|
رد: عايز تدخل مشروع ايجار السيارت
عندى عربية فيرنا 2007 وعايز اجرها لمدة بدون سائق
|
رد: عايز تدخل مشروع ايجار السيارت
|
رد: عايز تدخل مشروع ايجار السيارت
اقتباس:
أولا لانك بكل بساطة الوحيد اللى ليه موضوع مثبت عن ايجار السيارات فى القسم ده اسمه (استفسارات عن ايجار السيارات / حصرى وخاص لمصر موتورز } كلام كبير اوى )تفتكر بعد كده اللى بيفكر فى الموضع ده هيروح لمين ؟؟وهو كل ميفتح صفحة يلاقى موضوع سيادتك منور والغريب انى لما قرأت هذا الموضوع لقيتك مركز فيه عن مصاريف ثابتة زى مكتب وشغلانة كده وبطاقة ضريبية وسجل تجارى وده محتاج مبلغ مبدئى للصرف عليه قبل شراء السيارة او هيكون وسيط بين صاحب السيارة والعميل بدون م يشترى سيارات من اصله و..ده كلام يعـقـد ...لانه محتاج مبلغ فى الاول على الاقل 10 الاف جنيه غير تمن السيارة ان كان هيشترى ياأما انت مفهمتش مغزى مابداخل الناس فى ناس مشترية وعايزة الايجار يغطى القسط وشكرا وفى ناس وظايفها لاتسمح بسجل وبطاقة ضريبية زائد مخاطر هذا الكلام من مكتب مؤجر الى اعلانات فى الجرايد اومال الناس هتعرفه ازاى وده محتاج رأس مال حضرتك لم توضحه على الاقل يكون كام كان مفروض فى الموضوع المثبت شرحت كل خبايا وتفاصيل الموضوع ومحصلش طبعا ثانيا لان سيادتك عامل موضوع تانى اللى هو احنا فيه دلوقت واسمه عايز تدخل مشروع ايجار السيارات وطبعا سعادتك عامل مقدمة جميلة جدا تحسس اى حد ناوى او بيفكر او مش بيفكر تخليه انه يدخل هنا ويسأل ويستفسر ثالثا انت قلت ان فى 25 صاحب معرض ايجار سيارات ليه محدش بيجاوب غيرك على الناس لان سيادتك اللى عملت موضوع وطلبت استفسارات الناس وانت هترد عليها لكن لما دورت على اصحاب المعارض دول وبحثت لقيتهم كلهم بيطلبو عربية ماركة كذا بأيجار كذا الى آخره يعنى لا..قالو للناس هنشرح لكم المشروع ولا قالو ...اللى عايز يدخل المشروع يسأل واحنا نرد عليه انما اللى قال كده ...سيادتك مشكورا طبعا وطالما عرضت خدماتك يبقى لازم يكون صدرك اوسع من كده رابعا انت قايل انك هتشرح المشروع للناس وان ظروف الناس بتختلف من واحد للتانى الكلام ده غير دقيق لان الاساسيات غير الفرعيات يعنى الاساسيات كان مفروض حضرتك شرحتها وأهم الأساسيات دى زى ماركة العربية المطلوبة اكثر واللى تجيب دخل اكبر زى موديل العربية اللى ممكن تتأجر آخره كام سنة (مش معقول واحد معاه 131 هيأجرها ؟؟؟ مثلا أو واحد معاه لانوس موديل 2000 تنفع واللا لا) فانت لازم تشرح وتوضح زى الطريقة الأمثل للتعامل مع مكاتب الايجار ايه ؟؟؟ بحيث تحفظ حقوق المؤجر والمستأجر والمكتب بغض النظر عن كونك صاحب مكتب لان التصدى لاستفسارات الناس يتطلب الامانة لانك هتحاسب عليها امام الله يوم القيامة ولان غالبية اللى بيشترو...... عبارة عن واحد معاه قرشين راح جايب عربية بالتقسيط وعايزها تجيب قسطها وخلاص لكن لا...عنده فكرة ولا...خبرة ولا..اى حاجة ..... غير انه جاب العربية وعايزها تصرف على نفسها لحد م تخلص قسطها..