
3- لازم تشب عشان تشوف بوز العربية استحالة تشوفه وأنت قاعد
4- الطاسات بلاستيك تعبانه.

العربية عاملة حتى الان 170 كم
معملتش فيها أي حاجة غير حاجة واحدة مليت الكاوتش نيتروجين وركبت الطاسات

مش عارف أيه ممكن اقوله تاني أنا قولت كل اللي فاكره عشان أحاول ارد جزء من جمايلكم عليا
واتمنى موضوعي يفيد ناس تانية زي ما فادني

أسألوني وأنصحوني
وأنا تحت أمركم