مصر موتورز مجتمع السيارات - انا اسف بس حسيت اني لازم انقل الموضوع ده

انا اسف يا رجالة بس حسيت اني لازم انقل الموضوع ده لان ممكن ناس كتير تستفيد منه
و عايز اوضح ان الموضوع بيعبر عن راي صاحبة فقط و انا مليش دخل الا اني عايز الافاده تعم

للأسف... احذروا من النيوسيراتو...!!!!

بسم الله الرحمن الرحيم

انا اخوكم المهندس محمد غازي..

يمكن كتير من الناس تعرف اني من ضمن اول الناس اللي اتكلموا عن النيو سيراتو و من اول الناس اللي حجزت و استلمت العربية في مصر... و من اول الناس اللي اتقلبوا بيها كمان.... طبعا كل الناس هتذهل من ده بس هي دي الحقيقة و يمكن اكون انشغلت فترة عن المنتدى, بس ده كان ضغط شغل و بعدها الحادث المؤلم و المؤسف...

ربنا اللي يعلم انا كنت بعشق العربية دي قد ايه.... الله يرحمها و والله كنت هحصلها لولا ستر ربنا فقط لا غير.

انا كنت بشتكي من حدفة شمال في العربية و اول حاجة فكرت فيها ضغط الكوتش.. عملته و تمام و شيكت عليه في مكان تاني 32 تمام... و بردو زي ما هي... يزيد على الكلام ده كله اني بعد 5000 كم لقيت المساعديين الاتنين ورا بيزيقو جامد...!!!!! قلت في صيانة 10000 هنشوف الموضوع ده... بس ملحقتش و قبل ما اروح التوكيل بيوم اتقلبت بالعربية يوم 4 أكتوبر.... الحمد الله

انا دخلت المستشفى و عندي كسر مضاعف في رجلي اليمين و خلع في الكتف اليمين و كسر في الترقوه... عملت عمليه في رجلي و كانت مسامير و كده طبعا و للأسف مقدرش امشي على رجلي قبل 4 شهور... فات منهم شهرين الحمد لله... و ربنا يسهلها في الباقي

النهارده انا لازم اتكلم مع الناس ان النيوسيراتو يا جماعه فيها عيب صناعة حقيقي... انا لاحظت ان كل الناس بتشتكي زي ما قلت في اول تقرير عملته عن العربيه ان فيها حدفة شمال!!!!!! ده شيئ غرييييب جدااا, كل السيراتو فيها حدفه شمال..!!! ده غييير ان المساعدين اللي ورا كانو بيزيقوا جداا بشكل رخم... العربيه مكملتش 10000 كم..!!!! هل ده طبيعي او معقووول!!!

وجهة نظري الشخصية.. العربيه دي فيها مشكله في المقصات و المساعدين.... و والله بعد فتره من سواقتي ليها اكتشفت انها شكل و موتور بس... غير كده والله العظيم ولا حاجه... فقررت ارضى بنصيبي و مقرصش عليها... و انا مش غشيم جري على فكره...

المفجأه اني لما اتقلبت بيها كنت ماشي في طريق الشيخ زايد على سرعة لا تتجاوز 100كم\ساعه.. و مفيش حد ورايا او قدامي او جنبي... و مخبطش في حد او في الرصيف مثلا... بس كان فيه زي نقره في الشارع بس كبيره شويه, حولت افاديها بس الكوتش نزل في اخرها, و طلعت العربيه عادي جداا و بعدها بمتر العربيه عومت بشكل غرييييييب جداا والله, لاقيتها بتحدف يمين جامد جداا فرحت عادلها شمال, لاقيتها حدفت شمااال جدا و مش عايزه تقبل اي حركة من الدركسيون و مش بتعدل يمين خااالص و الفرامل مش بتوقف العربية.. و الله ما فاكر بعدها غير اني في المستشفى... قالولي بعدها ان العربية اتقلبت حوالي 10-12 قلبة ((و الأغرب ان العربية اتقلبت على وشها..!!!!)) و انا مكنتش رابط الحزام فرحت طاير من البرابرييز 20 متر قدام و بقت العربية في ناحية و انا في ناحية تانيه (ده كلام الشاب اللي شافني و هو جاي من بعييد ورايا بعربيته و وداني المستشفى و دخلني بأسمه و كلم اهلي و لم حاجتي من العربية و جابهالي) مع اني والله ما كان في حد ورايا خالص بس هي دي رحمة ربنا والله, حط الراجل ده في سكتي... الحمد لله... ربنا يباركله والله

لما والدي سلم العربية التوكيل عشان التأمين يعمل مقايسه (مقايسة اصلاح) تكلفتها كانت 122500 جنيييه!!!!!!! و العربيه بـ116000 زيرو. و بالتالي العربية توتال لوس... التأمين بيماطل طبعا و عايز يحملني 25% من ثمن الايرباجز اللي اتفتحوا, و يخصم استخدام ال6 شهور دول (9600كم) و انا اللي ادفع للتوكيل ثمن المقايسة (3000 جنيه) و انا اللي اواديلهم العربية على حسابي لحد عندهم... و هيدوني بعد كل ده 78000 جنيه اول عن اخر....!!!!! انا مأمن مع كونتاكت و معملتش ولا مطالبة, و دي اول مطالبة بعد 6 شهور من المده التأمينيه...

اللي انا عايز اقوله ان اللي اشترى العربية ربنا يهنيه بيها و يكفيه شرها... بس ارجوكم و بالله عليكم, بلاش جري بالعربية و احذروا من البلاعات و النقر, و متقرصوش على العربية مش عشان الموتور لأ, بس عشان سلامتكوا و ربنا ما يخللي حد يشوف اللي انا شفته والله, اقسم بالله انا شفت الموت او كنت في عداد الموتى لولا ستر ربنا...

بفكر ابعت شكوى بالصور لكيا الأم في كوريا و بالصور.... بس لسة مش عارف هعمل ده ازاي, و هرفع قضيه على كيا هنا في مصر, عشان الموضوع بجد انا شايفة خطييير جداا و بجد العربية فيها عيوب خطيره متتشفش بالعين... اسف لو كنت خوفت ناس او قلقتهم, بس هي دي الحقيقه و كان لازم احذر الناس و اطلب منهم ميجرووش و ميسنوش من العربية دي الكتيير..

http://i586.photobucket.com/albums/s...2/S5000490.jpg

http://i586.photobucket.com/albums/s...2/S5000482.jpg

http://i586.photobucket.com/albums/s...0091004016.jpg

http://i586.photobucket.com/albums/s...0091004013.jpg