وخلاص زى القيمة اللى ممكن تتأجر بيها العربية يعنى سعادتك كنت استعرضت الفئة والماركة وكل فئة وماركة ليها متوسط ايجار يتراوح مابين كذا وكذا شهريا يعنى مثلا النيسان الصنى غير مرغوبة فى موضوع الايجار يبقى تحذر من حاجة زى كده وان كنت قلتها فى احد ردود الموضوع هناك بس طبعا دى عايزة واحد متابع الردود كلها غير لما تبقى مكتوبة من الأول زى حكاية العداد المقفول والعدا د المفتوح /وانا واثق تماما ان فى ناس كتير متعرفش الفرق بينهم زى ايهما افضل ايجار السيارة بالسائق والا بدون السائق (وان كنت انت رديت على احد اخواننا فى النقطة دى رد من وجهة نظرى غير كافى ولاشافى بس دى طبعا عايزةبرضه واحد متابع كل الردود ) زى السيارة بالسائق مع تحمل الصيانة او بدون او ببنزينها او بدون أيهما افضل وعيوب ومزايا كل منهم زى مدة ايجار السيارة يعنى الأيجار المؤقت لمدة شهر او 2 غير المفتوح كذا سنة دى متوسط ايجارها كام ودى متوسط ايجارها كام (حسب الماركة طبعا) غير الايجار بالمشوار نظامه ايه وظروفه ايه وهكذا اخيرا مساعداتك للاعضاء هيا دى النقطة الوحيدة اللى ممكن ترد فيها على الخاص لان ظروف كل واحد مختلفة عن التانى يعنى واحد معاه لانسر 1300 غير لانسر بوما غير لانسر كريستالة غير واحد معاه سيراتو غير واحد معاه اوكتافيا غير واحد م اشتراش خالص لكن هو فين الموضوع انت مكتبتش موضوع والموضوع المثبت ناقص كتييييير ولو جاوبت على اسئلتى هنا اعتقد هتعمل موضوع تانى هيثبتوه وهيلغو تثبيت القديم لانه هيبقى اشمل واعم واوسع وطبعا بـقـت الناس تسألك كل واحد على حدة ومفروض كلنا مستنيين ردك هتقول له ايه نفاجأ بيك كاتب تم الرد على الخاص للاستفسار السريع تليفون معرفش كام طب احنا فهمنا ايه ؟؟؟ وهل مطلوب ان كل واحد عايز يسأل انه يطلبك على المحمول ؟؟؟؟ ومعلش استحملنى فى الكلمتين اللى جايين دول ... اللى انت بتعمله لايزيد عن كونه نوع من الدعاية لسعادتك متغلف بغلاف اسمه المساعدة فى مشروع الايجار ماشى .... وايه المشكلة م تعمل دعاية ...مش عيب خالص بس يبقى واضح للجميع مرة تانية اشكرك لتحملك ليا والخلاف فى الرأى لايفسد للو د قضية |
رد: عايز تدخل مشروع ايجار السيارت
عزيزى استاذ خالد خليفة
فى شوية نقاط احب اوضحها لحضرتك اولا فى اصحاب معارض كثير وناس منها كانت بترد على استفسارات الاعضاء لمصالح شخصية جدا ومحدش كان عندة استعداد انة يجاوب على الناس ولا انة يعمل موضوع زى ال انا عملتة بس ولو الموضوع مضايق حضرتك واضح ان حضرتك عندك خبرة ممكن تعمل موضوع ويتم تثبيتة وتفيد الناس صح ثانيا حضرتك سالت اسئلة متفرقة فى كون شخص عادى ياجر وكون صاحب مكتب يستلم العربية بعقد وكون صاحب السيارة يعمل عليها ودة صعب جدا انى اشرح كل النقاط دة ثالثا الحمد لله انا مش محتاج دعاية وكون عملى مش مدينى فرصة انة اعمل اى شى تانى بس الحمد لله بقدر اساعد على قد مقدر رابعا الايجار عمل شائك جدا جدا ومشاكلة لا تنتهى مش زى البيع والشراء ولانة حساس فى التعامل فمش من الصح انى اقول على اسرار عملا وبذات لو جيت وقولت ان ايجار عربية لانوس فى اليوم 140 جنية ناس اصحاب عربيات بقول سعتها عيزين ناجر عربيتنا ب 3000 جنية للانوس وعقد لمدة 3 سنوات ويقول منتى بتكسب منها فى الشهر 