ليه العربيه ساعات تحدف مني وساعات تبقي ماشيه زي الفل
 

يا جماعه انا خلاص هاتجنن العربيه ( 128 موديل 84) بقالها يومين بتحدف مني وهي ماشيه لوحدها كده والنهاررده الصبح كان عندي مشوار فى القاهره الجديده وانا ساكن فى الشيخ زابد وبصراحه كنت خايف اطلع الدائري علشان موضوع الحدفه ده بس استخرت ربنا واستعنت بيه وطلعت الدائري المفاجئه ان العربيه كانت ماشيه زي الفل من غير ماتحدف ولا مره ولما كنت راجع على الشغل فى 6 اكتوبر العربيه رجعت تحدف مني تاني.
اللي انا عايز اعرفه بقي هو طبيعي ان العربيه تحدف لما اعدي على حته مكسره فى الارض او على عيون القطط الغبيه اللي ماليه الطرق كلها.
هل ممكن ان يكون فى حاجه فى الاسفلت هي اللي بتخلي العربيه تحدف لاني ملاحظ انها بتحدف مني فى الطريق اللي بروح منه الشغل وارجع منه انما ففى اغلب الاحيان ( 90%) مش بتحدف فى حته تانيه.
على فكره انا لسه مربط العفشه ومغير جلب الميزان وجلب الزوايا ورحت بعد كده ضبط زوايا.
يا ريت حد يقدر يفيدني لان الموضوع ده هايجنني

رد: ليه العربيه ساعات تحدف مني وساعات تبقي ماشيه زي الفل
 

فى رأيى...الشوارع عندنا الميل بتاعها مش مظبوط عشان كده طبيعى جدا انك تلاقى العربية بتروح يمين او شمال لما تسيب الدركسيون ...بس بالمعقول ... اظبط كاوتش على مقاس واحد يعنى مثلا 30 ...و جربها ف طريق سالك ...اجرى فوق ال 70 و سيب الدركسيون بحذر ......ممكن تكون عايزة رصاص .......اما حكاية الحتت المكسرة اللى بتخليها تحدف .....انا شايف ان ممكن العربية هى اللى خفيفة على الارض او كنت بتجرى فوق ال 110 مثلا ......اعمل تشيك على الجنوط و الرصاص بتاع الجنوط و اظبط كاوتش و امشى بسرعة معقولة و ف طريق سالك و قولى ايه الاخبار ... تقبل مرورى !ROSE4UROSE4U

رد: ليه العربيه ساعات تحدف مني وساعات تبقي ماشيه زي الفل
 

عارف انا كانت بتحصل معايا نفس المشكلة وتخيل السبب كاوتشة الميزان التافهة اللى للاسف متطلعتش تافهة

رد: ليه العربيه ساعات تحدف مني وساعات تبقي ماشيه زي الفل
 

اكشف علي جلب المقصات لانها سبب الحوار ده معايا دلوقتي وحغيرهم قريب ان شاء الله

رد: ليه العربيه ساعات تحدف مني وساعات تبقي ماشيه زي الفل
 

كانت عندي المشكله دي وحلها انك تكشف على بطاحات المساعدين عند بتاع زوايا وممكن يكونو محتاجين تشحيم بس