مصر موتورز مجتمع السيارات - طريقة مبتكرة لحل مشكلة الحارة العمياء لسيارتك بتكلفة 20ج ...بالشرح التفصيلى والصور

السلام عليكم ورحمة الله وبركاتة

اكيد كل واحد مننا راكب عربية اتعرض لمشاكل بسبب الحارة الميتة او الحارة العمياء ايا كانت مسمياتها

والحارة دى المقصود بيها المنطقة اللى انت مبتعرفش تشوفها فى مرايات الجنب سواء اليمين او الشمال وراك وانت ماشى

بمعنى ابسط لو افترضنا ان انت ماشى فى طريق 3 حارات وانت ماسك الشمال وعايز تروح اقصى اليمين لاى سبب فانت بتبص فى المراية اللى على يمينك فبتكشف لك جزء من الطريق
لكن مش كل الطريق

ولو فكرت تاخد نفسك خطف لاى سبب عشان تروح اقصى اليمين بتبقى خايف لتكون فية عربية فى المنطقة اللى انت مش شايفها وتخاف تخبط فيها

دى حالة

الحالة التانية لما تكون راكن موازى للرصيف وعايز تطلع فبتضطر تبص لورا او تميل بجسمك لقدام ناحية الدركسيون عشان تشوف فى اخر طرف المراية قبل ما تطلع

الحالة التالتة لما تكون طالع طريق سريع عالى او فى نفس المستوى زى الدائرى مثلا بتضطر وانت طالع انك تبص اكتر من مرة شمال وورا عشان تشوف اللى جاى

والصورة اللى جاية بتشرح وتوضح المقصود بالنقط العمياء او الحارة الميتة او الحارة العمياء

http://i1357.photobucket.com/albums/...ps616fa428.png

وبدات الناس تفكر فى حلول ولجأت لحل المراية الصغير اللى بتتلزق فى اقصى طرف المراية زى كدة مثلا كحل

http://i1357.photobucket.com/albums/...psd8468bda.jpg

وفية ناس لجات لحل تانى وهو المراية المتوسطة نسبيا لتركيبها فوق المراية الرئيسية كونها اكبر شوية

http://i1357.photobucket.com/albums/...ps9d3c6396.jpg

وانا واحد من الناس جربت الحلين دول

والواقع هما حلول ومش حلول لان كانت اكبر مشكلة بتقابلنى واكيد بتقابل اللى بيستخدمهم هيا الابعاد لان المرايتين دول لانهم مرايات محدبة فالمقاسات والابعاد فيهم مختلفة بشدة

يعنى العربية اللى بيتشوفها فى المراية بعيدة جدا ممكن تكون ورا العربية ب 3متر مثلا وبالتالى بالنسبة للى مش واخد عليهم بيلاقى المسافة بينة وبن العربية اللى ورا بعيدة فبينقل
نفسة من الحارة اللى هو فيها للحارة اللى قدام العربية اللى وراة على اعتبار انها بعييييييدة زى المراية ما موضحة

وهنا بتحصل الحوادث

او اضعف الايمان هتسمع كلاكس هستيرى وشتيمة من اللى جاى وراك

وهنا بدات افكر فى حل للمشكلة بتاعة الحارة الميتة او الزاوية الميتة ووصلت لحل نصة تقليدى ونصة افتكاسة من عندى

رحت اشتريت مرايتين بانوراما الواحدة ب 10ج ودة شكلها

http://i1357.photobucket.com/albums/...psdffaaa48.jpg

وهيا بتركب عادى على مراية الصالون بتاعة العربية بمفك بمنتهى السهولة وهتلاقى سواقين كتير من بتوع التاكسى مركبينها لكن بيستخدموها عن طريق انهم يظبطوها فى المنتصف
بحيث انها تجيب يمين وشمال وورا

انا بقة عملت العكس

ثبتها بحيث انها يكون اولها من ناحيةالشمال شايف القايم الاخير اللى ورا السواق وبقيتها كلة جايب الحارة الميتة فى الناحية اليمين
زى كدة

http://i1357.photobucket.com/albums/...psfe27aed1.jpg

وعشان تعرف الفرق اللى هيا بتعملة انا هقطع صورة المرايتين من الصورة اللى فاتت وهوضح لك الفرق

دى الصورة بتاعة المراية العادية بتاعة العربية

http://i1357.photobucket.com/albums/...psd7ee0979.jpg

ودى الصورة بتاعة المراية البانوراما

http://i1357.photobucket.com/albums/...psd555e96c.jpg

عايزك بقة تدقق فى الصورتين وتطلع الفرق الرهيب فى تغطيةالمراية البانوراما

اولا هتلاحظ فى اقصى اليمين لمراية العربية راجل عجوز ورا منة طرف شجرة ودى اقصى حاجة مراية العربية ممكن تغطيها

لكن لوبصيت على المراية البانوراما هتشوف الراجل العجوز وهتشوف معرض سيارات فى اقصى اقصى اليمين

وعشان تبقى متخيل الفرق الرهيب فى تغطية المراية للحارة اللى بعد الحارة الميتة انا خدت لقطة خارجية للعربية وهيا واقفة فى نفس المكان وهتلاقينى معلم باللون الاحمر
عل المساحة اللى كاشفاها مراية العربية ومعلم باللون الازرق على المساحة اللى كاشفاها المراية البانوراما

http://i1357.photobucket.com/albums/...ps6cf4ddb5.jpg

وراجع الصور اللى عدت كلها وانت هتشوف الفرق الرهيب
ـــــــــــــــــــــــــ ـــــــ

كدة خلصت الجنب اليمين بالحل التقليدى اللى انا شرحتة

نييجى بقة للجنب الشمال اللى هو جنب السواق وهنا كانت الافتكاسة او الابتكار البسيط

جبت المراية البانوراما التانية وقطعت تلتها من على اليمن وتلتها من على الشمال بالالماظة بتاعة الزجاج والجسم البلاستيك قطعتة بصفيحة منشار حدادى

وبعدين ثبتها فوق المراية بتاعة العربية ودة كان شكلها

http://i1357.photobucket.com/albums/...ps28ba440d.jpg

وعشان تعرف الفرق
هدخل جوة العربية
وهاخد صورة للمراية بعد التثبيت ودة شكلها

http://i1357.photobucket.com/albums/...ps412dd656.jpg

الصورة اللى جاية
صورة مقربة للمراية وتغطيتها

http://i1357.photobucket.com/albums/...ps6d6d9a86.jpg

طبعا مش محتاجة شرح

انت بنظرة واحدة هتشوف الفرق الكبير جدا فى التغطية وكشف الحارة اللى بعد الحارة الميتة

ونزلت بردو وخدت صورة للعربية وهيا واقفة فى نفس المكان
وهتلاقينى معلم باللون الاحمر على المساحة اللى كاشفاها مراية العربية ومعلم باللون الازرق على المساحة اللى كاشفاها المراية البانوراما

http://i1357.photobucket.com/albums/...ps79339fc1.jpg

الموضوع سهل جدا
وتكلفتة 20ج فقط
وممكن اى حد يعملة فى عربيتة
والفرق عن تجربة ممتاز جدا

ولو حد محتاج يستفسر عن اى تفاصيل انا حاضر