4200 وطبعا دة مبيحصلش لان الناس مش فهمة ان الايجار اليومى غير المدة ودة معلومات متعهمش غير اصحاب مكاتب الايجار صح وموضوعى دة اذا كان بسيط فهو فية مبادى ودة ال تهم الناس بصفة مبدئية خامسا حضرتك من قالك ان سجل تجارى وبطاقة ضريبية محتاجة 10 الف جنية كمان اية الكلام ال حضرتك شيفة انة ميعقدش انى اقول روح خد مكان ومتعملش سجل تجارى وبطاقة ضريبية واسلم من اصحاب السيارت عربيات بطريقة غير غير سليمة علشان معقدش ال عايز يعمل المشروع على فكرة دة مش شى غريب انما دة الصح فى اى عمل مبادى اساسية وبعدين تعال اسال حضرتك سوال واحد هيعمل مشروع وممعهوش فلوس هل تصدق انة يقدر يتحمل مسولية عربيات ناس ويسلمها ايجار شهرى منتظم فى موعيدة صدقنى الموضوع مش سهل وحضرتك واضح خبرتك فانا ممكن اطلب اسحابى من اشرافى على القسم وحضرتك تعمل موضيع وتشرف على قسم الايجار وتفيد الناس وتابع الردود وطبعا اهم شى انك تكون صبور طبعا حوارى دة رد مبدى على كلام حضرتك ويريت توضح العيوب ال شيفها فى القسم للادارة وكمان تقدم حلول من عند حضرتك |
رد: عايز تدخل مشروع ايجار السيارت
اخويا العزيز الاستاذ / سيف اولا /انا ولاعندى خبرة ولاغيره واضح ان حضرتك اما مفهمتش معنى كلامى او مقريتش الموضوع بطريقة صح وارجو انك تقراه من تانى حتلاقى ردك نفسه انت رديت عليه ومع ذلك نقول كمان كل مافى الموضوع انى انا رديت على سؤال مفاده انك بتقول بالحرف اشمعنى انا؟؟؟ م فيه 25 واحد غيرى وانا قلت لانك اللى طلبت انك تساعد الناس و..ده شىء تحمد عليه ويحسب ليك وانا سألت طبعا اسئلة متفرقة لانها اساس الموضوع لانى حاسس بنبض الناس وفاهم تفكير الناس يااستاذى الفاضل نوضحها كمان مرة اكتر من 90 % من اللى سألوك عايزين يسلمو العربية ويقبضو الايجار شهريا ولذلك طلبت منك افضل طريقة للتعامل مع الناس ازاى عن طريق الاسئلة المتفرقة ولكى يتكامل الموضوع (أى موضوع ) يجب شرح جميع بنوده من مميزات ومشاكل ومعوقات .............الخ....الخ لانك بتتكلم عن مشروع ايجار والموضوع المثبت نفس القصة هو مشروع الايجار ولما قرأت الاثنين وجدت ان فى تفاصيل كتير ناقصة فأقترحتها عليك بالمناسبة انا بشتغل فى العقارات والمقاولات ولاعلاقة لى من قريب او بعيد بمسألة الايجار لكن لكى تعم الفائدة وطالما عملك ماشاء الله لاقوة الابالله مش مديك الوقت يبقى لازم تجد من يعاونك لان ربنا قال وتعاونو على البر والتقوى وطالما غرضك مساعدة الناس يبقى لازم نساعدك ولذلك اقترحت عليك هذه الاسئلة المتفرقة علشان سعادتك بما لك من خبرة فى هذا المجال لو جاوبتها كلها هتريح نفسك من الاسئلة الكتيرة والمكررة والمملة لان عدد الاسئلة هيقل وخصوصا ان وقتك ضيق فمش معقول نعمل موضوع وتتلخم انت عن شغلك او تتأخر على الناس فهذه الاسئلة كانت من باب المعاونة ليس الا وبعدين موضوع الايجار ولاصعب ولاسهل زيه زى اى سلعة او خدمة تقدم للناس واكيد طبعا له مشاكله زيه زى اى عمل فى الدنيا وفى الاول لازم يكون له مشاكله لحد المكتب (اى مكتب) م يكون قاعدة عملاء سواء من المؤجرين او المستأجرين واما موضوع ال 10 الاف جنيه فدى حسبة حاجة اسمها مصاريف التأسيس لان المكتب عبارة عن شقة وغالبا هتكون ايجار جديد وطبعا هيدفع مقدم شهر وشهر تأمين دول لوحدهم مش اقل من 2000 جنيه ثم فرش المكتب لان المفروش غالبا مشاكله كتير ثم عمل بعض االدعاية فى الجرايد والشوارع وحول المكتب ورقية او اعلانيه ثم لو معاه قرشين كمان يعمل حفل افتتاح ثم يكون مجهز نفسه انه يعمل اعلان فى الوسيط او اهرام الجمعة مرة كل اسبوعين علشان يجذب اكبر قدر من العملاء من الجانبين دى تكلفة مبدئية للى عايز يعمل المشروع لكن السجل والبطاقة الضريبية مش هيكلفوه 500 جنيه بالكتير لما يديهم لمحاسب يعملهم له اما موضوع الاسرار فأسرار الشغل دىموضوع تانى وموضوع اللانوس للى قلته مش هيختلف من شخص لشخص بل معروف اللانوس توبها كذا واللانسر توبها كذا .... مفيش اسرار وانا مطلبتش منك تقول ارقام ومع ذلك لو حضرتك قريت موضوعى وفهمته كويس كنت هتعرف انى رديت على النقطة دى لما قلت انك ممكن ترد على الخاص فى نقطة مساعداتك للناس يعنى اللانسر البومة غير الكريستالة غير السيراتو غير الاوكتافيا سيادتك مفروض انك بتحط اساسيات المشروع او الخطة العامة والتنفيذ على عاتق الناس مش عليك ثم التوفيق من عند الله لكن مينفعش اكتب عنوان ضخم واقول مشروع ايجار السيارات وبعدين آجى اقرا م اتعلمش حاجة ولا افهمش حاجة واروح كاتب للاستفسار السريع تليفون كذا..... كذا واضطر كل مييجى على بالى سؤال اتصل بيك واشغلك وانت بتقول ان وقتك مش ملكك طيب مهو ده شىء يعقد الناس لانه كل ميحتاج سؤال هيسألك واول مرة هيسأل عادى لان كل واحد فاكر نفسه هو بس اللى بيكلمك تانى مرة هيكلمك وهو محرج تالت مرة انت نفسك هتزهق منه يبقى واجبنا نساعدك ونهون عليك ثم من نبرة كلامك واضح انك انت بتنفى عن نفسك موضوع الاعلان وكأنه شبهة او تهمة لما قلت انك شغلك ماشاء الله ولاقوة الا بالله وانه مش مديك الفرصة يااستاذى الفاضل مش عيب انك تعمل اعلان لنفسك وانت بتخدم الناس وقال رسول الله كان الله فى عون العبد ماكان العبد فى عون اخيه طيب مهو شىء طبيعى ان اللى عنده عربية اول م هيفكر يسلمها هيسلمها ليك لانك اول واحد ارشده ودله على هذا الطريق وعلى فكرة لو قريت كل اسئلة الناس هتلاقيها كلها تقريبا مكررة ولاتخرج عن الاسئلة اللى انا طرحتها اخيرا انا لابفكر لافى اشراف ولاتثبيت مواضيع ولاغيره ولامتضايق منه اساسا ولو بفكر فى قليل مش كثير من متاع الدنيا ......مش مجرد اشراف فى منتدى كان بقى حالى حاجة تانية خااااااااالص للمرة الالف تذكر ان الخلاف فى الرأى لايفسد للو د قضية وخصوصا انك ناصح وعملت لنفسك خط دفاع اول لما قلت ان ردك ده مبدئى علشان تدى نفسك فرصة ترد على اى كلام هقوله تانى لكن انا ياعم قلت كل اللى عندى ومش هرد تانى لان الموضوع معمول لفايدة الناس مش علشان الرد والرد المضاد اشكرك لسعة صدرك وتحملك ليا |
رد: عايز تدخل مشروع ايجار السيارت
عندى سيارة ماتريكس 2008 وعاوز ااجرها ايه الافضل شركات ام افراد
|
رد: عايز تدخل مشروع ايجار السيارت
اقتباس:
|
| الساعة الآن 02:40 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017